AKP កណ្តាល ថ្ងៃទី២៦ ខែមករា ឆ្នាំ២០២៥-- ដើម្បីជួយដោះស្រាយបញ្ហាខ្វះទឹកជូនប្រជាពលរដ្ឋធ្វើស្រែប្រាំង ស្ថិតនៅឃុំជ័យធំ ស្រុកខ្សាច់កណ្ដាល នៅថ្ងៃទី២៥ ខែមករា ឆ្នាំ២០២៥ លោក គ្រុយ ម៉ាឡែន អភិបាលរងខេត្តកណ្ដាល បានដឹកនាំមន្ទីរពាក់ព័ន្ធ និងអាជ្ញាធរមូលដ្ឋានចុះពិនិត្យស្ថានភាពប្រឡាយជ្រៃលាស់ និងការដំឡើងម៉ាស៊ីនបូមទឹកនៅចំណុច ទ្វាទឹកព្រែកថ្មី ដើម្បីបូមបង្ហូរទៅតាមប្រឡាយទៅដល់ចំណុចព្រែកអរុណ និងបន្តហូរចូលបឹងខ្យង។

លោក គ្រុយ ម៉ាឡែន អភិបាលរងខេត្តកណ្តាល បានធ្វើការលើកទឹកចិត្តដល់ អាជ្ញាធរឃុំ ត្រូវការបែងចែកកម្លាំងប្រចាំការ ក្នុងការថែទាំមើលការខុសត្រូវក្នុងការបញ្ឆេះម៉ាស៊ីនបូមទឹក សំដៅធ្វើយ៉ាងណាឱ្យការបូមទឹកជួយសង្គ្រោះស្រែប្រាំងប្រជាពលរដ្ឋទទួលបានលទ្ធផលល្អប្រសើរ។ 

លោកអភិបាលរងខេត្តបានស្នើដល់អាជ្ញាធរស្រុក-ឃុំ ត្រូវចុះស្រង់ទិន្នន័យអំពីទំហំដីស្រែទាំងស្រូវប្រាំង និងស្រូវវស្សាឱ្យបានច្បាស់លាស់ ដើម្បីធ្វើជាមូលដ្ឋានក្នុងការរកវីធីសាស្ត្រដោះស្រាយបញ្ហាដូចជា ការស្ដារប្រព័ន្ធធារាសាស្ត្របន្ថែម ស្ដារអាងស្តុកទឹក បង្កើតឱ្យមានស្ថានីយ៍បូមទឹកបន្ថែម និងមានម៉ាស៊ីនបូមទឹកគ្រប់គ្រាន់សម្រាប់សង្គ្រោះពេលខ្វះខាតទឹកជាដើម ធ្វើយ៉ាងណាឱ្យបរិមាណទឹកអាចផ្គត់ផ្គង់បានគ្រប់គ្រាន់ សម្រាប់ការស្រោចស្រពលើផ្ទៃដីស្រែចម្ការរបស់ប្រជាពលរដ្ឋជាក់ស្តែង កុំឱ្យមានការខ្វះខាតនៅឆ្នាំបន្តបន្ទាប់ទៀត។

លោកអភិបាលរងខេត្តក៏បានបានជួបប្រជុំជាមួយមន្ទីរពាក់ព័ន្ធ អាជ្ញាធរស្រុក និងអាជ្ញាធរឃុំជ័យធំ ដោយបានស្នើឱ្យមន្ទីរជំនាញ អាជ្ញាធរស្រុក និងមន្រ្តីពាក់ព័ន្ធទាំងអស់ ត្រូវគិតគូរ និងយកចិត្តទុកដាក់ ទៅលើការបូមទឹកបញ្ចូលស្រែ និងការស្តារប្រព័ន្ធធារាសាស្ត្រឡើងវិញ តាមលទ្ធភាពដែលមាន សំដៅជួយដោះស្រាយបញ្ហាខ្វះទឹករបស់ប្រជាកសិករនាពេលនេះ ឱ្យបានទាន់ពេលវេលា។

គោលបំណងសំខាន់ក្នុងកិច្ចប្រជុំនេះ គឺដើម្បីស្តាប់របាយការណ៍របស់ ស្រុក ឃុំ និងប្រមូលបញ្ហាប្រឈមនានាពាក់ព័ន្ធនឹងការខ្វះខាតទឹកធ្វើស្រែរបស់ប្រជាកសិករ ដាក់ជូន ឯកឧត្តម អភិបាលខេត្តកណ្ដាល ធ្វើការពិនិត្យ និងជួយដោះស្រាយបំពេញបន្ថែមឱ្យកាន់តែមានប្រសិទ្ធភាព និងទាន់ពេលវេលា។ 

សូមជម្រាបថា ក្នុងស្រុកខ្សាច់កណ្ដាល មានផ្ទៃដីស្រែសរុប ៥ ៥០០ ហិកតា ក្នុងនោះស្រូវប្រាំងមាន ២០០០ ហិកតា និងស្រូវវស្សាមាន ៣ ៥០០ ហិកតា។ នារដូវប្រាំងនេះកសិករព្រោះស្ទូងសរុបបាន ២ ៩៥០ ហិកតា ធ្វើលើផ្ទៃដីស្រែប្រាំង និង ៩៥៩ ហិកតាទៀតធ្វើលើផ្ទៃដីស្រែវស្សាដែលប្រមូលផលរួច។ ចំពោះស្រូវប្រាំងដែលរងការប៉ះពាល់មានចំនួន៣៥០ហិកតា ស្ថិតនៅក្នុងឃុំជ័យធំ ចំណែកឃុំផ្សេងៗទៀតប្រជាកសិករអាចដោះស្រាយទឹកដោយខ្លួនឯងបាន៕ 

ដោយ ណយ នឿន (ប្រភព៖ រដ្ឋបាលខេត្តកណ្តាល)