AKP កំពង់ស្ពឺ ថ្ងៃទី២៤ ខែមករា ឆ្នាំ២០២៥-- ​ឯកឧត្តមបណ្ឌិត  ជាម ច័ន្ទសោភ័ណ អភិបាលខេត្តកំពង់ស្ពឺ នារសៀលថ្ងៃទី២៤ខែមករា ឆ្នាំ២០២៥នេះ បានអញ្ជើញជាអធិបតី ក្នុងពិធីបុណ្យសម្ពោធឆ្លងរបង់ខ្លោងទ្វារ និងសមិទ្ធផលនានា ស្ថិតក្នុង វត្តស្វាយបទុម ភូមិស្វាយអន្ទរទី២ ឃុំស្វាយអន្ទរ ស្រុកស្វាយអន្ទរ ខេត្តព្រៃវែង។

ពិធីសម្ពោធនេះ មានការអញ្ជើញ​ចូលរួមពី​មន្ត្រីគ្រប់ជាន់ថ្នាក់ របស់សាលាខេត្តកំពង់ស្ពឺ និងខេត្តព្រៃវែង ស្រុក ឃុំ ភូមិ យុវជន សិស្សានុសិស្ស លោកគ្រូ អ្នកគ្រូ ព្រមទាំងប្រជាពលរដ្ឋប្រមាណ​១,២០០នាក់។

តាមរបាយការណ៍របស់លោកអភិបាលស្រុកស្វាយអន្ទរថា  ក្រោយថ្ងៃរំដោះ ៧មករា ឆ្នាំ១៩៧៩ ក្រោមការដឹកនាំរបស់ថ្នាក់ដឹកនាំគ្រប់ជាន់ថ្នាក់ និងមានសុខសន្តិភាពពេញលេញ វត្តស្វាយបទុម ត្រូវបានដឹកនាំ  កសាងឡើងវិញដោយព្រះចៅអធិការ លោកអាចារ្យ គណៈកម្មការ និងពុទ្ធបរិស័ទនូវរាល់សមិទ្ធផលរួមមាន ខ្លោងទ្វារ របង ប្រវែង ៥១៨ ម៉ែត្រ , ផ្លូវបេតុងចូលវត្តប្រវែង ៣១០ ម៉ែត្រ បេតុងអាម៉េ ចំនួន ៣.៤១៩ ម៉ែត្រការេ   វត្តស្វាយបទុម មានចំណុះជើងវត្តចំនួន ០៤ ភូមិ និងជាវត្តអារាមមួយក្នុងចំណោម ៤៨វត្ត ក្នុងស្រុកស្វាយអន្ទរ ខេត្តព្រៃវែង ដែលមានក្រឡាផ្ទៃ ៣០.៣៧៧ ម៉ែត្រការ៉េ មានចំងាយ ១.១២០ ម៉ែត្រ ពីទីរួមស្រុកស្វាយអន្ទរ។

ឯកឧត្តមបណ្ឌិត បានថ្លែងអំណរគុណចំពោះទឹកចិត្តព្រះគ្រូចៅអធិការវត្ត ដែលបានខិតខំយកចិត្តទុកដាក់ និងបិណ្ឌបាត្រគៀងគរប្រជាពុទ្ធបរិស័យជិតឆ្ងាយទៅក្នុងនិងក្រៅប្រទេស ដោយសទ្ធាពេញចិត្តជ្រះថ្លារ ក្នុងយកធ្វើការកសាងនូវសមិទ្ធផលនានាក្នុងទីវត្តអារាមសមិទ្ធផលដែលព្រះចៅអធិការ និងសប្បុរសជនបានសាងសង់រួមមាន៖
១.ខ្លោងទ្វារ និងរបង  ក្បឿងកុដិ កសាងដោយ ឯកឧត្តម ម៉េង វ៉ាន់ឌី  និងលោកជំទាវ ឈន សាខន ចំណាយ ថវិកាសរុបៈ ២០.០០០ $  ។
២.កសាងបន្ទប់ទឹក ដោយ ឯកឧត្តម ម៉េង វ៉ាន់ឌី  និងលោកជំទាវ ឈន សាខន ចំណាយ ថវិកាសរុបៈ ៥.០០០ $។កសាងក្នុងជំនាន់ ព្រះគ្រូ ហ៊ាង វុទ្ធី មានសរុបថវិកាចំនួន២៥.០០០$រីឯជំនាន់ព្រះចៅអធិការមុនៗក៏មានភាពប្រហាក់
ប្រហែលគ្នានេះដែរ។

៣.ក្នុងជំនាន់ព្រះគ្រូ​ ហ៊ាង វុទ្ធី ដឹកនាំកសាងហេដ្ឋារចនាសម្ព័ន្ធវត្តចំណាយអស់ថវិកាសរុបចំនួន ២៥៥.៦៩៨$ និងការអភិវឌ្ឍន៍រីកចម្រើនជាពិសេសសម្រួលដល់ការមកស្នាក់អាស្រ័យរបស់កូនចៅអ្នកស្រុក ដែលបានស្មគ្រ័ចូលខ្លួនបំពេញបុណ្យកុសលជាព្រះសង្ឃ ក្នុងការផ្សព្វផ្សាយអប់រំទូន្មានប្រៀនប្រដៅមនុស្ស និងបម្រើដល់វិស័យព្រះពុទ្ធសាសនានៅក្នុងមូលដ្ឋាន ក្រោយពីកិច្ចបំបួសរួចរាល់ ។

ឯកឧត្តមបណ្ឌិត ថាទីវត្តអារាមមិនត្រឹមតែជាទីស្ថានសម្រាប់គោរពនិងសក្ការៈបូជាប៉ុណ្ណោះ ទេ ប៉ុន្តែជាកន្លែងប្រភពសម្រាប់បណ្ដុះ បណ្ដាលនៅបញ្ញាវ័ន បណ្ដុះបណ្ដាលបញ្ញាញាណ ឬក៏ជាស្នាលបណ្ដុះនូវគ្រាប់ពូជបញ្ញាវ័ន សម្រាប់ការអភិវឌ្ឍន៍លើគ្រប់វិស័យ ក្រោមការដឹកនាំរបស់រាជរដ្ឋាភិបាល បានកសាងសមិទ្ធផលសំខាន់ៗជាច្រើន ទាំងអាណាចក្រ និងពុទ្ធចក្រ ហើយបាននិងកំពុងបន្តធ្វើការអភិវឌ្ឍប្រទេសជាបណ្តើរៗ ឆ្លើយតបទៅតាមសេចក្តីត្រូវការជាមូលដ្ឋាន ក្នុងការលើកកម្ពស់កម្រិតជីវភាព និងថែរក្សាកំណើនសេដ្ឋកិច្ចជាតិ៕
ដោយ៖ គង់ សិរីរ័ត្ន, ប្រភព៖ AKP-កំពង់ស្ពឺ