AKP ភ្នំពេញ ថ្ងៃទី២៧ ខែមករា ឆ្នាំ២០២៥-- ឯកឧត្តម ឧត្តមសេនីយ៍ទោ សែម រតនា អនុប្រធានទី១ គណៈកម្មាធិការជាតិ និងជាអគ្គនាយកស្តីទីមជ្ឈមណ្ឌលជាតិរក្សាសន្តិភាព បានអញ្ជើញដឹកនាំប្រតិភូមជ្ឈមណ្ឌលជាតិរក្សាសន្តិភាពចូលជួបសម្តែងការគួរសម នាព្រឹកថ្ងៃទី២៧ ខែមករា ឆ្នាំ២០២៥ ជាមួយលោកវរសេនីយ៍ឯកពិសេស SHENG DAZHI នាយការិយាល័យអនុព័ន្ធយោធាសាធារណរដ្ឋប្រជាមានិតចិន និងជូនពរក្នុងឱកាសបុណ្យចូលឆ្នាំថ្មីប្រពៃណីចិនដែលនឹងចូលមកដល់នាពេលខាងមុខ។

ក្នុងឱកាសនេះភាគីទាំងពីរបានវាយតម្លៃខ្ពស់ចំពោះទំនាក់ទំនង និងកិច្ចសហប្រតិបត្តិការលើគ្រប់វិស័យ រវាងព្រះរាជាណាចក្រកម្ពុជា និងសាធារណរដ្ឋប្រជាមានិតចិន ដែលបានរីកចម្រើនកាន់តែខ្លាំងក្លាពីមួយឆ្នាំទៅមួយឆ្នាំ ពីដៃគូយុទ្ធសាស្ត្រ ទៅជាដៃគូយុទ្ធសាស្ត្រគ្រប់ជ្រុងជ្រោយ  និងជាមិត្តភាពដែកថែបថែមទៀតផង ហើយតាមរយៈទំនាក់ទំនងការទូតដ៏ល្អនេះចិនបានផ្តល់ជំនួយឥតសំណងជាច្រើនមកកាន់កម្ពុជាដើម្បីធ្វើការអភិវឌ្ឍនូវហេដ្ឋារចនាសម្ព័ន្ធជាច្រើនសម្រាប់បម្រើដល់ការលូតលាស់ខាងផ្នែកសេដ្ឋកិច្ចរបស់កម្ពុជា ដោយក្នុងរយៈប៉ុន្មានឆ្នាំចុងក្រោយនេះការពូនជ្រំទំនាក់ទំនងមិត្តភាពយូរអង្វែងកម្ពុជា-ចិន មានការរីកចម្រើនឥតឈប់ឈរ។

ក្នុងឱកាសនៃពិធីបុណ្យចូលឆ្នាំថ្មីប្រពៃណីចិនដែលនឹងចូលមកដល់នាពេលដ៏ខ្លីខាងមុខនេះ ឯកឧត្តម ឧត្តមសេនីយ៍ទោ សែម រតនា បានគោរពជូនពរដល់ថ្នាក់ដឹកនាំ និងប្រជាជនចិន រួមទាំងលោកវរសេនីយ៍ឯកពិសេស SHENG DAZHI នាយការិយាល័យអនុព័ន្ធយោធាសាធារណរដ្ឋប្រជាមានិតចិន ប្រចាំនៅព្រះរាជាណាចក្រកម្ពុជា ក្រុមគ្រួសារ និងសហការី សូមជួបប្រទះតែនូវក្តីសុខ សេចក្តីចម្រើនរុងរឿងតរៀងទៅ។

ជាការឆ្លើយតប លោកវរសេនីយ៍ឯកពិសេស SHENG DAZHI បានថ្លែងអំណរគុណចំពោះឯកឧត្តម ឧត្តមសេនីយ៍ទោ សែម រតនា អនុប្រធានទី១ គណៈកម្មាធិការជាតិ និងជាអគ្គនាយកស្តីទីមជ្ឈមណ្ឌលជាតិរក្សាសន្តិភាព និងសហការី ដែលបានឆ្លៀតឱកាសដ៏មមាញឹកមកជូនពរ លោក និងសហការី ក្នុងឱកាសបុណ្យចូលឆ្នាំថ្មីប្រពៃណីចិននាពេលនេះ៕

ដោយ៖ ចាន់ សុភឿន (ប្រភព៖ មជ្ឈមណ្ឌលជាតិរក្សាសន្តិភាព)