AKP ភ្នំពេញ ថ្ងៃទី៣១ ខែមករា ឆ្នាំ២០២៥--

លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រី ក្រសួងវប្បធម៌ និងវិចិត្រសិល្បៈ កាលពីថ្ងៃទី៣០ ខែមករា ឆ្នាំ២០២៥ បានអញ្ជើញពិនិត្យសកម្មភាពផលិតភាពយន្តរឿង "Kazakh Vibe" របស់ផលិតកម្ម Daubay Production នៃប្រទេសកាហ្សាក់ស្ថាន នៅតំបន់រមណីយដ្ឋានអង្គរ និងបានចូលរួមពិធីបិទកាមេរ៉ាថតជាស្ថាពរនៅខេត្តសៀមរាប។

សកម្មភាពផលិតភាពយន្តរឿង "Kazakh Vibe" គឺជាខ្សែភាពយន្តថ្មីមួយដែលផលិតដោយ Daubay Production ពីប្រទេសកាហ្សាក់ស្ថាន និងមានការសម្របសម្រួលការផលិតនៅកម្ពុជា ដោយផលិតកម្ម KUDU Studios។

ដោយមានការសម្របសម្រួល និងការគាំទ្រពីនាយកដ្ឋានភាពយន្ត និងការផ្សព្វផ្សាយវប្បធម៌ នៃក្រសួងវប្បធម៌ និងវិចិត្រសិល្បៈ អាជ្ញាធរជាតិអប្សរា និងអាជ្ញាធរដែនដីពាក់ព័ន្ធគម្រោងថតខ្សែភាពយន្តនេះនឹងបង្កើតប្រវត្តិសាស្ត្រជាខ្សែភាពយន្តរឿងវែងដំបូងគេរបស់ កាហ្សាក់ស្ថាន ដែលបានថតនៅកម្ពុជា និងបើកផ្លូវសម្រាប់គម្រោងផ្សេងៗទៀតនាពេលអនាគត។ សូមបញ្ជាក់ថា ក្នុងឱកាសនោះក៏មានការអញ្ជើញចូលរួមពីសំណាក់ ឯកឧត្តម ហូត ហាក់ រដ្ឋមន្ត្រីក្រសួងទេសចរណ៍ និងឯកឧត្តម ហង់ ពៅ អគ្គនាយកអាជ្ញាធរជាតិអប្សរាផងដែរ៕

ដោយ ណយ នឿន (ប្រភព៖ ក្រសួងវប្បធម៌)