AKP បន្ទាយមានជ័យ ថ្ងៃទី២៧ ខែមករា ឆ្នាំ២០២៥--

អាជ្ញាធរខេត្តបន្ទាយមានជ័យបានចែកវិញ្ញាបនបត្រសម្គាល់ម្ចាស់អចលនវត្ថុលើការចុះបញ្ជីដីធ្លីមានលក្ខណៈជាប្រព័ន្ធ សរុបចំនួន ២២០៥បណ្ណជូនប្រជាពលរដ្ឋចំនួន០២ភូមិ គឺភូមិ២ និងភូមិតារាងបាល់ សង្កាត់កំពង់ស្វាយ ក្រុងសិរីសោភ័ណ ដោយពិធីនេះបានធ្វើឡើងស្ថិតនៅបរិវេណវត្តមុន្នីសោភ័ណ្ឌស្វាយថ្មី ក្រោម វត្តមានលោក ហ៊ឹល រ៉ាយា អភិបាលរងខេត្ត ដោយមានការចូលរួមពីមន្រ្តីអ្នកមុខអ្នកការ និងប្រជាពលរដ្ឋជាច្រើននាក់ នាព្រឹកថ្ងៃចន្ទ ថ្ងៃទី២៧ ខែមករា ឆ្នាំ២០២៥។

ក្នុងឱកាសនោះ លោក ហ៊ឹល រ៉ាយា អភិបាលរងខេត្តបន្ទាយមានជ័យ បានមានប្រសាសន៍ថា ប្រជាពលរដ្ឋក៏ដូចជាអាជ្ញាធរភូមិ-ឃុំទាំងអស់ទូទាំងប្រទេសសូមថ្លែងអំណរគុណ និងដឹងគុណយ៉ាងជ្រាលជ្រៅចំពោះសម្ដេចតេជោ ហ៊ុន សែន អតីតនាយករដ្ឋមន្ត្រី ដែលបានដាក់ចេញនូវគោលនយោបាយលើវិស័យដីធ្លីផ្ដល់បណ្ណកម្មសិទ្ធស្របច្បាប់ជូនប្រជាពលរដ្ឋប្រើប្រាស់ និងអាស្រ័យផល ធ្វើឱ្យប្រជាពលរដ្ឋយើងមានបណ្ណកម្មសិទ្ធិលើដីធ្លីស្របច្បាប់ និងបានបង្កបង្កើនផលដោះស្រាយជីវភាពគ្រប់ក្រុមគ្រួសារ គ្រប់មូលដ្ឋាន និងអាចយកទៅប្រើប្រាស់ផ្សេងៗទៅតាមតម្រូវការរបស់បងប្អូនពុំមានការបារម្ភទៀតនោះឡើយ។

ទន្ទឹមនឹងនេះ លោកអភិបាលរងបានថ្លែងអំណរគុណដល់ក្រុមការងារចុះវាស់វែង ដែលបានខិតខំប្រឹងប្រែងយកអស់នូវកម្លាំងកាយចិត្តក្នុងការបំពេញភារកិច្ចជូនប្រជាពលរដ្ឋប្រកបដោយស្មារតីទទួលខុសត្រូវ និងមានតម្លាភាព ដោយបានបញ្ជាក់ថា សមិទ្ធផលទាំងអស់នេះ យើងទាំងអស់គ្នាត្រូវតែដឹងគុណនូវគំនិតផ្ដួចផ្ដើមដ៏ល្អឧត្តុងឧត្តមរបស់សម្ដេចតេជោ ហ៊ុន សែន អតីតនាយករដ្ឋមន្ត្រី ដែលសម្ដេចជាអ្នកដឹកនាំដ៏ឆ្នើម និងឈ្លាសវៃ ដោយបានដាក់ចេញនូវគោលនយោបាយស្តីពីដីសម្បទានសង្គមកិច្ច និងគោលនយោបាយដីធ្លី ព្រមទាំងលិខិតបទដ្ឋានគតិយុត្ត ដែលពាក់ព័ន្ធនឹងដីធ្លី និងបន្តរហូតក្រោមការដឹកនាំរបស់សម្ដេចធិបតី ហ៊ុន ម៉ាណែត នាយករដ្ឋមន្ត្រី ដើម្បីរក្សាការពារ និងអភិវឌ្ឍដីធ្លីប្រកបដោយសមធម៌ បរិយាបន្ន ព្រមទាំងធនធានធម្មជាតិ និងចេរភាពសម្រាប់ការអភិវឌ្ឍសេដ្ឋកិច្ចសង្គមដល់ប្រជាពលរដ្ឋ។

លោក មាស ដារ៉ា ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដី បញ្ជាក់ថាបច្ចុប្បន្ននេះមន្ត្រីជំនាញវាស់វាងដីធ្លីបាន និងកំពុងបន្តការយកចិត្តទុកដាក់អនុវត្តតាមផែនការនិងទិសដៅដែលដាក់ចេញដោយរដ្ឋបាលខេត្ត និងក្រសួងដើម្បីឆ្លើយតបទៅនឹងស្ថានភាពសេដ្ឋកិច្ច និងនយោបាយបច្ចុប្បន្ន ដោយអនុវត្តតាមគោលការណ៍រៀបចំវិធានគោលនយោបាយគន្លឹះ៣ចំណុចរបស់ក្រសួង រួមមាន ការចុះបញ្ជី បង្ហើយបរិយាកាសគ្មានវិវាទ និងសេវាគាប់ចិត្តនោះ៕

ដោយ ឈុន សារ៉ាត