AKP ព្រះសីហនុ ថ្ងៃទី០១ ខែកុម្ភៈ ឆ្នាំ២០២៥ -- ឯកឧត្តម ម៉ាង ស៊ីណេត អភិបាលនៃគណៈអភិបាលខេត្តព្រះសីហនុ បានដឹកនាំមន្ទីរ អង្គភាពពាក់ព័ន្ធ អាជ្ញាធរក្រុងព្រះសីហនុ ស្រុកស្ទឹងហាវ និងឃុំ សង្កាត់ ដោយមានការចូលរួមសហការពីតំណាងក្រសួងបរិស្ថាន និងក្រសួងរ៉ែ និងថាមពល ចុះពិនិត្យទីតាំងជាក់ស្តែង ដើម្បីស្វែងរកប្រភពនៃការលេចធ្លាយប្រេងហូរចូលនៅលើផ្ទៃសមុទ្រនៃឆ្នេរព្រែកត្រែង និងបានចាត់កំលាំងធ្វើការសម្អាតប្រេងនៅតាមបណ្តោយឆ្នេរ និងតាមទីតាំងមួយចំនួនផ្សេងទៀតដែលមានកកកំណកប្រេង នាព្រឹកថ្ងៃសៅរ៍ ទី០១ ខែកុម្ភៈ ឆ្នាំ២០២៥។

រដ្ឋបាលខេត្តព្រះសីហនុបានឱ្យដឹងថា បន្ទាប់ពីទទួលបានព័ត៌មានពីករណីមានប្រេងអណ្តែតមកលើតំបន់ទេសចរណ៍ឆ្នេរព្រែកត្រែង ស្ថិតនៅភូមិ៣ សង្កាត់លេខ១ ក្រុងព្រះសីហនុ និងឃុំអូរត្រេះ ស្រុកស្ទឹងហាវ ខេត្តព្រះសីហនុ ឯកឧត្តមអភិបាលខេត្តបានដឹកនាំក្រុមការងារចុះមកពិនិត្យទីតាំងជាក់ស្តែងតែម្ដង។

ទន្ទឹមនឹងនេះ រដ្ឋបាលខេត្តព្រះសីហនុសូមអំពាវនាវដល់បងប្អូនប្រជាពលរដ្ឋ ក៏ដូចជាភ្ញៀវទេសចរជាតិ និងអន្តរជាតិ ដែលមកកំសាន្តនៅឆ្នេរព្រែកត្រែង សូមផ្អាកចុះលេងទឹកជាបណ្តោះអាសន្ន ដើម្បីទុកលទ្ធភាពជូនក្រុមការងារបច្ចេកទេសធ្វើការសម្អាត និងចៀសវាងផលប៉ះពាល់ផ្សេងៗ៕ 

ដោយ ងូ សុមុនី