AKP ព្រះសីហនុ ថ្ងៃទី០២ ខែកុម្ភៈ ឆ្នាំ២០២៥ -- លោក សុខ គា អភិបាលរងនៃគណៈអភិបាលខេត្តព្រះសីហនុ បានអញ្ជើញទទួលស្វាគមន៍គណៈប្រតិភូកងទ័ពជើងទឹកកាណាដា ដឹកនាំដោយលោក ដេវីត វើប៊ីស្គី (David Verbiwski) ភារធារីការិយាល័យស្ថានទូតកាណាដានៅទីក្រុងភ្នំពេញ កាលពីរសៀលថ្ងៃសៅរ៍ ទី០១ ខែកុម្ភៈ ឆ្នាំ២០២៥ នៅសាលាខេត្តព្រះសីហនុ។

លោក សុខ គា អភិបាលរងខេត្តព្រះសីហនុបានស្វាគមន៍ភារធារីការិយាល័យស្ថានទូតកាណាដានៅទីក្រុងភ្នំពេញ ដែលបានដឹកនាំគណៈប្រតិភូនាវាកងទ័ពជើងទឹកកាណាដា ចូលជួបសម្តែងការគួសម និងពិភាក្សាការងារ។ កម្ពុជា និងកាណាដាមានទំនាក់ទំនងការទូត និងកិច្ចសហប្រតិបត្តិការផ្លែផ្កា។ ប្រទេសកាណាដាបានចូលរួមក្នុងកិច្ចខិតខំប្រឹងប្រែងស្វែងរកសន្តិភាពនៅកម្ពុជា តាមរយៈការបញ្ជូនកងរក្សាសន្តិភាព និងសកម្មភាពបោសសម្អាតមីន និងផ្តល់ជំនួយអភិវឌ្ឍន៍ផ្សេងៗមកកម្ពុជា។ កាណាដាជាដៃគូពាណិជ្ជកម្មទី៧របស់កម្ពុជា ក្នុងការចូលរួមចំណែកអភិវឌ្ឍសង្គមសេដ្ឋកិច្ច ក៏ដូចជាការបង្កើតការងារ និងអភិវឌ្ឍជំនាញវិជ្ជាជីវៈសម្រាប់យុវជនកម្ពុជា។

លោកអភិបាលរងបានបញ្ជាក់ថា កាលពីថ្ងៃទី១៣ ខែកុម្ភៈ ឆ្នាំ២០២០ ក្នុងវិបត្តិកូវីដ-១៩ សម្តេចតេជោ ហ៊ុន សែន អតីតនាយករដ្ឋមន្ត្រីកម្ពុជា បានទទួលស្វាគមន៍នាវាទេសចរណ៍ Wasterdam នៅកំពង់ផែស្វយ័តក្រុងព្រះសីហនុ ក្នុងនោះមានភ្ញៀវទេសចរប្រទេសកាណាដាចំនួន ២៧១នាក់ ស្រី ១៤២នាក់ តាមរយៈទស្សនកិច្ចនេះធ្វើឱ្យទំនាក់ទំនងផ្សារភ្ជាប់អ្នកទេសចរ និងវិនិយោគផងដែរ។

លោកអភិបាលរងខេត្តបានជម្រាបជូនបន្ថែមថា ខេត្តព្រះសីហនុជាខេត្តមានឆ្នេរសមុទ្រស្រស់ស្អាត ប្រជាពលរដ្ឋមានស្នាមញញឹមរាក់ទាក់រីករាយគ្រប់ជាតិសាសន៍ ខេត្តផ្តោតសំខាន់ទៅលើការអភិវឌ្ឍសេដ្ឋកិច្ច ពាណិជ្ជកម្ម ឧស្សាហកម្ម វិនិយោគ កសិកម្ម និងទេសចរណ៍ ការចូលរួមកសាងសន្តិភាពនៅកម្ពុជា មិនអាចខ្វះពីប្រទេសកាណាដា បើមិនមានសន្តិភាព ខេត្តព្រះសីហនុ ក៏មិនមានការអភិវឌ្ឍលឿនដូចបច្ចប្បន្ននេះ តាមរយៈលោកភារធារី ជួយជំរុញឱ្យមានការហោះហើរត្រង់មកកាន់ខេត្តព្រះសីហនុ ឬមកកាន់កម្ពុជា ដើម្បីធ្វើការផ្លាស់ប្តូរទេសចរណ៍ វិនិយោគ ព្រោះប្រជាជនខេត្តព្រះសីហនុមាន GDP សម្រាប់មនុស្សម្នាក់ជាង ៤ ០០០ពាន់ដុល្លាអាមេរិកក្នុងមួយឆ្នាំ។

