AKP ភ្នំពេញ ថ្ងៃទី៣១ ខែមករា ឆ្នាំ២០២៥-- ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ បានមានប្រសាសន៍លើកឡើងថា ក្រសួងមុខងារសាធារណៈ ក្នុងនាមជាលេខាធិការដ្ឋានគ.វ.រ. តែងតែបានត្រៀមលក្ខណៈគ្រប់ពេលវេលា ដើម្បីចូលរួមក្នុងកិច្ចពិភាក្សា និងការពិគ្រោះយោបល់ជាបន្តបន្ទាប់គ្រប់ក្រសួង-ស្ថាប័នទាំងអស់ ដើម្បីធ្វើយ៉ាងណាសហការគ្នាសម្រេចគោលដៅនៃការវិភាគមុខងារឱ្យបានជាសមិទ្ធផលជូនដល់រាជរដ្ឋាភិបាល។ ឯកឧត្តមឧបនាយករដ្ឋមន្ត្រីបានមានប្រសាសន៍ដូច្នេះ ក្នុងសិក្ខាសាលា ស្តីពី «ការពិនិត្យឡើងវិញ និងការវិភាគមុខងារ និងរចនាសម្ព័ន្ធនៃក្រសួងពាណិជ្ជកម្ម » កាលពីថ្ងៃទី៣០ ខែមករា ឆ្នាំ២០២៥។

ក្នុងឱកាសនោះ ឯកឧត្តម ឧបនាយករដ្ឋមន្ត្រី ហ៊ុន ម៉ានី រដ្ឋមន្ត្រីក្រសួងមុខងារសាធារណៈ និងជាអនុប្រធានប្រចាំការនៃគ.វ.រ. បានលើកឡើងថា គោលបំណងរៀបចំសិក្ខាសាលាតាមបណ្តាក្រសួងស្ថាប័ន គឺដើម្បីបង្ហាញវឌ្ឍនភាពព័ត៌មានជាមួយគ្នា និងជាពិសេសការសហការជាមួយគ្នាកាន់តែស្អិតរមួតបន្ថែមទៀត ក្នុងបេសកកម្មកែទម្រង់រដ្ឋបាលសាធារណៈ តាមរយៈការវិភាគមុខងារ។

ទន្ទឹមនឹងនេះ ឯកឧត្តមឧបនាយករដ្ឋមន្ត្រីបានលើកឡើងថា រាជរដ្ឋាភិបាលក៏ដូចជាថ្នាក់ដឹកនាំនៃក្រសួងមុខងារសាធារណៈ បានយល់ច្បាស់ពីស្ថានភាពនយោបាយ និងស្ថានភាពបច្ចេកទេសផ្សេងគ្នានៅតាមបណ្តាក្រសួង-ស្ថាប័ននីមួយៗ។ ក្នុងបរិបទនៃការងារកែទម្រង់ ជាពិសេសការវិភាគមុខងារ យើងទាំងអស់គ្នាចាំបាច់ត្រូវតែចេញដំណើរជាមួយគ្នា តាមរយៈការចាប់ផ្តើមឈ្វេងយល់ពីគោលបំណង និយមន័យ បេសកកម្ម ទស្សនវិស័យវែងឆ្ងាយឆ្ពោះទៅមុខ ជាមួយនឹងការឯកភាពទស្សនៈរួមគ្នា។

ជាមួយគ្នានេះដែរ ឯកឧត្តមឧបនាយករដ្ឋមន្ត្រី បានផ្តល់អនុសាសន៍ថា ការធ្វើវិភាគមុខងារជាឱកាសរបស់យើងទាំងអស់គ្នា ដើម្បីពង្រឹងភាពធន់ និងដើម្បីរៀបចំប្រព័ន្ធរដ្ឋបាលសាធារណៈដែលទំនើប មានសមត្ថភាពខ្ពស់ ខ្លាំង វៃឆ្លាត ស្អាតស្អំ សម្រាប់អ្នកជំនាន់ក្រោយៗទៀត៕

ដោយ៖ ពេជ្រ សំអឿន (ប្រភព៖ ក្រសួងមុខងារសាធារណៈ)