AKP កំពង់ធំ ថ្ងៃទី២៧ ខែមករា ឆ្នាំ២០២៥--

ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ នាព្រឹកថ្ងៃទី២៧ ខែមករា ឆ្នាំ២០២៥ បានដឹកនាំកិច្ចប្រជុំផ្សព្វផ្សាយសភាពការណ៍ថ្មីៗ និងប្រគល់ភារកិច្ចចាំបាច់មួយចំនួនជូនដល់កងកម្លាំងចំណុះទីបញ្ជាការតំបន់ប្រតិបត្តិការសឹករង ដែលប្រព្រឹត្តទៅនៅទីបញ្ជាការតំបន់ប្រតិបត្តិការសឹករងកំពង់ធំ។ ឧត្តមសេនីយ៍ទោ សោម ស៊ុន បានគូសបញ្ជាក់អំពីសភាពការណ៍ជាតិ សភាពការណ៍អន្តរជាតិ និងការអភិវឌ្ឍរីកចម្រើនថ្មីៗបន្ថែមទៀតរបស់ព្រះរាជាណាចក្រកម្ពុជា ក្នុងអាណត្តិទី៧នៃរាជរដ្ឋាភិបាលថ្មី ដែលដឹកនាំដោយសម្ដេចធិបតី ហ៊ុន ម៉ាណែត កំពុងដំណើរការបោះជំហានយ៉ាងស្វាហាប់ឆ្ពោះទៅមុខ ដោយមានការគាំទ្រយ៉ាងពេញទំហឹងពីប្រជាជនកម្ពុជា និងកំពុងទទួលបានជោគជ័យថ្មីៗនៅលើឆាកអន្តរជាតិ។

ឧត្តមសេនីយ៍ទោ សោម ស៊ុន បានកោតសរសើរចំពោះមេបញ្ជាការគ្រប់បណ្ដាកងឯកភាព នាយការិយាល័យ ផ្នែកជំនាញគ្រប់ស្ថាប័ន ព្រមទាំងថ្នាក់ដឹកនាំគ្រប់លំដាប់ថ្នាក់ នាយទាហាន នាយទាហានរង និងពលទាហានទាំងអស់ ចំណុះបញ្ជាការដ្ឋានតំបន់ប្រតិបត្តិការសឹករងកំពង់ធំ ដែលបានខិតខំប្រឹងប្រែងបំពេញភារកិច្ចសម្រេចបាន តាមផែនការដែលថ្នាក់លើបានប្រគល់ជូន គួរជាទីមោទនៈ។

ទន្ទឹមនឹងនេះ ឧត្តមសេនីយ៍ទោ សោម ស៊ុន បានដាក់បទបញ្ជាដល់កងកម្លាំងនៃបញ្ជាការដ្ឋានតំបន់ប្រតិបត្តិការសឹករងកំពង់ធំទាំងអស់ត្រូវអនុវត្តនូវភារកិច្ចចាំបាច់មួយចំនួនគឺ៖ ទី១. បន្តរៀបចំកងកម្លាំង និងមធ្យោបាយគ្រប់គ្រាន់ ដើម្បីចូលរួមក្នុងសកម្មភាពបង្ក្រាបបទល្មើសនេសាទខុសច្បាប់នៅតំបន់បឹងទន្លេសាបឱ្យមានប្រសិទ្ធភាព។ ទី២. បន្តសកម្មភាពក្នុងការការពារទប់ស្កាត់ និងបង្ក្រាបបទល្មើសធនធានធម្មជាតិឱ្យបាន ដោយត្រូវការពារមិនឱ្យមានការកាប់ទន្ទ្រានដីព្រៃរបស់រដ្ឋយកធ្វើជាកម្មសិទ្ធិកើតឡើងជាថ្មីទៀតបានជាដាច់ខាត និងការពារឱ្យបានផ្ទៃដីដែលបានដកហូតកន្លងមក មិនឱ្យធ្លាក់ដល់ដៃជនល្មើសបានឡើយ និងទី៣. បន្តអប់រំពង្រឹងតួនាទីភារកិច្ចរបស់កងយោធពលខេមរភូមិន្ទ ជូនដល់នាយទាហាន នាយទាហានរង និងពលទាហាន ដោយត្រូវគោរពឱ្យបានម៉ឺងម៉ាត់តាមបទបញ្ជារបស់ថ្នាក់ដឹកនាំគ្រប់លំដាប់ថ្នាក់នៃកងយោធពលខេមរភូមិន្ទ។ ដាច់ខាតការពារជាតិ សាសនា ព្រះមហាក្សត្រ ការពាររាជរដ្ឋាភិបាលស្របច្បាប់ និងថែរក្សាឱ្យបាននូវសុខសន្តិភាព ដើម្បីឱ្យប្រទេសជាតិយើងបន្តការអភិវឌ្ឍរីកចម្រើនបន្ថែមទៀត ក្រោមការដឹកនាំរបស់សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា៕

ដោយ ស៊ុម វណ្ណា (ប្រភព៖ តំបន់សឹករងកំពង់ធំ)