AKP កំពង់ឆ្នាំង ថ្ងៃទី៣១ ខែមករា ឆ្នាំ២០២៥-- ឯកឧត្តម ប៊ូ ជុំសេរី អនុរដ្ឋលេខាធិការក្រសួងអប់រំ យុវជន និងកីឡា បានអញ្ជើញជាអធិបតីក្នុងពិធីបើកសន្និបាតបូកសរុបវាយតម្លៃលទ្ធផលការងារអប់រំ ឆ្នាំសិក្សា២០២៣-២០២៤ និងលើកទិសដៅការងារឆ្នាំសិក្សា២០២៤-២០២៥ នៅថ្ងៃទី៣០ ខែមករា ឆ្នាំ២០២៥ ដោយមានការអញ្ជើញចូលរួមពីលោក ឈឹម វុទ្ធា អភិបាលរងខេត្តកំពង់ឆ្នាំង លោក ស៊ឹម ព្រឹម ប្រធានមន្ទីអប់រំ យុវជន និងកីឡាខេត្ត លោក លោកស្រីថ្នាក់ដឹកនាំមន្ទីរអង្គភាពជុំវិញខេត្ត និងថ្នាក់ដឹកនាំមន្រ្តីរាជការមន្ទីរអប់រំ យុវជន និងកីឡាខេត្ត លោកគ្រូ អ្នកគ្រូ ជានាយក នាយិកាសាលាជាច្រើនរូបផងដែរ ។

ក្នុងឱកាសនោះលោក ស៊ឹម ព្រឹម ប្រធានមន្ទីអប់រំ យុវជន និងកីឡាខេត្ត បានឡើងអានរបាយការណ៍សង្ខេបស្ដីពីលទ្ធផលការងារកន្លងមក គឺពិតជាមានមោទនភាពអំពីលទ្ធផលសម្រចបានទាំងផ្នែកបរិមាណ និងគុណភាពដែលជាសកម្មភាពជាអាទិភាព និងជាយុទ្ធសាស្ត្រដែលបានអនុវត្តត្រូវបានផ្តោតជាសំខាន់ទៅលើការលើកកម្ពស់គុណភាពអប់រំ តាមរយៈការពង្រឹងសមត្ថភាពគ្រូបង្រៀន សមត្ថភាពគ្រប់គ្រង អភិបាលកិច្ចល្អ ការតាមដានត្រួតពិនិត្យ ការធ្វើអធិការកិច្ច និងការវាយតម្លៃ។ ប្រទេសមានវឌ្ឍនភាពលើគ្រប់វិស័យ ក្រោមការដឹកនាំរបស់រាជរដ្ឋាភិបាលកម្ពុជា ដែលមានសម្ដេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានធ្វើឱ្យមានកិត្យានុភាពជាតិកាន់តែត្រូវបានលើកកម្ពស់ ជាពិសេសការរក្សាបាននូវលំនឹងសន្តិភាព សន្តិសុខ កំណើនសេដ្ឋកិច្ច កំណើនការងារ និងចំណូលក្នុងជីវភាពប្រចាំថ្ងៃរបស់ប្រជាពលរដ្ឋ។

ទន្ទឹមនឹងនេះ ឯកឧត្តមអនុរដ្ឋលេខាធិការ បានមានប្រសាសន៍ក្នុងអង្គសន្និបាតបានកោតសរសើរ និងវាយតម្លៃខ្ពស់ចំពោះវីរភាពនៃការជោគជ័យបន្ថែមក្នុងការអនុវត្តការងារអប់រំ យុវជន និងកីឡា ស្របតាមកំណែទម្រង់ស៊ីជម្រៅរបស់ក្រសួងអប់រំ យុវជន និងកីឡា ខេត្តកំពង់ឆ្នាំងដែលទទួលបានលទ្ធផលជាទីមោទនលើគ្រប់ផ្នែកអប់រំចាប់តាំងពីផ្នែកមត្តេយ្យសិក្សា រហូតដល់មធ្យមសិក្សា។ ក្នុងនោះ អត្រាបោះបង់ការសិក្សា និងអត្រាត្រួតថ្នាក់មានការថយចុះជាបណ្តើរៗគួរឱ្យកត់សម្គាល់ អត្រាឆ្លងភូមិសិក្សា និងអត្រាបញ្ចប់ការសិក្សាមានការកើនឡើងបន្តបន្ទាប់ ។

បន្ថែមលើនេះ ឯកឧត្តមបានផ្ដាំផ្ញើដល់លោកគ្រូអ្នកគ្រូត្រូវហ្វឹកហាត់បន្ថែមទៀតដើម្បីអភិវឌ្ឍសមត្ថភាពខ្លួនឱ្យស្របតាមការអភិវឌ្ឍនៃបច្ចេកវិទ្យាសកលលោកតាមប្រព័ន្ធអេឡិចត្រូនិក និងរកគន្លឹះដោះស្រាយនូវបញ្ហាប្រឈម មួយចំនួនដែលពុំទាន់បានដោះស្រាយ នៅតាមបណ្តា ក្រុង-ស្រុក និងដៃគូអភិវឌ្ឍទាំងអស់ ដើម្បីអភិវឌ្ឍវិស័យអប់រំមួយនេះលើកកម្ពស់ធនធានមនុស្សគុណភាព ឱ្យកាន់តែប្រសើរឡើង៕

ដោយ បៃ ស៊ីថុន