AKP កែប ថ្ងៃទី៣០ ខែមករា ឆ្នាំ២០២៥ -- តាមរបាយការណ៍របស់មន្ទីរទេសចរណ៍ខេត្តកែប បានឱ្យដឹងនៅព្រឹកថ្ងៃទី៣០ ខែមករា ឆ្នាំ២០២៥នេះថា ក្នុងថ្ងៃចូលឆ្នាំប្រពៃណីជនជាតិចិន-វៀតណាម កាលពីថ្ងៃទី២៩ខែ មករា ឆ្នាំ២០២៥ មានភ្ញៀវទេសចរដើរលេងកម្សាន្តតាមបណ្តាតំបន់រម្មណីយដ្ឋាននានា នៅទូទាំងខេត្តកែបចំនួន១៥,៩៩៦ នាក់ ក្នុងនោះភ្ញៀវជាតិមានចំនួន ១៥,៨៨១នាក់។

លោក ប៉ុក ទាំង ប្រធានស្តីទីមន្ទីរទេសចរណ៍ខេត្តកែប បានប្រាប់ឱ្យដឹងថា សម្រាប់ថ្ងៃទី២៩ ខែមករា ឆ្នាំ២០២៥ ពោលក្នុងពិធីបុណ្យចូលឆ្នាំចិននេះ បងប្អូនប្រជាពលរដ្ឋបានចេញដើរលេងកម្សាន្តនៅបណ្តាទីតាំងសំខាន់ៗមាន ឆ្នេរលេងទឹកស្រីស ផ្សារក្តាម ឆ្នេរអង្កោល និងឆ្នេរកោះទន្សាយជាដើម។ ទន្ទឹមនឹងនេះ លោកក៏បានដឹកនាំក្រុមការងារ ចុះពិនិត្យតាមដានការផ្តល់សេវានានារបស់អាជីវករ ទៅកាន់អ្នកទេសចរ ជាពិសេសនៅឆ្នេរលេងទឹកស្រីស និងផ្សារក្តាម ដើម្បីបង្ការបាតុភាពណាមួយកើតឡើង រវាងអ្នកផ្តល់សេវា និងអ្នកទទួលសេវា។ 

លោកប្រធានស្ដីទីបានបន្តថា កន្លងទៅមិនថាពិធីបុណ្យទាន ឬថ្ងៃឈប់សម្រាក មន្ទីរទេសចរណ៍ អាជ្ញាធរ និងមន្ទីរពាក់ព័ន្ធផ្សេងទៀត តែងចុះអប់រំ អាជីវករទាំងអស់ក្នុងការធ្វើបដិសណ្ឋារកិច្ចជូនភ្ញៀវទេសចរអោយមានរបៀបរៀបរយល្អ ទាំងការរៀបចំសណ្តាប់ធ្នាប់សាធារណៈ អនាម័យ បរិស្ថាន និងការលក់ដូរដោយភាពរួសរាយរាក់ទាក់ និងស្មោះត្រង់ ដើម្បីផ្តល់នូវទំនុកចិត្តជូនដល់អ្នកទេសចរ ដែលមកសម្រាក លម្ហែ កម្សាន្ត នៅតំបន់រមណីយដ្ឋានខេត្តកែប៕

ដោយ ប្រាក់ លាង