AKP ភ្នំពេញ ថ្ងៃទី៣១ ខែមករា ឆ្នាំ២០២៥--

នៅមជ្ឈមណ្ឌលជាតិរក្សាសន្តិភាព ព្រឹកថ្ងៃទី៣១ ខែមករា ឆ្នាំ២០២៥នេះ ឯកឧត្តម ឧត្តមសេនីយ៍ទោ សែម រតនា អនុប្រធានទី១គណៈកម្មាធិការជាតិ និងជាអគ្គនាយកស្តីទីមជ្ឈមណ្ឌលជាតិរក្សាសន្តិភាព បានទទួលជួបពិភាក្សាការងារជាមួយលោកស្រី Matsuzawa Tomoko នាយក នាយកដ្ឋានសហប្រតិបត្តិការអន្តរជាតិ ស្ត្រីដើម្បីសន្តិភាព និងសន្តិសុខក្រសួងការពារជាតិជប៉ុន ដោយក្នុងជំនួបនេះ ឯកឧត្តម ឧត្តមសេនីយ៍ទោ សែម រតនា បានថ្លែងអំណរគុណយ៉ាងជ្រាលជ្រៅចំពោះជំនួយឧបត្ថម្ភហ្វឹកហ្វឺនពីប្រទេសជប៉ុនសម្រាប់កងកម្លាំងកម្ពុជានាពេលកន្លងមករហូតដល់ពេលបច្ចុប្បន្ន។

បើតាមឯកឧត្តម ឧត្តមសេនីយ៍ទោ សែម រតនា អនុប្រធានទី១គណៈកម្មាធិការជាតិ និងជាអគ្គនាយកស្តីទីមជ្ឈមណ្ឌលជាតិរក្សាសន្តិភាព បានឱ្យដឹងថា ចាប់ពីឆ្នាំ២០១៣ រហូតដល់ពេលបច្ចុប្បន្នភាគីជប៉ុនបានជួយរៀបចំវគ្គបំប៉នក្នុងប្រទេសដល់កងកម្លាំងកម្ពុជាសរុបចំនួន១១វគ្គ មានសិក្ខាកាមចំនួន២៣៥ នាក់ លើជំនាញបច្ចេកទេសវិស្វកម្ម និងវាស់ស្ទង់។ ដោយឡែកក្នុងអំឡុងពេល COVID-19 ជប៉ុនបានផ្តល់ការហ្វឹកហ្វឺនតាមរយៈប្រព័ន្ធ Online ដល់គ្រូបង្គោលចំនួន៥នាក់ផងដែរ ហើយចំពោះវគ្គបំប៉នក្រៅប្រទេសមានសិក្ខាកាមសរុបចំនួន៧នាក់ លើមុខជំនាញវិស្វកម្មសំណង់ផ្ដេក និងគ្រឿងផ្ទុះ។

ឯកឧត្តមបានសំណូមពរដល់ភាគីជប៉ុនឱ្យផ្តល់ការហ្វឹកហ្វឺនរយៈពេល៥ឆ្នាំបន្តទៀតលើផ្នែកវាស់ស្ទង់តូប៉ូសំណង់ផ្ដេក-បញ្ឈរ។ បន្តផ្តល់ការហ្វឹកហ្វឺនដល់គ្រូបង្គោលកម្ពុជា តាមតថភាពជាក់ស្តែងនៃតំបន់បេសកកម្ម ដើម្បីពង្រឹងសមត្ថភាពមុននឹងចល័តដល់កងវិស្វកម្មកម្ពុជាសម្រាប់បេសកកម្មអង្គការសហប្រជាជាតិ។ សូមផ្តល់អាហាររូបករណ៍ដល់សិក្ខាកាមឆ្នើម ក្រោមការហ្វឹកហ្វឺនរបស់យោធាចារ្យជប៉ុនឱ្យទៅបំប៉នបន្ថែមរយៈពេលខ្លី- មធ្យម នៅសាលាវិស្វកម្ម នៃប្រទេសជប៉ុន។ ផ្តល់ការហ្វឹកហ្វឺនទាំងទ្រឹស្តី និងការអនុវត្តជាក់ស្តែងលើជំនាញវាស់ស្ទង់តាមរយៈម៉ាស៊ីនទំនើប និងការប្រើប្រាស់ Drone ដើម្បីឆ្លើយតបទៅនឹងស្ថានការណ៍បច្ចុប្បន្នដែលមានភាពស្មុគស្មាញ រួមនិងការផ្លាស់ប្តូរទស្សនកិច្ចប្រចាំឆ្នាំរវាងប្រទេសទាំងពីរ និងចូលរួមក្នុងព្រឹត្តិការណ៍នានារួមគ្នាផងដែរ។ ជាការឆ្លើយតបលោកស្រី Matsuzawa Tomoko ប្រធាននាយកដ្ឋានសហប្រតិបត្តិការអន្តរជាតិ ស្ត្រីដើម្បីសន្តិភាព និងសន្តិសុខក្រសួងការពារជាតិជប៉ុនថានឹងពាំនាំយកនូវរាល់សំណើរបស់ឯកឧត្តម ឧត្តមសេនីយ៍ទោ សែម រតនា អនុប្រធានទី១ គណៈកម្មាធិការជាតិ និងជាអគ្គនាយកស្តីទីមជ្ឈមណ្ឌលជាតិរក្សាសន្តិភាពទៅដាក់ជូនថ្នាក់ដឹកនាំក្រសួងការពារជាតិជប៉ុនពិនិត្យ និងសម្រេច ព្រមទាំងបានសម្តែងនូវការពេញចិត្តចំពោះកិច្ចសហប្រតិបត្តិការដែលមានស្រាប់ថែមទៀតផង៕

ដោយ៖ ចាន់ សុភឿន (ប្រភព៖ មជ្ឈមណ្ឌលជាតិរក្សាសន្តិភាព)