AKP ភ្នំពេញ ថ្ងៃទី២៨ ខែមករា ឆ្នាំ២០២៥--ឯកឧត្តម ឧត្តមសេនីយ៍ឯក ថោង សុគន្ធា អគ្គលេខាធិការរងនៃអាជ្ញាធរជាតិប្រយុទ្ធប្រឆាំងគ្រឿងញៀនបានជំរុញឱ្យគ្រប់មជ្ឈដ្ឋាន និងស្នើដល់គ្រប់អង្គភាពចំណុះក្រសួងមហាផ្ទៃទាំងអស់បំផុសការទាញយក និងប្រើប្រាស់ App NoDrug  ដើម្បីចូលរួមប្រយុទ្ធប្រឆាំងបញ្ហាគ្រឿងញៀន។ ការលើកឡើងរបស់ឯកឧត្តម ឧត្តមសេនីយ៍ឯក បែបនេះ ក្នុងកិច្ចប្រជុំផ្សព្វផ្សាយព្រឹត្តិការណ៍ និងគោលការណ៍សំខាន់ៗដោយសង្ខេបប្រចាំសប្តាហ៍របស់អគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន នៅទីស្តីការក្រសួងមហាផ្ទៃ កាលពីថ្ងៃទី២៧ ខែមករា ឆ្នាំ២០២៥ ក្រោមអធិបតីភាព ឯកឧត្តម សន្តិបណ្ឌិត រដ្ឋលេខាធិការប្រចាំការក្រសួងមហាផ្ទៃ និងវត្តមានឯកឧត្តម លោកជំទាវ រដ្ឋលេខាធិការក្រសួងមហាផ្ទៃ និងថ្នាក់ដឹកនាំ មន្រ្តីរាជការគ្រប់អង្គភាពចំណុះក្រសួងមហាផ្ទៃ។ 

ក្នុងឱកាសនោះ ឯកឧត្ដម ឧត្តមសេនីយ៍ឯក ថោង សុគន្ធា អគ្គលេខាធិការរងអាជ្ញាធរជាតិប្រយុទ្ធប្រឆាំងគ្រឿងញៀនបានថ្លៃងអំណរគុណដល់ថ្នាក់ដឹកនាំក្រសួងមហាផ្ទៃ ដែលបានអនុញ្ញាតឱ្យអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀនបានផ្ដល់នូវធាតុចូលក្នុងកិច្ចប្រជុំប្រចាំសប្តាហ៍ ដើម្បីបានបង្ហាញពីការងារប្រយុទ្ធប្រឆាំងគ្រឿងញៀន។ 

ឯកឧត្ដម ឧត្តមសេនីយ៍ឯកបានលើកយកមកបង្ហាញជូនពីស្ថានភាពគ្រឿងញៀន និងលទ្ធផលឆ្នាំ២០២៤ ដោយបានរំលេចអំពីគោលការណ៍ និងព្រឹត្តិការណ៍ថ្មីៗ ដែលក្នុងនោះ គឺការសម្របសម្រួល និងជំរុញការអនុវត្តគោលការណ៍សម្អាតផ្ទះយើង ជំរុញចលនាប្រយុទ្ធប្រឆាំងគ្រឿងញៀនជាចលនាជាតិដែលមានការចូលរួមពីគ្រប់មជ្ឈដ្ឋាននៃសង្គម បំផុស និងជំរុញឱ្យប្រជាពលរដ្ឋទាញយក និងប្រើប្រាស់កម្មវិធីទូរស័ព្ទដៃ NoDrug។ ឯកឧត្ដម ឧត្ដមសេនីយ៍ឯកបានជម្រាបជូនផងដែរអំពីការបង្រ្កាបករណីប្រើប្រាស់ទ្រង់ទ្រាយធំ តាមរយៈការរាយការណ៍របស់ប្រជាពលរដ្ឋតាមរយៈ App NoDrug នៅខេត្តបន្ទាយមានជ័យ ការបង្រ្កាបបទល្មើសគ្រឿងញៀនធំៗ នៅខេត្ដកោះកុង និងខេត្តបាត់ដំបង ផ្សព្វផ្សាយពីលទ្ធផលនៃកិច្ចប្រជុំគណៈរដ្ឋមន្ត្រី ចំណុចការរៀបចំច្បាប់ស្តីពីការចាត់ចែងជាបណ្ដោះអាសន្ននូវវត្ថុដែលចាប់យក។

ជាមួយគ្នានេះ ឯកឧត្ដម ឧត្តមសេនីយ៍ឯក ថោង សុគន្ធា បានសំណូមពរឱ្យគ្រប់អង្គភាពចំណុះក្រសួងមហាផ្ទៃទាំងអស់បំផុសការទាញយក និងប្រើប្រាស់ App NoDrug  ហើយអគ្គលេខាធិការដ្ឋាននៃអាជ្ញាធរជាតិប្រយុទ្ធប្រឆាំងគ្រឿងញៀន នឹងបន្តបំផុសឱ្យគ្រប់មជ្ឈដ្ឋានទាំងអស់ជំរុញការទាញយក និងប្រើប្រាស់ App NoDrug បន្តអនុវត្តន៍តាមយុទ្ធសាស្ត្រ និងវិធានការយុទ្ធសាស្ត្រដែលបានដាក់ចេញ ការពង្រឹងយន្តការថ្នាក់ក្រោមជាតិ បន្តសម្របសម្រួល និងជំរុញការអនុវត្តបទបញ្ជាលេខ ០១ បប សម្អាតផ្ទះយើងនិងយកចកចេញពីបឹង៕

ដោយ៖ រិទ្ធី ប្រភព៖ អាជ្ញាធរជាតិប្រយុទ្ធប្រឆាំងគ្រឿងញៀន