លោក ដេវីត វើប៊ីស្គី (David Verbiwski) ភារធារីការិយាល័យស្ថានទូតកាណាដានៅទីក្រុងភ្នំពេញ ថ្លែងអំណរគុណរដ្ឋបាលខេត្តព្រះសីហនុ ដែលបានទទួលប្រតិភូ និងនាវឹកនាវាកងទ័ពជើងទឹកកាណាដា។ ប្រទេសកាណាដាបានចូលរួមយ៉ាងសកម្មក្នុងប្រតិបត្តិការថែរក្សាសន្តិភាពនៅកម្ពុជាក្នុងអំឡុងឆ្នាំ១៩៩២ ដែលហៅថា អ៊ុនតាក់។ ទាហានកាណាដាបន្តនៅកម្ពុជា ក្នុងសកម្មភាពប្រតិបត្តិការជាមួយអង្គការ CMAC ដោះមីននៅកម្ពុជា។ កាណាដាជាដៃគូលើវិស័យកាត់ដេរ ដែលជាវិស័យចំបងនៅក្នុងប្រទេសកម្ពុជា ហើយវិស័យកាត់ដែនេះ បាននាំចេញទៅប្រទេសកាណាដា។ ម្យ៉ាងទៀតធនាគារ ABA ជាធនាគារធំនៃការចូលរួមវិនិយោគពីប្រទេសកាណាដានៅកម្ពុជា។ យើងមានមោទនភាពមកកាន់ខេត្តព្រះសីហនុ លោកក៏បានមកកាន់ខេត្តព្រះសីហនុម្តងរួមមកហើយ ជាមួយក្រុមគ្រួសារទៅកម្សាន្តនៅតំបន់កោះនៃខេត្តព្រះសីហនុ។ គោលបំណងនៃការចូលចតរបស់នាវាកងទ័ពជើងទឹកប្រទេសកាណាដា គឺដើម្បីរឹតចំណងទំនាក់ទំនងសាមគ្គីភាព មិត្តភាព និងកិច្ចសហប្រតិបត្តិការ។ នេះជានាវាកាណាដាទី២ ដែលបានចូលចតនៅកំពង់ផែស្វយ័តក្រុងព្រះសីហនុ រយៈពេលពីរឆ្នាំចុងក្រោយនេះ នាវាកាណាដា ក៏ដូចជាកងទ័ពកាណាដា ប្ដេជ្ញាថែរក្សាសេរីភាពបើកចំហដែនសមុទ្រឥណ្ឌូប៉ាស៊ីហ្វិក ការចូលរួមការងារសហគមន៍ក្នុងខេត្តព្រះសីហនុ ក្រៅពីនោះទស្សនកិច្ចវប្បធម៌នៅរាជធានីភ្នំពេញ មានកម្មវិធីកីឡា និងកម្មវីធីដែលចូលរួមដោយរដ្ឋបាលខេត្តព្រះសីហនុ។

លោកក៏បានថ្លែងអំណគុណរដ្ឋាភិបាលកម្ពុជា ដែលអនុញ្ញាតឱ្យនាវាទេសចរណ៍ Wasterdam ចូលចតក្នុងវិបត្តិកូវីដ-១៩ ដែលជាពេលលំបាកបំផុត ដែលមានប្រជាជនកាណាដាជាង ២០០នាក់នៅលើនាវា និងបានធ្វើការវាយតម្លៃពីសក្តានុពលរបស់ខេត្តព្រះសីហនុ ដែលមានវិស័យទេសចរណ៍ សេដ្ឋកិច្ច ពិសេសកំពង់ផែអន្តរជាតិក្រុងព្រះសីហនុ ជាដង្ហើមសេដ្ឋកិច្ចមួយយ៉ាងសំខាន់របស់កម្ពុជា នៅចុងខែឧសភា ឆ្នាំ២០២៥ ប្រទេសកាណាដា ដឹកនាំគណប្រតិភូជំនួញ និងពាណិជ្ជកម្មធ្វើទស្សនកិច្ចនៅព្រះរាជាណាចក្រកម្ពុជា ដោយមានកិច្ចសហការជាមួយក្រុមប្រឹក្សាអភិវឌ្ឍកម្ពុជា និងសង្ឃឹមថា ខេត្តព្រះសីហនុនឹងចាត់គណៈប្រតិភូចូលរួម ដើម្បីធ្វើកិច្ចសហប្រតិបត្តិការលើវិស័យសេដ្ឋកិច្ច ពាណិជ្ជកម្ម ចំពោះសំណើឱ្យមានការហោះហើរត្រង់មកកាន់កម្ពុជា លោកទទួលយកសំណើរទៅពិចារណា ព្រោះអាកាសចរណ៍ជាតិកាណាដាទើបតែចាប់ផ្តើមធ្វើការហោះហើរពីកាណាដា មកកាន់ប្រទេសសិង្ហបុរីក្នុងរយៈពេលពេញមួយឆ្នាំ ចំណែកការហោះហើរត្រង់ពីកាណាដា មកទីក្រុងបាងកកមានតែ៥ ឬ៦ខែប៉ុណ្ណោះក្នុងមួយឆ្នាំ៕

ដោយ ងូ សុមុនី