AKP ភ្នំពេញ ថ្ងៃទី២៧ ខែមករា ឆ្នាំ២០២៥ -- ឯកឧត្តមទេសរដ្ឋមន្រ្តី លី ធុជ អនុប្រធានទី១ អាជ្ញាធរមីន បានបញ្ជាក់ថា អាជ្ញាធរមីននឹងបន្តគាំទ្រដល់កម្មវិធីរបស់មជ្ឈមណ្ឌល ARMAC ដើម្បីផ្តល់កិច្ចសហប្រតិបត្តិការធ្វើជាដៃគូដ៏ល្អក្នុងវិស័យសកម្មភាពមីនទាំងថ្នាក់តំបន់ និងពិភពលោក។ ឯកឧត្តមទេសរដ្ឋមន្ត្រីបានបញ្ជាក់បែបនេះក្នុងជំនួបពិភាក្សាការងារជាមួយ លោកស្រី ប៊ុត រតនា នាយិកាប្រតិបត្តិនៃមជ្ឈមណ្ឌលតំបន់អាស៊ានសម្រាប់សកម្មភាពមីន (ARMAC) ស្តីពីភាពជាដៃគូ និងកិច្ចសហប្រតិបត្តិការសកម្មភាពមីន នាថ្ងៃទី២៧ ខែមករា ឆ្នាំ២០២៥ នៅទីស្នាក់ការអាជ្ញាធរមីនកម្ពុជា។

លោកស្រី ប៊ុត រតនា បានថ្លែងអំណរគុណចំពោះរាជរដ្ឋាភិបាលកម្ពុជា តាមរយៈអាជ្ញាធរមីន ក្នុងការសម្រេចបាននូវសមិទ្ធផលសកម្មភាពមីននាពេលកន្លងមក និងចំពោះអាជ្ញាធរមីន ដែលតែងតែផ្តល់ការគាំទ្រ និងកិច្ចសហប្រតិបត្តិការដល់ ARMAC  និងបានស្នើសុំឱ្យអាជ្ញាធរមីនបន្តគាំទ្រដល់កិច្ចខិតខំប្រឹងប្រែងរបស់ARMAC។

តំណាងសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី និងជាប្រធានអាជ្ញាធរមីន ឯកឧត្តមបណ្ឌិត លី ធុជ បានទទួលស្គាល់ និងអរគុណចំពោះសមិទ្ធផលសម្រេចបានរបស់មជ្ឈមណ្ឌល ARMAC រយៈពេលជាង០៨ឆ្នាំមកនេះ ចាប់តាំងពីការបង្កើតឡើងជាផ្លូវការក្នុងឆ្នាំ២០១៦ ក្រោមគំនិតផ្តួចផ្តើមរបស់សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្រ្តី កាលពីឆ្នាំ២០១២ ខណៈកម្ពុជាធ្វើជាប្រធានអាស៊ាន។ គំនិតផ្តួចផ្តើមរបស់សម្តេចតេជោ ត្រូវបានទទួលការអបអរសាទរ និងគាំទ្រពីបណ្តាប្រមុខរដ្ឋ និងប្រមុខរដ្ឋាភិបាលនៃប្រទេសអាស៊ានទាំងអស់។

ទន្ទឹមនឹងនេះ ឯកឧត្តមទេសរដ្ឋមន្រ្តី លី ធុជ បានអរគុណចំពោះតួនាទី និងភារកិច្ចរបស់មជ្ឈមណ្ឌល ARMAC ដែលធ្វើជាយន្តការដ៏សំខាន់ ក្នុងការដឹកនាំ និងសម្របសម្រួលធ្វើឱ្យតំបន់អាស៊ានធ្វើការកាន់តែជិតស្និទ្ធរវាងរដ្ឋសមាជិកអាស៊ានសម្រាប់វិស័យសកម្មភាពមីន ក្នុងនោះកម្ពុជាក៏បានរួមចំណែកចែករំលែកបទពិសោធន៍សកម្មភាពមីនសម្រាប់ថ្នាក់តំបន់ និងពិភពលោក តាមរយៈយន្តការរបស់ ARMAC នេះផងដែរ។ អាជ្ញាធរមីននឹងបន្តធ្វើជាដៃគូយ៉ាងរឹងមាំក្នុងការគាំទ្រដល់កម្មវិធីរបស់មជ្ឈមណ្ឌល ARMAC ដើម្បីឱ្យ ARMAC អាចបន្តផ្តល់នូវកិច្ចសហប្រតិបត្តិការ និងភាពជាដៃគូសម្រាប់វិស័យសកម្មភាពមីនទាំងថ្នាក់តំបន់ និងពិភពលោក។

ឯកឧត្តមទេសរដ្ឋមន្រ្តីបានគូសបញ្ជាក់ទៀតថា ជាមួយនឹងសមិទ្ធផលសម្រេចបាន និងការកសាងទំនាក់ទំនងល្អជាមួយគ្រប់ភាគីពាក់ព័ន្ធ នាពេលកន្លង បច្ចុប្បន្ននេះវិស័យសកម្មភាពមីននៅកម្ពុជា ត្រូវបានប្រមុខរាជរដ្ឋាភិបាលកម្ពុជាទទួលស្គាល់ និងវាយតម្លៃខ្ពស់ថា វិស័យសកម្មភាពមីន បាន និងកំពុងរួមចំណែកយ៉ាងសំខាន់ផងដែរ ក្នុងការលើកកម្ពស់ និងកសាងនូវទំនាក់ទំនងអន្តរជាតិ និងការបរទេសរវាងប្រទេសកម្ពុជា ជាមួយបណ្តាប្រទេសនានា ទាំងក្នុងតំបន់ និងពិភពលោក។

ជាមួយគ្នានេះដែរ ឯកឧត្តមបានបន្ថែមទៀតថា សម្រាប់ឆ្នាំ២០២៥ អាជ្ញាធរមីនបានដាក់នូវផែនការអាទិភាពរបស់ខ្លួន រួមមានការបោសសម្អាតមីន ការអប់រំកាត់បន្ថយគ្រោះថ្នាក់ដោយសារមីន បន្តកិច្ចសន្ទនាជាមួយបណ្តាប្រទេសជាមិត្ត និងដៃគូ ចែករំលែកបទពិសោធន៍សកម្មភាពមីន និងការកៀរគរធនធានគាំទ្រដល់វិស័យសកម្មភាពមីននៅកម្ពុជា៕

ដោយ សួស សំរិត