AKP ភ្នំពេញ ថ្ងៃទី៣១ ខែមករា ឆ្នាំ២០២៥-- អង្គការអភិរក្សអន្តរជាតិ កម្ពុជា CI ក្រសួងបរិស្ថាន រដ្ឋបាលខេត្តស្ទឹងត្រែង ក្រុមហ៊ុនគ្លូប៊ល ហ្រ្គីន នែតជ្រលរា និងដៃគូ នៅថ្ងៃទី៣១ ខែមករា ឆ្នាំ២០២៥ បើកសិក្ខាសាលាពិគ្រោះយោបល់ជាមួយភាគីពាក់ព័ន្ធសម្រាប់ការរៀបចំគម្រោងរេដបូកនៃឧទ្យានជាតិវើនសៃ-សៀមប៉ាង នៅសាលប្រជុំសាលាខេត្តស្ទឹងត្រែង។

អង្គសិក្ខាសាលានេះដឹកនាំដោយឯកឧត្តមបណ្ឌិត ជួប ប៉ារីស៍ រដ្ឋលេខាធិការ និងជាមន្ត្រីបង្គោលរេដបូកជាតិ តំណាងក្រសួងបរិស្ថាន និងមានការចូលរួមផងពីអគ្គនាយកដ្ឋានសំខាន់ៗនៃក្រសួងបរិស្ថាន អភិបាលរងនៃគណៈអភិបាលខេត្តស្ទឹងត្រែង និងរតនគិរី មន្រ្តីមកពីមន្ទីរបរិស្ថានខេត្ត រដ្ឋបាលថ្នាក់ខេត្ត ស្រុក អាជ្ញាធរឃុំភូមិ តំណាងជនជាតិដើមភាគតិច ក្រុមហ៊ុន GGN បុគ្គលិកអង្គការអភិរក្សអន្តរជាតិ សហគមន៍តំបន់ការពារធម្មជាតិ និងអង្គការក្រៅរដ្ឋាភិបាលពាក់ព័ន្ធសរុបប្រមាណជិត២២៥នាក់ (ស្រ្តី៥២នាក់ និងជនជាតិដើមភាគតិចលើសពី៥០ភាគរយនៃអ្នកចូលរួមសរុប ) ។  

សិក្ខាសាលានេះធ្វើឡើងក្នុងគោលបំណង ចែករំលែកពីសារៈសំខាន់នៃការគ្រប់គ្រងតំបន់ការពារធម្មជាតិ បង្ហាញអំពីគម្រោងរេដបូក និងដំណើរការនៃការអនុវត្តគម្រោង និងពិគ្រោះយោបល់ជាមួយអាជ្ញាធរ ជនជាតិដើមភាគតិច សហគមន៍មូលដ្ឋាន និងភាគីពាក់ព័ន្ធផ្សេងៗទៀតសម្រាប់ការរៀបចំគម្រោងរេដបូក នៅក្នុងតំបន់ឧទ្យានជាតិវើនសៃសៀមប៉ាង។ នេះជាកិច្ចពិគ្រោះយោបល់លើកទី២ហើយសម្រាប់គម្រោងរេដបូកនៃឧទ្យានជាតិវើនសៃ-សៀមប៉ាង ដែលលើកទីមួយរៀបចំឡើងនៅសហគមន៍នៃតំបន់វើនសៃកាលពីខែវិច្ឆិកា ឆ្នាំ២០២៤កន្លងទៅ។

អង្គការ CI ធ្វើការយ៉ាងជិតស្និទ្ធជាមួយក្រសួងបរិស្ថាន តាំងពីឆ្នាំ២០០៩ ក្នុងការអភិរក្សនៅឧទ្យានជាតិវើនសៃ-សៀមប៉ាង។ បន្ទាប់ពីចុះហត្ថលេខាអនុវត្តគម្រោងរេដបូកនៅឧទ្យានជាតិវើនសៃ សៀមប៉ាងជាមួយក្រសួងបរិស្ថានកាលពីឆ្នាំ២០២៤ កន្លងទៅ អង្គការ CI បានសហការជាមួយក្រុមហ៊ុន GGN រៀបចំអនុវត្តគម្រោងរេដបូក ដោយផ្តោតលើការធានាលើកិច្ចការពារ និងអភិរក្សធនធានធម្មជាតិ ប្រព័ន្ធអេកូទ្បូស៊ីជីវៈចម្រុះ និងលើកកម្ពស់ជីវភាពរបស់សហគមន៍មូលដ្ឋាន ចូលរួមកាត់បន្ថយការប្រែប្រួលអាកាសធាតុពីការបាត់បង់ និងរេចរឹលព្រៃឈើនៅតំបន់នោះ។  

ក្រោយពីចូលរួមសិក្ខាសាលា អ្នកចូលរួមយល់កាន់តែប្រសើរអំពីសារៈសំខាន់នៃការគ្រប់គ្រងតំបន់ការពារធម្មជាតិ អំពីគម្រោងរេដបូក និងដំណើរការនៃការអនុវត្តគម្រោង ព្រមទាំងបានផ្តល់ធាតុចូល និងអនុសាសន៍សម្រាប់ការរៀបចំគម្រោងរេដបូក ក្នុងតំបន់ឧទ្យានជាតិវើនសៃ-សៀមប៉ាង ភូមិសាស្ត្រខេត្តស្ទឹងត្រែង និងរតនគិរី៕

ដោយ ណយ នឿន (ប្រភព៖ CI)