AKP ភ្នំពេញ ថ្ងៃទី២៤ ខែមករា ឆ្នាំ២០២៥--

ឯកឧត្តម នាយឧត្តមសេនីយ៍ មាស វិរិទ្ធ អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀន បានថ្លែងថា ការសម្អាតចក ឬយកចកចេញពីបឹង គឺផ្តើមចេញពីការចូលរួមរបស់អាជ្ញាធរមូលដ្ឋាន និងប្រជាពលរដ្ឋ ហើយថា App NoDrug គឺជាមធ្យោបាយរាយការណ៍ដ៏មានប្រសិទ្ធភាព។

ការថ្លែងបែបនេះរបស់ឯកឧត្តម នាយឧត្តមសេនីយ៍ មាស វិរិទ្ធ ធ្វើឡើងនៅក្នុងសិក្ខាសាលាស្តីពីការពង្រឹង និងលើកកម្ពស់ប្រសិទ្ធភាពការងារនៃកិច្ចសហប្រតិបត្តិការអនុវត្តភូមិ ឃុំ គ្មានគ្រឿងញៀន នៅតំបន់ព្រំដែន កម្ពុជា-ថៃ-ឡាវ នាព្រឹកថ្ងៃទី២៤ ខែមករា ឆ្នាំ២០២៥។

ក្នុងនាម ឯកឧត្តមសន្តិបណ្ឌិត នេត សាវឿន ឧបនាយករដ្ឋមន្ត្រី ប្រធានអាជ្ញាធរជាតិប្រយុទ្ធប្រឆាំងគ្រឿងញៀន ឯកឧត្តម នាយឧត្តមសេនីយ៍ មាស វិរិទ្ធ បានថ្លែងអំណរគុណដល់ភាគីថៃ ដែលជាដៃគូសហការគ្រប់ជុងជ្រោយនៅលើបញ្ហាគ្រឿងញៀនក៏ដូចជាបញ្ហាផ្សេងៗទៀត រួមមាន ការអនុវត្តផែនការភូមិ ឃុំ នៅខេត្តជាប់ព្រំដែន កម្ពុជា ថៃ ឡាវ គ្មានគ្រឿងញៀន គឺពិតជារនាំងរាំងខ្ទប់បញ្ហាគ្រឿងញៀនកុំឲ្យឆ្លងកាត់ព្រំដែនប្រទេសទាំងបី។ ជាថ្មីម្តងទៀត ឯកឧត្តម នាយឧត្តមសេនីយ៍ មាស វីរិទ្ធ បានគូសបញ្ជាក់ថា ការសម្អាតចក ឬយកចកចេញពីបឹង គឺផ្តើមចេញពីការចូលរួមរបស់អាជ្ញាធរមូលដ្ឋាន ព្រោះរឿងរ៉ាវ ឬបញ្ហាទាំងអស់គឺកើតមាននៅក្នុងមូលដ្ឋានភូមិ ឃុំ សង្កាត់។

ដូច្នេះអាជ្ញាធរមូលដ្ឋានភូមិ ឃុំ សង្កាត់ គឺត្រូវតែចូលរួមធ្វើឱ្យសម្រេចបាននូវការងារប្រយុទ្ធប្រឆាំងគ្រឿងញៀន ដោយត្រូវកំណត់ទីតាំងក្នុងភូមិសាស្ត្រឱ្យបានច្បាស់លាស់ដើម្បីរាំងខ្ទប់បញ្ហាគ្រឿងញៀនកុំឲ្យរាលដាល តាមរយៈការប្រើប្រាស់នូវមធ្យោបាយផ្សេងៗមានដូចជា ការផ្សព្វផ្សាយអប់រំ បង្ការ បង្ក្រាប និងបំផុសឱ្យប្រជាពលរដ្ឋទាញយក និងប្រើប្រាស់ App NoDrug ដែលជាឧបករណ៍ដ៏មានប្រសិទ្ធភាព ស័ក្តិសិទ្ធភាព ក្នុងការផ្ដល់ព័ត៌មាន រាយការណ៍ដើម្បីដកបញ្ហាគ្រឿងញៀនចេញពីសហគមន៍៕

ដោយ៖ ចាន់ សុភឿន (ប្រភព៖ អាជ្ញាធរជាតិប្រយុទ្ធប្រឆាំងគ្រឿងញៀន)