AKP ភ្នំពេញ ថ្ងៃទី២៩ ខែ មករា ឆ្នាំ២០២៥--ជាការកត់សម្គាល់តាំងតែពីមុនពេលចាប់ផ្ដើមពិធីបុណ្យចូលឆ្នាំចិនប្រមាណមួយសប្តាហ៍មកម្លេះ មិនថាជាសាច់សម្រាប់ធ្វើម្ហូបអាហារ ដូចជាសត្វជ្រូក មាន់ទា នោះទេ សូម្បីតែគ្រឿងដាក់តាំងលម្អផ្ទះសម្បែង រួមមានដូចជា ដើមផ្កា និងរុក្ខជាតិច្រើនប្រភេទ ត្រូវបានអាជីវករលក់ដូរមានការមមាញឹកដើរប្រមូលទិញ និងដាក់លក់យ៉ាងព្រោងព្រាតដើម្បីឱ្យទាន់រដូវកាលបុណ្យចូលឆ្នាំថ្មីរបស់បងប្អូនជនជាតិខ្មែរសែស្រឡាយចិន ហើយក៏ដូចជាជនជាតិចិនកំពុងរស់នៅប្រទេសកម្ពុជាផងដែរ។

ក្រុមអាជីវករខាងផ្នែកលក់ ជ្រូក មាន់ ទា បានត្រៀមជាស្រេច សម្រាប់តម្រូវការទីផ្សារ ដែលតែងមានតម្រូវការខ្ពស់បំផុតនៅក្នុងរដូវកាលចូលឆ្នាំចិននេះ។ ចំណែកក្រុមអាជីវករលក់ផ្កា និងដើមរុក្ខជាតិនានាក៏បានចំណាយដើមទុនមិនតិចទេសម្រាប់ទិញទុកតាមតម្រូវការអតិថិជនរបស់ខ្លួន ក្នុងនោះដូចជាដើមផ្កាអង្គារសីល ដើមក្រូចឃ្វិក ស្បៃរឿង សិរមាន់ ក្រូចថ្លុង ម្នាស់ជាដើមសម្រាប់លក់ឱ្យទាន់រដូវកាលបុណ្យចូលឆ្នាំប្រពៃណីចិន-វៀតណាម ក្នុងឆ្នាំនេះ។

សម្រាប់ពិធីបុណ្យចូលឆ្នាំចិន-វៀតណាមនាឆ្នាំនេះ នឹងប្រារព្ធធ្វើឡើងនៅថ្ងៃទី២៩ ៣០ និង៣១ ខែមករា ឆ្នាំ ២០២៥ ហើយសម្រាប់ថ្ងៃទី២៨ ខែ មករា គឺជាថ្ងៃសែនចូលឆ្នាំចិន។

ពាក់ព័ន្ធនឹងតម្រូវការម្ហូបអាហារ នៅក្នុងពិធីបុណ្យចូលឆ្នាំចិន-វៀតណាមនេះដែរ លោក ស្រ៊ុន ពៅ ប្រធានសមាគមន៍អ្នកចិញ្ចឹមសត្វកម្ពុជាបានប្រាប់ឱ្យដឹងថា តាមធម្មតាតម្រូវការជ្រូកនៅប្រទេសកម្ពុជាមុនថ្ងៃបុណ្យចូលឆ្នាំចិន គឺមានប្រមាណ៨ពាន់ក្បាល ទៅ៩ពាន់ក្បាល។ តែសម្រាប់ថ្ងៃចូលឆ្នាំចិន នាពេលនេះតម្រូវការជ្រូកបានហក់ដល់ពី១០ម៉ឺនក្បាល ទៅ២០ម៉ឺនក្បាល។ លោកបន្ដថា ចំនួនកើនឡើងនេះតែរយៈពេល២ថ្ងៃក្នុងថ្ងៃបុណ្យចូលឆ្នាំចិនទេគឺមុនថ្ងៃសែន និងថ្ងៃសែន បុណ្យចូលឆ្នាំចិនតែម្តង។

