AKP ភ្នំពេញ ថ្ងៃទី២៨ ខែមករា ឆ្នាំ២០២៥-- ក្នុងឱកាសដឹកនាំកិច្ចប្រជុំឆ្លងរបាយការណ៍សន្និបាតស្ដីពីអនុវិស័យការអភិវឌ្ឍអប់រំកាយ និងកីឡា ការអប់រំក្រៅប្រព័ន្ធ និងការអប់រំកុមារតូច កាលពីថ្ងៃទី២៧ ខែមករា ឆ្នាំ២០២៥ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា មានប្រសាសន៍ថា សម្រាប់អនុវិស័យការអភិវឌ្ឍអប់រំកាយ និងកីឡា ក្រសួងអប់រំ យុវជន និងកីឡា ទទួលបន្ទុកផ្នែករៀបចំគោលនយោបាយលើកកម្ពស់ការអប់រំកាយ និងកីឡា ការបណ្ដុះបណ្ដាល និងលើកទឹកចិត្តកីឡាករ ព្រមទាំងបំផុសសកម្មភាពហាត់ប្រាណ និងលេងកីឡាក្នុងចំណោមសិស្សានុសិស្ស យុវជន និងប្រជាពលរដ្ឋទូទៅ ក៏ដូចជាបង្កលក្ខណៈឱ្យមានការចូលរួមប្រកួតប្រជែងថ្នាក់ជាតិ និងអន្តរជាតិ ក្នុងគោលដៅរួមចំណែកអភិវឌ្ឍន៍មូលធនមនុស្សប្រកបដោយគុណភាព និងសុខភាពល្អ ដោយយើងបានប្រឹងប្រែងស្របតាមពាក្យស្លោក “យុវជនម្នាក់ចេះលេងកីឡាមួយប្រភេទយ៉ាងតិចប្រចាំជីវិត”។

ដើម្បីលើកកម្ពស់ប្រសិទ្ធភាព និងប្រសិទ្ធផលការងារ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានជំរុញលើកទឹកចិត្តដល់ក្រុមការងារនាយកដ្ឋានសាមីឱ្យបន្តផ្តល់ធាតុចូលឱ្យបានផុសផុល ចងក្រងជារបាយការណ៍ផ្អែកលើការវិភាគទិន្នន័យស៊ីជម្រៅប្រកបដោយចក្ខុវិស័យវែងឆ្ងាយ ដោយផ្សារភ្ជាប់ជាមួយនឹងការពន្យល់ឱ្យឆ្លើយតបទៅនឹងសូចនាករកិច្ចព្រមព្រៀងសមិទ្ធកម្ម សម្រាប់ត្រៀមដាក់បង្ហាញក្នុងសន្និបាតអប់រំ យុវជន និងកីឡា ដែលនឹងប្រព្រឹត្តទៅក្នុងខែកុម្ភៈ ឆ្នាំ២០២៥ ខាងមុខ។

គួរបញ្ជាក់ដែរថា ការរៀបចំរបាយការណ៍សន្និបាតអប់រំនេះឡើងគឺដើម្បីឆ្លុះបញ្ចាំងអំពីវឌ្ឍនភាព បញ្ហាប្រឈម អនុសាសន៍រួម ព្រមទាំងសកម្មភាពឆ្ពោះទៅមុខរបស់ក្រសួង និងអនុវិស័យទាំង៧ រួមមាន ការអប់រំកុមារតូច ការអប់រំបឋមសិក្សា ការអប់រំមធ្យមសិក្សា និងអប់រំបច្ចេកទេស ការអប់រំឧត្ដមសិក្សា ការអប់រំក្រៅប្រព័ន្ធ ការអភិវឌ្ឍយុវជន និងការអប់រំកាយ និងកីឡា ហើយចំពោះលទ្ធផលសន្និបាតអប់រំនឹងក្លាយជាមូលដ្ឋានដ៏មានសារៈសំខាន់ក្នុងការរៀបចំផែនការយុទ្ធសាស្ត្រថវិកា និងផែនការប្រតិបត្តិប្រចាំឆ្នាំ ព្រមទាំងដើម្បីសម្រេចបានតាមគោលដៅនៃគោលនយោបាយក្រសួងអប់រំ យុវជន និងកីឡា និងដើម្បីបណ្ដុះនូវធនធានមនុស្សប្រកបដោយគុណភាពក្នុងពេលអនាគត៕

ដោយ៖ ចាន់ សុភឿន (ប្រភព៖ ក្រសួងអប់រំ)