AKP ភ្នំពេញ ថ្ងៃទី៣១ ខែមករា ឆ្នាំ២០២៥--

ការរៀបចំការប្រកួតសិស្សបឋមសិក្សា និងមធ្យមសិក្សាថ្នាក់ជាតិ ឆ្នាំ២០២៥ គឺចំគោលដៅដែលកម្ពុជាកំពុងត្រៀមខ្លួនឆ្ពោះទៅទទួលរៀបចំធ្វើម្ចាស់ផ្ទះ ការប្រកួតកីឡាយុវជនអាស៊ី លើកទី៥ ឆ្នាំ២០២៩។ នេះជាការលើកឡើងរបស់ឯកឧត្តម វ៉ាត់ ចំរើន រដ្ឋលេខាធិការ ក្រសួងអប់រំ យុវជន និងកីឡា ថ្លែងនៅក្នុងបទសម្ភាសន៍ជាមួយអ្នកសារព័ត៌មាន ក្រោយបញ្ចប់ការដឹកនាំកិច្ចប្រជុំផ្សព្វផ្សាយបទបញ្ញត្តិទូទៅ និងបទបញ្ជាបច្ចេកទេសការប្រកួតកីឡាសិស្សបឋមសិក្សា និងមធ្យមសិក្សាថ្នាក់ជាតិ ឆ្នាំ២០២៥ នៅថ្ងៃសុក្រ ទី៣១ ខែមករា ឆ្នាំ២០២៥ នៅមជ្ឈមណ្ឌលជាតិហ្វឹកហ្វឺនកីឡា។

ឯកឧត្តម វ៉ាត់ ចំរើន បានសង្កត់ធ្ងន់បែបនេះថា ៖«នៅក្នុងឆ្នាំ២០២៥នេះ ក្រសួងអប់រំ យុវជន និងកីឡាត្រៀមរៀបចំការប្រកួតកីឡាសិស្សបឋមសិក្សា និងមធ្យមសិក្សាថ្នាក់ជាតិ ដែលជាការប្រកួតដ៏ធំទូទាំងប្រទេសតែម្តង។ ដូច្នេះមន្ទីរអប់រំ យុវជន និងកីឡារាជធានីខេត្តទាំងអស់ រួមទាំងសហព័ន្ធកីឡាជាតិពាក់ព័ន្ធទាំងអស់នឹងរួបរួមគ្នា ក្នុងការរៀបចំឱ្យមានភាពប្រែប្រួល ក្នុងរបត់ថ្មីមួយ កុំឱ្យដដែលៗ ពោលគឺធ្វើយ៉ាងណាឱ្យមានគោលដៅកាន់តែច្បាស់លាស់ ដើម្បីទាញយកនូវអត្ថប្រយោជន៍ដែលទាញយកពីព្រឹត្តិការណ៍កីឡាថ្នាក់ជាតិទាំងពីកម្រិតនេះ ទាំងស្មារតី ទាំងគុណភាពបច្ចេកទេស ព្រមទាំងឱ្យសិស្សានុសិស្សទាំងអស់បានឈ្វេងយល់អំពីសារៈប្រយោជន៍នៃការរៀបចំព្រឹត្តិការណ៍កីឡាថ្នាក់ជាតិនេះ»។

បន្ថែមពីលើនេះ មន្ត្រីជាន់ខ្ពស់ក្រសួងអប់រំរូបនេះបានគូសបញ្ជាក់ទៀតថា ៖«ការបញ្ជ្រាបការផ្សពផ្សព្វផ្សាយនេះក៏បានបញ្ជាក់អំពីប្រធានបទច្បាស់លាស់ មានការដាក់សារអប់រំមួយចំនួនទៀត ទៅក្នុងសកម្មភាពអប់រំកាយ និងកីឡា ដោយផ្នែកអប់រំកាយ និងកីឡានេះជាសមាសធាតុមួយសំខាន់ណាស់ ក្នុងការបំពេញបន្ថែមទៅដល់ការសិក្សារបស់សិស្សានុសិស្ស។ ដូច្នេះ យើងទាំងអស់គ្នាបានខិតខំធ្វើកិច្ចការទៅតាមការណែនាំដ៏ខ្ពង់ខ្ពស់របស់ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា ក្នុងការលើកកម្ពស់គុណភាពសិក្សារបស់សិស្សានុសិស្សនៅតាមសាលារៀន ដោយគុណភាពសិក្សានេះ ក៏មានអប់រំកាយ និងកីឡា នៅក្នុងនោះដែរ ដើម្បីឱ្យមានភាពគ្រប់ជ្រុងជ្រោយនៃលក្ខណៈសម្បត្តិក្នុងការសិក្សា និងគោលដៅរបស់ពួកគាត់»។

