AKP កំពង់ធំ ថ្ងៃទី២៤ ខែមករា ឆ្នាំ២០២៥--

ឧត្តមសេនីយ៍ទោ ហេង សុផល ស្នងការនគរបាលខេត្តកំពង់ធំ បានលើកឡើងថា ក្នុងនាមជាមន្ត្រីនគរបាលយុត្តិធម៌ចំពោះការកសាងនីតិវិធីត្រូវប្រកាន់ខ្ជាប់ក្រមសីលធម៌ វិជ្ជាជីវៈមានតម្លាភាព តុល្យភាពក្នុងឱកាសអញ្ជើញជាអធិបតីក្នុងពិធីបើកវគ្គបំប៉ន ស្ដីពីនីតិវិធីការអនុវត្តច្បាប់ចរាចរណ៍ផ្លូវគោក នាព្រឹកថ្ងៃទី២៤ ខែមករា ឆ្នាំ២០២៥ នៅសាលប្រជុំស្នងការដ្ឋាននគរបាលខេត្ត។

ក្នុងឱកាសនោះ ឧត្តមសេនីយ៍ទោ ហេង សុផល បានថ្លែងអំណរគុណចំពោះកងកម្លាំងនគរបាលជាតិទូទាំងខេត្តកំពង់ធំ កម្លាំងនគរបាលចរាចរណ៍ផ្លូវគោកដែលមានស្នាដៃ គុណបំណាច់ក្នុងការអនុវត្តតួនាទី/ភារកិច្ច សម្រេចបានលទ្ធផលល្អប្រសើរនាពេលកន្លងមក និងបានផ្ដាំផ្ញើដល់សិក្ខាកាមទាំងអស់ត្រូវយកចិត្តទុកដាក់ ស្ដាប់ សាកសួរ កត់ត្រា ក្រេបជញ្ជក់ ចំណេះដឹង បទពិសោធន៍ ដែលផ្តល់ដោយគ្រូបង្គោល ដើម្បីពង្រឹងសមត្ថភាពជំនាញវិធានការជំនាញ ដល់បងប្អូន ក្នុងអាជីពជាមន្ត្រីនគរបាលជាតិ។

សូមបងប្អូនកងកម្លាំង រួមគ្នាគិតរួមគ្នាធ្វើ ពិភាក្សាបញ្ហាប្រឈម ផ្លាស់ប្តូរយោបល់ ចែករំលែកបទពិសោធន៍ ជ្រើសរើសចំណុចល្អៗ សម្រាប់អនុវត្តការងារសុវត្ថិភាពចរាចរណ៍ផ្លូវគោក ឈានទៅសម្រេចបាននូវភាពជោគជ័យបន្ថែមទៀត តាមផែនការយុទ្ធសាស្ត្រ ដែលបានកំណត់ និងយន្តការកំណែទម្រង់ របស់ក្រសួងមហាផ្ទៃ រាជរដ្ឋាភិបាលនីតិកាលទី៧ព្រមទាំងបានសង្ឃឹមជឿជាក់ថា វគ្គបណ្តុះបណ្តាល ថ្ងៃនេះនឹងទទួលបានលទ្ធផលផ្លែផ្កាស្នាដៃថ្មីៗបន្ថែមទៀត ស្របតាមគោលនយោបាយក្រសួងមហាផ្ទៃ និងអគ្គស្នងការដ្ឋាននគរបាលជាតិ។ សូមបញ្ជាក់ថា វគ្គបណ្ដុះបណ្ដាលនេះរយៈពេល០១ថ្ងៃ គ្រូឧទ្ទេសនាមចំនួន០៤រូប សិក្ខាកាម១០៤នាក់ (ស្រី០៩នាក់) មេរៀនមានចំនួន០៦មុខវិជ្ជា៖ ១. បទវិន័យនគរបាលជាតិកម្ពុជា ២. និតិវិធីអនុវត្តល្បឿន ៣. នីតិវិធីអនុវត្តជាតិស្រវឹង ៤. បទបង្ហាញផ្លាកលេខក្លែងក្លាយ ៥. ការពិនិត្យផ្លាកលេខយានយន្ដ និង៦. បទបង្ហាញស្ដីពីលក្ខខណ្ឌនៃការផ្ដល់បណ្ណបើកបរ៕

ដោយ ស៊ុម វណ្ណា