AKP តាកែវ ថ្ងៃទី២៩ ខែមករា ឆ្នាំ២០២៥--ក្នុងបរិវេណវិទ្យាល័យជាស៊ីម តាកែវ ស្ថិតនៅក្នុងសង្កាត់រកាក្នុង ក្រុងដូនកែវ ខេត្តតាកែវ បានរៀបចំពិធីជួបសំណេះសំណាល និងអប់រំផ្សព្វផ្សាយពីបញ្ហាមួយចំនួនដល់ប្អូនៗសិស្សានុសិស្សក្នុងវិទ្យាល័យនោះ កាលពីថ្ងៃទី២៨ ខែមករា ឆ្នាំ២០២៥ ដោយអញ្ជើញចូលរួមជាអធិបតីក្នុងពិធីនោះដោយលោក កង អាណាន់ អភិបាលនៃគណៈអភិបាលក្រុងដូនកែវ និងជាប្រធានគណៈបញ្ជាការឯកភាពរដ្ឋបាលក្រុងដូនកែវ ព្រមទាំងមានការចូលរួមពីថ្នាក់ដឹកនាំមន្ត្រីរាជការកងកម្លាំងប្រដាប់អាវុធ ក្រុងដូនកែវ លោកគ្រូអ្នកគ្រូ និងសិស្សានុសិស្សវិទ្យាល័យជាស៊ីមតាកែវ សរុបប្រមាណជាង2ពាន់នាក់។

មានប្រសាសន៍សំណេះសំណាលក្នុងពិធីនោះ លោក កង អាណាន់ អភិបាលនៃគណៈអភិបាលក្រុងដូនកែវ និងជាប្រធានគណៈបញ្ជាការឯកភាពរដ្ឋបាលក្រុងដូនកែវ បានមានប្រសាសន៍បញ្ជាក់ស្ដីពីគោលនយោបាយភូមិ-សង្កាត់មានសុវត្ថិភាព ពិសេសច្បាប់ចរាចរណ៍ផ្លូវគោក បញ្ហាគ្រឿងញៀនបញ្ហាក្មេងទំនើង និងអនាម័យបរិស្ថាន។

ក្នុងឱកាសនោះ លោក កង អាណាន់ ក៏បានធ្វើការអប់រំផ្សព្វផ្សាយនូវច្បាប់ចរាចរណ៍ផ្លូវគោកឱ្យមានការយល់ដឹងកាន់តែច្បាស់ ក៏ដូចជាការពញ្ញាក់ស្មារតីឱ្យមានការប្រុងប្រយ័ត្ន ចូលរួមគោរពច្បាប់ចរាចរណ៍ផ្លូវគោកទាំងអស់គ្នា ជៀសវាងគ្រោះថ្នាក់ចរាចរណ៍នឹងអាចកើតឡើងជាយថាហេតុ និងបានលើកឡើងនូវផលប៉ះពាល់ដោយសារគ្រឿងញៀន ក្នុងស្រទាប់សិស្សានុសិស្ស។ ដោយគ្រឿងញៀនគឺជាបញ្ហារបស់យើងទាំងអស់គ្នាត្រូវរួមគ្នាប្រយុទ្ធប្រឆាំង ព្រោះគ្រឿងញៀនខុសច្បាប់និងគ្រឿងស្រវឹងអាច បណ្ដាលឱ្យមានគ្រោះថ្នាក់ដល់សុខភាព និងអាយុជីវិត បំផ្លាញអនាគតយុវជន និងភាគីពាក់ព័ន្ធផងដែរ។

លោកអភិបាលក្រុងដូនកែវក៏បានលើកឡើងពីប្រភេទបារីអេឡិចត្រូនិក (E-Cigarette-Vape) ដែលកំពុងបញ្រ្ជាបខ្លួនយ៉ាងខ្លាំងក្នុងចំណោមសិស្សានុសិស្ស ដែលឧបករណ៍នេះអាចបង្កគ្រោះថ្នាក់ធ្ងន់ធ្ងរដល់សុខភាព ដូចជាបង្កជំងឺមហារីក បង្កើនហានិភ័យជំងឺបេះដូងជំងឺសួត ធ្វើឱ្យខួរក្បាលមានដំណើរការមិនប្រក្រតីក្នុងអំឡុងពេលប្រើប្រាស់ និងប៉ះពាល់យូរអង្វែងដល់ការលូតលាស់ខួរក្បាលរបស់កុមារនិងយុវវ័យ  ព្រមទាំងបង្កអន្តរាយដល់រាងកាយថែមទៀតផង។ ដូច្នេះសូមប្អូនៗសិស្សានុសិស្សទាំងអស់ ត្រូវជៀសឱ្យឆ្ងាយពីការប្រើប្រាស់បារីអេឡិចត្រូនិកនេះ។

លោក កង អាណាន់ ក៏បានលើកឡើងពីបញ្ហាក្មេងទំនើងក្នុងសាលា ក្នុងនោះអាជ្ញាធរនឹងចុះកំណត់មុខសញ្ញាក្មេងទំនើងឲឱ្យបានច្បាស់លាស់ ការពារ និងចៀសវាងជនទាំងនោះបង្កផលប៉ះពាល់ និងបង្កគ្រោះថ្នាក់ដល់អ្នកដទៃ។ យើងនឹងកោះហៅមកធ្វើការអប់រំណែនាំ និងពិនិត្យសារធាតុញៀន ព្រមទាំងអនុវត្តច្បាប់ឱ្យបានតឹងរ៉ឹងបំផុតលើជនទាំងនោះផងដែរ៕

ដោយ អ៊ុច សៀង