លោកប្រធានសមាគមន៍រូបនេះបានប្រាប់ឱ្យដឹងដែរថា សម្រាប់មាន់ ទា វិញ ថ្ងៃធម្មតាមានតម្រូវការចាប់ពី១៨ម៉ឺនក្បាល ទៅ១៩ម៉ឺនក្បាល ក្នុងមួយថ្ងៃ។ តែសម្រាប់ថ្ងៃបុណ្យចូលឆ្នាំចិន កំណើនប្រើប្រាស់មាន់ ទា ចាប់ពី២០ម៉ឺនក្បាល ទៅជាង៣០ម៉ឺនក្បាល។ លោកប្រធានសមាគមបានលើកឡើងថា៖ «សម្រាប់តម្លៃជ្រូករស់នាពេលបច្ចុប្បន្ននេះ សមាគមអ្នកចិញ្ចឹមសត្វកម្ពុជា កសិករអាចលក់ចេញបានក្នុងតម្លៃចន្លោះពីជាង៨ពាន់រៀល ទៅជាង៩ពាន់រៀលក្នុង១គីឡូក្រាម ហើយសម្រាប់ពិធីបុណ្យចូលឆ្នាំចិននេះដែរតម្លៃអាចលើសនេះបន្តិចបន្តួចផងដែរ»។

ដោយឡែកសម្រាប់ក្រុមអ្នកលក់ផ្កា និងរុក្ខជាតិវិញបានរៀបរាប់ប្រាប់ឱ្យដឹងដែរថា ការចាប់ផ្តើមលក់ផ្កាដាច់នោះគឺបន្ទាប់ពីការសែនដកជើងធូបកាលពីថ្ងៃទី២៣ ខែមករា ឆ្នាំ២០២៥កន្លងមក ហើយរហូតមកដល់ថ្ងៃសែនចូលឆ្នាំចិន ឬសូម្បីតែថ្ងៃចូលឆ្នាំចិនថ្ងៃទី១ ឬថ្ងៃទី២ ក៏នៅតែអាចលក់បានដោយសារតែអតិថិជនមិនទាន់មានពេលទិញ ហើយពួកគេក៏មកទិញហូរហែដែរ។ ទន្ទឹមនេះ ចំពោះដើមផ្កា និងដើមរុក្ខជាតិទាំងនោះ ក្រៅពីគេទិញសម្រាប់ដាក់ក្នុងផ្ទះសម្បែង ដែលគេជឿជាក់ថាសម្រាប់នាំមកនូវជោគសិរីសួស្តីហើយ ក៏ដូចជាការតាំងលម្អផ្ទះសម្បែងយ៉ាងស្រស់ស្អាតនារដូវចូលឆ្នាំថ្មីរបស់ពួកគេផងដែរ។

កញ្ញា អ៊ឹម សេងហុង អ្នកលក់ផ្កាយីហោ “សួនពេញចិត្ត” នៅលើបណ្តាយផ្លូវជាតិលេខ 6A ស្ថិតនៅខណ្ឌជ្រោយចង្វារ រាជធានីភ្នំពេញបានបញ្ជាក់ប្រាប់ថារៀងរាល់ឆ្នាំសួនផ្កាកញ្ញាត្រូវចំណាយថវិការហូតដល់៦ទៅ៧ម៉ឺនដុល្លារសម្រាប់ទិញផ្កាលក់នារដូវចូលឆ្នាំចិន។ កញ្ញាបន្ដថា សម្រាប់ឆ្នាំនេះដែរ ការលក់ពីដំបូងទីពោលគឺមុនមួយសប្តាហ៍នៃថ្ងៃបុណ្យចូលឆ្នាំចិនមិនសូវជាដាច់ទេ តែមកដល់មុនថ្ងៃសែន និងថ្ងៃសែនចូលឆ្នាំចិនគឺដាច់ខ្លាំងណាស់ដែរ។

ស្រ្តីអ្នកលក់ផ្ការូបនេះបានបញ្ជាក់បន្ថែមថា៖ «ការចំណាយដើមទុនទិញផ្កានេះត្រូវតែច្រើនពីព្រោះថាអតិថិជនគេ​ក៏មានតម្រូវការផ្កាប្រភេទល្អៗដែរពោលគឺមិនដូចសម័យមុនៗនោះទេ។ អតិថជនគេអ្នកមានលុយច្រើន ម្ល៉ោះហើយផ្កាក៏ត្រូវល្អ និងស្រស់ស្អាត ដោយអ្នកខ្លះគេមិនស្តាយក្នុងការតាំងលម្អផ្ទះសម្បែងនារដូវចូលឆ្នាំថ្មីរបស់ពួកគេនោះឡើយ»។

លោក ងួន ស្រ៊ាង អ្នកលក់ផ្កាម្នាក់ទៀត បាននិយាយប្រាប់ថា ក្នុងចំណោមផ្កាដែលលោកដាក់លក់នេះគឺផ្កាអង្គារសីល ស្បែរឿង ក្រូចឃ្វិកជាដើម ហើយផ្កាដែលលោកបានទិញមកលក់នាឆ្នាំនេះគឺចំណាយដើមទុនជិតមួយម៉ឺនដុល្លារដោយផ្កាទាំងអស់នេះខ្លះនាំចូលពីប្រទេសវៀតណាម ថៃ ម៉ាឡេស៊ី និងចិនជាដើម។

