AKP កំពង់ធំ ថ្ងៃទី២៧ ខែមករា ឆ្នាំ២០២៥ -- ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម និងជាប្រធានក្រុមការងារចុះមូលដ្ឋានស្រុកស្ទោង និងសហការី ព្រមទាំងអាជ្ញាធរស្រុកស្ទោង អញ្ជើញចុះអន្តរាគមន៍បូមទឹកសង្គ្រោះស្រូវប្រាំងរបស់ប្រជាកសិករ ដែលកំពុងខ្វះខាតទឹកស្រោចស្រពប្រមាណជិត៤០០ហិកតា ស្ថិតក្នុងឃុំបន្ទាយស្ទោង ស្រុកស្ទោង ខេត្តកំពង់ធំ នាព្រឹកថ្ងៃទី២៧ ខែមករា ឆ្នាំ២០២៥។

ឯកឧត្តម ថោ ជេដ្ឋា បានបញ្ជាក់ថា ការចុះអន្តរាគមន៍បូមទឹកសង្គ្រោះស្រូវប្រាំងក្នុងឃុំបន្ទាយស្ទោង នៅពេលនេះគឺជាការយកចិត្តទុកដាក់ខ្ពស់របស់ប្រមុខរាជរដ្ឋាភិបាលដែលមានសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងក្នុងនាមឯកឧត្តមផ្ទាល់ដែលជាប្រធានក្រុមការងារចុះមូលដ្ឋានស្រុកស្ទោង ពិតជាមិនទុកឱ្យស្រូវរបស់ប្រជាកសិករណាម្នាក់គ្មានទឹកស្រោចស្រពឡើយគឺក្រុមការងារ និងអាជ្ញាធរពាក់ព័ន្ធត្រូវខិតខំឱ្យអស់ពីលទ្ធភាព មិនថាយប់ថ្ងៃ ក្នុងការបូមសង្គ្រោះស្រែស្រូវកសិករឱ្យបានគ្រប់គ្នា និងទាន់ពេលវេលាដែលអាចជួយបង្កើនទិន្នផលស្រូវកសិករឱ្យបានផលច្រើនថែមទៀត។

ក្នុងឱកាសនោះឯកឧត្តមរដ្ឋមន្ត្រីបានជំរុញដល់អាជ្ញាធរភូមិ ឃុំ ត្រូវធ្វើការតាមដានយកចិត្តទុកដាក់និងរាយការណ៍ជាប្រចាំ។ រាល់សំណើ សំណូមពរ និងបញ្ហាការខ្វះខាតទឹកស្រោចស្រពស្រែស្រូវកសិករនៅក្នុងមូលដ្ឋានរបស់ខ្លួនដល់ក្រុមការងារដើម្បីបានជួយអន្តរាគមន៍សង្គ្រោះពួកគាត់បានទាន់ពេលវេលា។

សូមបញ្ជាក់ថា ការចុះបូមទឹកសង្គ្រោះស្រូវប្រាំងក្នុងឃុំបន្ទាយស្ទោងនេះមានចំនួន៣៨៥ហិកតា ដែលសរុបប្រជាពលរដ្ឋចំនួន៥០១គ្រួសារក្នុងភូមិចំនួន១០ដែលបានចាប់ផ្ដើមតាំងពីថ្ងៃទី១៩ខែមករា ឆ្នាំ២០២៥មក៕

ដោយ ស៊ុម វណ្ណា