AKP កំពង់ឆ្នាំង ថ្ងៃទី២៨ ខែមករា ឆ្នាំ២០២៥-- ឯកឧត្តម នាយឧត្តមសេនីយ៍ ម៉ៅ សុផាន់ អគ្គមេបញ្ជាការរងនៃកងយោធពលខេមរភូមិន្ទ បានអញ្ជើញបើកកិច្ចប្រជុំពិភាក្សា កំណត់តំបន់ការពារ ទប់ស្កាត់ និង គ្រប់គ្រងតំបន់បឹងទន្លេសាប នៅសាលប្រជុំសាលាខេត្តកំពង់ឆ្នាំង កាលពីថ្ងៃ២៧ ខែមករា ឆ្នាំ២០២៥ ដោយមានការអញ្ជើញចូលរួមពី ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង ឯកឧត្ដមព្រះរាជអាជ្ញាអមសាលាដំបូងខេត្ត លោក លោកស្រី អភិបាលរងខេត្ត ប្រធានមន្ទីរអង្គភាពជុំវិញខេត្ត កងកម្លាំងប្រដាប់អាវុធទាំង៣ប្រភេទ ក្រុមការងារ អជ្ញាធរបឹងទន្លេសាប អភិបាលក្រុង-ស្រុក និងមេឃុំ ចៅសង្កាត់ផងដែរ។

ក្នុងឱកាសនោះ ឯកឧត្តម នាយឧត្តមសេនីយ៍ ម៉ៅ សុផាន់ បានមានប្រសាសន៍ថា ប្រទេសជាតិមានការរីកចម្រើនលើគ្រប់វិស័យ ក្រោមការដឹកនាំរបស់សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងនោះវិស័យជលផល ដែលសម្រេចបានរួមមានកំណើនផលនេសាទ និងផលវារីវប្បកម្ម កំណើនចំនួនផ្សោតទន្លេមេគង្គ វត្តមាន និងកំណើនចំនួននៃប្រភេទវារីសត្វកម្រ ដូចជាជ្រូកទឹក និងផ្សោតឃ្លៀច លទ្ធផលនៃការបង្ក្រាបបទល្មើស និងការត្រួតពិនិត្យគុណភាព និងសុវត្ថិភាពផល ផលិតផលជលផលដែលទទួលបានលទ្ធផលល្អប្រសើរ។

ទន្ទឹមនឹងនេះ ឯកឧត្តមបានបន្តថា ក្រោយពីការវាស់វែងកាត់ឆ្វៀលតំបន់១ តំបន់២ និងតំបន់៣ របស់ក្រុមការងារបច្ចេកទេស អាជ្ញាធរបឹងទន្លេសាប ស្ថាប័នមន្ទីរជំនាញពាក់ពន្ធ័ ថ្នាក់ដឹកនាំខេត្ត អាជ្ញាធរមូលដ្ឋានពាក់ព័ន្ធ ក្នុងការចូលរួមការពារ ថែរក្សាធនធានធម្មជាតិ និងបរិស្ថាននៃតំបន់បឹងទន្លេសាប។ ការងារអចិន្ដ្រៃយ៍ត្រូវថែរក្សាគ្រប់គ្រងឱ្យបានល្អ ដោយអាជ្ញាធរទន្លេសាប ត្រូវពង្រឹងយន្ដការគ្រប់គ្រង ដើម្បីធានាដល់ការដឹកនាំសម្របសម្រួលគ្រប់គ្រង ដែលមានស្ថាប័ន អាជ្ញាធរពាក់ព័ន្ធ និងរដ្ឋបាលខេត្តចំនួន៦ ដែលជាប់បឹងទន្លេសាបតែម្ដង។

ជាមួយគ្នានេះដែរ ឯកឧត្តមបានណែនាំដល់មន្ត្រីជំនាញត្រូវធ្វើការផ្សព្វផ្សាយឱ្យបានទូលំទូលាយ ដល់ប្រជាពលរដ្ឋនៅមូលដ្ឋានអំពីកន្លែងការពារ និងអភិរក្សជលផល និងបញ្ញត្តិពាក់ព័ន្ធនៃច្បាប់ជលផល  ពង្រឹងការអនុវត្តច្បាប់ជលផលឱ្យបានម៉ឺងម៉ាត់ប្រកបដោយស្មារតីទទួលខុសត្រូវ និងប្រើប្រាស់កម្លាំង និងធនធានមនុស្សឱ្យអស់លទ្ធភាពក្នុងការអនុវត្តការងារឱ្យបានជោគជ័យថែមទៀត។

ឯកឧត្តមនាយឧត្តមសេនីយ៍បានបញ្ជាក់ពីការទទួលខុសត្រូវក្នុងការចូលរួមអនុវត្តទប់ស្កាត់  និងការការពារតំបន់ព្រៃលិចទឹក ធនធានជលផល ជីវៈចម្រុះ និងប្រព័ន្ធអេកូឡូស៊ី ក្នុងដែនសមត្ថកិច្ច។ ជំរុញឱ្យក្រុមការងារថែទាំ និងមន្ទីរកសិកម្ម រុក្ខាប្រមាញ់ និងនេសាទ ត្រូវសហការជាមួយរដ្ឋបាលស្រុក ត្រួតពិនិត្យតាមដានលើការខូចខាត និងដាំដុះឡើងវិញ រួមទាំងរក្សាពូជដែលនៅសល់ដូចជាឫស្សីស្រុក ឫស្សីពីងពង់ ឫស្សីផ្អែម ដើមរាំងទឹក រំដេញ និងដើមសណ្ដាន់ ធ្វើការផ្សព្វផ្សាយដល់ប្រជាពលរដ្ឋនៅក្នុងមូលដ្ឋានជាក់ស្តែង ឱ្យជួយថែទាំរហូតដល់មានការលូតលាស់ល្អនិងទប់ស្កាត់បទល្មើសនេសាទជាប្រចាំឱ្យបានប្រសិទ្ធភាព និងប្រសិទ្ធផលខ្ពស់នៅឆ្នាំ២០២៥ និងឆ្នាំខាងមុខបន្ថែមទៀត៕

ដោយ បៃ ស៊ីថុន