បុរសអ្នកលក់ផ្ការូបនេះបានឱ្យដឹងទៀតថា៖ «សម្រាប់ផ្ទះអ្នកធូរធាគេចំណាយខ្លាំងណាស់ទៅលើការទិញផ្កា និងដើមឈើសម្រាប់តាំងលម្អគេហដ្ឋានរបស់គេ ហើយគេហ៊ានចំណាយណាស់ដើម្បីផ្ទះសម្បែងស្អាត និងរស់នៅប្រកបដោយផាសុកភាព»។

សម្រាប់អ្នកលក់ដើមផ្កា នៅតាមបណ្តោយផ្លូវជាតិលេខ6A មួយរូបទៀត គឺ អ្នកស្រី ឡាំង អ៊ី ដែលកំពុងលក់ផ្កាច្រើនប្រភេទនារដូវចូលឆ្នាំចិននេះដែរបានប្រាប់ឱ្យដឹងថា នាឆ្នាំនេះអ្នកស្រីចំណាយដើមទុនជិត១ម៉ឺនដុល្លារ ដោយសង្ឃឹមថានឹងអាចលក់ដាច់ ដូចបណ្តាឆ្នាំមុនៗ សម្រាប់រកប្រាក់កម្រៃ។ តែទោះបីយ៉ាងណាអ្នកស្រីថា ក្នុងឆ្នាំនេះបានលក់ផ្កាយឺតបន្តិចពីព្រោះតាមធម្មតាគេនឹងចេញលក់មុនចូលឆ្នាំចិនយ៉ាងហោចណាស់ជិតមួយខែដែរ តែឆ្នាំនេះអ្នកស្រីទើបទិញផ្កាគ្រប់ប្រភេទ ក្នុងបុណ្យចូលឆ្នាំចិនមកលក់បានមួយសប្តាហ៍មុននេះប៉ុណ្ណោះ។

ស្រ្តីលក់ផ្ការូបនេះបានពន្យល់ប្រាប់ដែរថា សម្រាប់ផ្កាមានតម្លៃចាប់ពី៦ពាន់រៀល រហូតដល់ជាង១០០ដុល្លារក្នុងមួយដើម ហើយផ្កាទាំងនេះអតិថិជនមានទាំងជនជាតិចិន ជនជាតិខ្មែរសែស្រឡាយចិន និងជនជាតិវៀតណាម។អ្នកស្រីអះអាងថា សម្រាប់ជនជាតិចិន គាគច្រើនហ៊ានថ្លៃខ្ពស់ ហើយទិញមិនសូវតថ្លៃទេគឺទិញរហូតដល់រាប់ពាន់ដុល្លារក៏មានដែរ។

ដោយឡែក កញ្ញា ខែម សុបញ្ញា ដែលបានមកទិញផ្កាជាមួយបងប្អូន និងក្រុមគ្រួសារដែរនោះបាននិយាយឱ្យដឹងថា ជារៀងរាល់ឆ្នាំឪពុកម្តាយ និងបងប្អូនរបស់កញ្ញាតែងមកទិញផ្កាដើម្បីទុកតាំងលម្អផ្ទះសម្បែងនារដូវចូលឆ្នាំចិននេះ។កញ្ញាបានបន្ថែមថា ផ្កាទាំងនេះគឺក្រៅពីទិញសម្រាប់សិរីសួស្តីឆ្នាំថ្មីហើយ វាក៏ជាការតាំងលម្អ ដើម្បីភាពស្រស់ស្អាតក្នុងផ្ទះសម្បែងផង។

ជាមួយគ្នានេះដែរ បើតាមលោកបណ្ឌិត ជា មុនីឫទ្ធី  ប្រធានសមាគមអ្នកស្រាវជ្រាវវឌ្ឍនភាពកម្ពុជា-ចិនបានគូសបញ្ជាក់ឱ្យដឹងថា ប្រភេទផ្កា រុក្ខជាតិ និងពណ៌ សុទ្ធសឹងបញ្ជាក់អត្ថន័យរបស់ជនជាតិចិន ហើយតាមរយៈជំនឿនេះដែរ ពួកគាត់តែងទិញសម្រាប់ដាក់ក្នុងផ្ទះសម្បែងដោយជឿជាក់ថានឹងនាំមកនូវសិរីសួស្តី និងជោគវាសនាល្អ ពិសេសពិធីបុណ្យចូលឆ្នាំថ្មីនេះតែម្តង៕

ដោយ៖ ដេប៉ូ និង រិទ្ធី