AKP ភ្នំពេញ ថ្ងៃទី២៨ ខែមករា ឆ្នាំ២០២៥-- មន្ត្រីអង្គការ Fauna & Flora បានឱ្យដឹងនៅថ្ងៃទី២៨ ខែមករា ឆ្នាំ២០២៥ថា ម៉ាស៊ីនថតស្វ័យប្រវត្តិចំនួន១៧៩គ្រឿង និងម៉ាស៊ីកត់ត្រាសំឡេងសត្វទោចចំនួន ៧៤គ្រឿងត្រូវបានដំឡើងដោយជោគជ័យនៅតំបន់គោលដៅសំខាន់ៗនៅទូទាំង ឧទ្យានជាតិវីរៈជ័យ ចាប់ពីថ្ងៃទី០៨ ដល់ថ្ងៃទី២៦ ខែមករា ឆ្នាំ២០២៥ កន្លងមកនេះ។ 

សកម្មភាពនេះត្រូវបានធ្វើឡើងក្រោមកិច្ចសហការរវាងអង្គការសត្វព្រៃ និងរុក្ខជាតិកម្ពុជា ក្រសួងបរិស្ថាន និងមន្ទីរបរិស្ថានខេត្តរតនគិរី ដោយមានការចូលរួមពីមន្រ្តីបច្ចេកទេសនៃក្រសួងបរិស្ថាន អង្គការសត្វព្រៃ និងរុក្ខជាតិ មន្រ្តីឧទ្យានុរក្ស ជនជាតិដើមភាគតិច និងសហគមន៍មូលដ្ឋាន។

ឧទ្យានជាតិវីរៈជ័យ គឺជាតំបន់ការពារធម្មជាតិមួយ ដែលសំបូរទៅដោយធនធានជីវៈចម្រុះ ជាពិសេសពពួកថនិកសត្វកម្រជាច្រើនប្រភេទ។ គោលបំណងសំខាន់នៃសកម្មភាពនៃការដំឡើងនេះគឺដើម្បីសិក្សា និងកត់ត្រាអំពីវត្តមានប្រភេទនិងរបាយសត្វព្រៃ ជាពិសេសពពួកថនិកសត្វ ដែលមានវត្តមានរស់នៅក្នុងឧទ្យានជាតិវីរៈជ័យ។ ទិន្នន័យដែលនឹងប្រមូលបានពីការសិក្សាស្រាវជ្រាវនេះ នឹងត្រូវចែករំលែកជាមួយ ក្រសួងបរិស្ថាន និងប្រើប្រាស់ជាចំណេះដឹង និងព័ត៌មាន ក្នុងការរៀបចំផែនការជាយុទ្ធសាស្រ្ត ក្នុងការពង្រឹងការគ្រប់គ្រង និងអភិរក្សប្រភេទទាំងនោះឱ្យមានប្រសិទ្ធភាព និងគង់វង្ស។  

សកម្មភាពនេះត្រូវបានគាំទ្រថវិកាដោយគម្រោងមូលនិធិតំបន់ទេសភាពជីវៈចម្រុះ BLF តាមរយៈក្រសួងបរិស្ថាន ចំណីអាហារ និងកិច្ចការជនបទនៃរដ្ឋាភិបាលចក្រភពអង់គ្លេស៕

ដោយ ណយ នឿន (ប្រភព៖Fauna & Flora)