AKP ភ្នំពេញ ថ្ងៃទី០៣ ខែកុម្ភៈ ឆ្នាំ២០២៥-- លោក ខូវ មាស អគ្គលេខាធិការរងអាជ្ញាធរទន្លេសាប និងប្រធានក្រុមការងារ កាលពីថ្ងៃទី០២ ខែកុម្ភៈ ឆ្នាំ២០២៥ បានដឹកនាំក្រុមការងារមន្ត្រីបច្ចេកទេសនៃអគ្គលេខាធិការដ្ឋានអាជ្ញាធរទន្លេសាប បានចុះធ្វើអធិការកិច្ចតំបន់៣នៃដែនព្រៃលិចទឹក ក្នុងភូមិសាស្រ្តស្រុកសន្ទុក និងក្រុងស្ទឹងសែន ខេត្តកំពង់ធំ។ 

ក្នុងឱកាសនេះដែរ លោកប្រធានក្រុមការងារបានជម្រាបជូនអំពីសារសំខាន់នៃតំបន់៣ ដែលត្រូវរួមគ្នាការពារ និងថែរក្សាព្រមទាំងបានណែនាំដល់អាជ្ញាធរដែនដីចូលរួមទប់ស្កាត់ ការទន្រ្ទានដោយបន្តចូលអាស្រ័យផលក្នុងដីតំបន់៣ ការកាប់បំផ្លាញព្រៃលិចទឹកក្នុងតំបន់២ និងតំបន់៣ ជាពិសេសពង្រឹងលើយន្តការអនុវត្តច្បាប់ បទដ្ឋានគតិយុត្ត ដែលមានជាធរមានរួចហើយ ។

សូមជម្រាបជូនថា ការចុះអធិការកិច្ច ក្រុមការងារបានចុះទៅដល់ទីតាំងផ្ទាល់ដោយមានការអញ្ជើញចូលរួមពីសំណាក់លោកអភិបាលក្រុងស្ទឹងសែន អភិបាលរងស្រុកសន្ទុក គណៈបញ្ជាការស្រាល កងកម្លាំងទាំង៣ អង្គភាព លោកមេឃុំ លោកមេភូមិ និងមន្ទីរជំនាញពាក់ព័ន្ធ៕

ដោយ ណយ នឿន (ប្រភព៖ អាជ្ញាធរទន្លេសាប)