AKP កំពង់ធំ ថ្ងៃទី០២ ខែកុម្ភៈ ឆ្នាំ២០២៥ -- ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ និងជាអនុប្រធានក្រុមការងាររបស់រាជរដ្ឋាភិបាលចុះមូលដ្ឋានស្រុកសណ្ដាន់ កាលពីថ្ងៃទី០១ ខែកុម្ភៈ ឆ្នាំ២០២៥ បានដឹកនាំសហការីទៅត្រួតពិនិត្យការស្ថាបនាផ្លូវលំក្រាលគ្រួសក្រហម០១ខ្សែប្រវែងជាង២១គីឡូម៉ែត្រពីទីរួមស្រុកទៅកាន់ឃុំដងកាំបិត ស្រុកសណ្ដាន់ ខេត្តកំពង់ធំ ដែលជាអំណោយរបស់សម្ដេចមហាបបរអធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា តាមរយៈឯកឧត្តម នាយឧត្តម សេនីយ៍ ម៉ៅ សុផាន់ អគ្គមេបញ្ជាការរងនៃកងយោធពលខេមរៈភូមិន្ទ មេបញ្ជាការកងទ័ពជើងគោក ប្រធានក្រុមការងាររាជរដ្ឋាភិបាលចុះមូលដ្ឋានស្រុកសណ្ដាន់ ខេត្តកំពង់ធំ។

ឧត្តមសេនីយ៍ទោ សោម ស៊ុន បានមានប្រសាសន៍បញ្ជាក់ថាផ្លូវលំក្រាលគ្រួសក្រហម០១ខ្សែប្រវែង២១១៥០ម៉ែត្រនេះបានដំណើរការបើកការដ្ឋានស្ថាបនានៅថ្ងៃទី១៧ ខែធ្នូ ឆ្នាំ២០២៤ គិតមកដល់ពេលនេះមានរយៈពេលជិតពីរខែហើយ។ ផ្លូវនេះត្រូវបានធ្វើលូក្រាលបេតុងបាតចំនួន១៣០ម៉ែត្រការ៉េ ដើម្បីរំដោះទឹកជន់លិចនៅក្នុងរដូវវស្សាដែលមានកម្ពស់១,៨០ម៉ែត្រស្ថិតនៅតំបន់អូរពពេល ក្នុងឃុំដងកាំបិត ស្រុកសណ្ដាន់។

ឧត្តមសេនីយ៍ទោ សោម ស៊ុន ក្នុងនាមអនុប្រធានក្រុមការងាររបស់រាជរដ្ឋាភិបាលចុះមូលដ្ឋានស្រុកសណ្ដាន់ បានគូសបញ្ជាក់ថា អាជ្ញាធរដែនដី និងប្រជាពលរដ្ឋនៅក្នុងស្រុកសណ្ដាន់ ខេត្តកំពង់ធំ ពិសេសនៅឃុំដងកាំបិត និងឃុំសណ្ដាន់ មានសេចក្តីរំភើបរីករាយយ៉ាងខ្លាំងដែលបានទទួលផ្លូវថ្មីមួយខ្សែនេះងាយស្រួលក្នុងការធ្វើដំណើរដឹកកសិផលផ្សេងៗ ពីឃុំសណ្ដាន់ឆ្ពោះទៅកាន់ឃុំដងកាំបិត និងពីឃុំដងកាំបិតមកកាន់ទីរួមស្រុកសណ្ដាន់ និងបានថ្លែងអំណរគុណចំពោះសម្ដេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវ ព្រមទាំងឯកឧត្តមនាយឧត្តមសេនីយ៍ ម៉ៅ សុផាន់ ដែលបានយកចិត្តទុកដាក់ដោះស្រាយនូវរាល់ការលំបាកជូនប្រជាជននៅស្រុកសណ្តាន់ ខេត្តកំពង់ធំ និងគោរពជូនពរសម្តេច និងលោកជំទាវ ព្រមទាំងឯកឧត្តមនាយឧត្ដមសេនីយ៍ទទួលបាននូវពុទ្ធពរទាំងបួនប្រការកុំបីឃ្លៀងឃ្លាតឡើយ៕

ដោយ ស៊ុម វណ្ណា (ប្រភព៖ តំបន់សឹករងកំពង់ធំ)