ឯកឧត្តម វ៉ាត់ ចំរើន បន្ថែមថា នៅក្នុងកិច្ចប្រជុំថ្ងៃនេះ គ្រប់រាជធានី-ខេត្ត និងសហព័ន្ធកីឡាជាតិទាំងអស់បានយល់ដឹង និងប្រឹងប្រែងជំរុញធ្វើឱ្យការប្រកួតថ្នាក់ជាតិនេះឱ្យការប្រែប្រួល ក្នុងរបត់ថ្មីមួយ ពីព្រោះយើងដឹងហើយថា យើងនឹងឈានទៅរកគោលដៅ ដែលរាជរដ្ឋាភិបាលកំពុងផ្តោតការយកចិត្តទុកដាក់ ក្នុងការជំរុញដល់ការត្រៀមទទួលរៀបចំធ្វើម្ចាស់ផ្ទះ ការប្រកួតកីឡាយុវជនអាស៊ី ឆ្នាំ២០២៩។ ដូច្នេះការរៀបចំកីឡាសិស្សបឋមសិក្សា និងមធ្យមសិក្សាថ្នាក់ជាតិ ឆ្នាំ២០២៥នេះ គឺចំទៅនឹងគោលដៅនៃការធ្វើម្ចាស់ផ្ទះ កីឡាយុវជនអាស៊ី ឆ្នាំ២០២៩ តែម្តង ដោយយើងត្រូវកសាងសមត្ថភាពរបស់កីឡាករ កីឡាការិនីចាប់ពីកម្រិតបឋមសិក្សាឡើងទៅ។ នេះជាការដាក់គោលដៅច្បាស់លាស់ និងខ្លឹមសារនៃដំណើរវិវឌ្ឍន៍ពីមួយជំហានទៅមួយជំហានឆ្ពោះទៅគោលដៅចុងក្រោយនៃការធ្វើម្ចាស់ផ្ទះ កីឡាយុវជនអាស៊ី ឆ្នាំ២០២៩។

បន្ថែមពីលើនេះ ឯកឧត្តមរដ្ឋលេខាធិការអះអាងថា កិច្ចប្រជុំថ្ងៃនេះពិតជាមានសារៈសំខាន់ ដែលថ្នាក់ដឹកនាំទាំងអស់ ក៏ដូចជានាយកដ្ឋានជំនាញនៃក្រសួងអប់រំ យុវជន និងកីឡា រួមទាំងសហព័ន្ធកីឡាជាតិ មន្ទីរអប់រំ យុវជន និងកីឡារាជធានីខេត្តទាំងអស់បានយល់ច្បាស់អំពីគោលដៅចម្បងៗរបស់យើងទាំងអស់គ្នា ក្នុងការស្វែងរកនូវគុណភាពនៃការរៀបចំការប្រកួតនេះ ឆ្ពោះទៅរកគោលដៅការធ្វើម្ចាស់ផ្ទះ កីឡាយុវជនអាស៊ី ឆ្នាំ២០២៩ខាងមុខ។

បើតាមការគូសបញ្ជាក់របស់ លោក ហួត សេងទ្រី ប្រធាននាយកដ្ឋានរៀបចំព្រឹត្តិការណ៍ និងស្ថិតិកីឡានៃក្រសួងអប់រំ យុវជន និងកីឡាបានឱ្យដឹងថា ការរៀបចំប្រកួតកីឡាសិស្សបឋមសិក្សាថ្នាក់ជាតិ ឆ្នាំ២០២៥ នឹងប្រព្រឹត្តទៅចាប់ពីថ្ងៃទី០២-១១ ខែឧសភា ឆ្នាំ២០២៥ នៅរាជធានីភ្នំពេញ ដោយកំណត់រៀបចំលើ១៣ប្រភេទកីឡា ដែលមានប្រតិភូ គ្រូបង្វឹក កីឡាករ កីឡាការិនីចូលរួមពី២៥រាជធានីខេត្តនូវចំនួនប្រមាណ ៣ ០០០ នាក់។ រីឯការរៀបចំប្រកួតកីឡាសិស្សមធ្យមសិក្សាថ្នាក់ជាតិ ឆ្នាំ២០២៥ នឹងប្រព្រឹត្តទៅចាប់ពីថ្ងៃទី០៦-១៥ ខែមិថុនា ឆ្នាំ២០២៥ នៅរាជធានីភ្នំពេញ ដោយរៀបចំលើ១៤ប្រភេទកីឡា ដែលមានប្រតិភូ គ្រូបង្វឹក កីឡាករ កីឡាការិនីចូលរួមមកពី២៥រាជធានីខេត្តនូវចំនួនប្រមាណ ៣ ៥០០នាក់៕

ដោយ ហេង ណាលីន