AKP ភ្នំពេញ ថ្ងៃទី២៤ ខែមករា ឆ្នាំ២០២៥-- ឯកឧត្តម អ៊ិន ចន្ថា រដ្ឋលេខាធិការ តំណាងដ៏ខ្ពង់ខ្ពស់ឯកឧត្ដម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានដឹកនាំក្រុមការងារចុះបើកការដ្ឋានការងារស្តារឡើងវិញផ្លូវក្រាលកៅស៊ូពីរជាន់ (DBST) និងផ្លូវក្រាលបេតុង ចំនួន០១ខ្សែ មាន០២កំណាត់ ស្ថិតនៅភូមិថ្កូវ និងភូមិទំព្រង ឃុំត្រប់ ស្រុកបាធាយ ខេត្តកំពង់ចាម កាលពីព្រឹកថ្ងៃទី២៣ ខែមករា ឆ្នាំ២០២៥ ដោយមានការចូលរួមពីតំណាងនាយកដ្ឋានផ្លូវលំជនបទ ក្រុមការងារគ.ត.វនៃក្រសួងអភិវឌ្ឍន៍ជនបទ ក្រុមការងារនាយកដ្ឋានវិស្វកម្មនៃក្រសួងការពារជាតិ ក្រុមការងារមន្ទីរអភិវឌ្ឍន៍ជនបទខេត្តកំពង់ចាមព្រមទាំងអាជ្ញាធរមូលដ្ឋានមួយចំនួនទៀត។

ឯកឧត្តមរដ្ឋលេខាធិការក៏បានជួបសំណេះសំណាល ដោយបានពាំនាំនូវប្រសាសន៍ផ្ដាំផ្ញើសួរសុខទុក្ខ ប្រកបដោយមនោសញ្ចេតនា និងពរសព្ទសាធុការពីសំណាក់សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត និងឯកឧត្ដម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ ព្រមទាំងបាននាំយកក្រមាចែកជូនដល់មេឃុំ ក្រុមប្រឹក្សាឃុំ មេភូមិ និងប្រជាពលរដ្ឋរស់នៅសងខាងផ្លូវ ដែលបានចូលរួមដោយម្នាក់ៗទទួលបានក្រមាមួយ។

ក្នុងឱកាសនោះ ឯកឧត្តមបានសំណូមពរដល់បងប្អូនប្រជាពលរដ្ឋ និងអាជ្ញាធរមូលដ្ឋាន យោគយល់ និងអធ្យាស្រ័យដល់ក្រុមការងារអនុវត្តការស្តារផ្លូវឡើងវិញ ក្នុងករណីមានការប៉ះពាល់ដល់ផលប្រយោជន៍ដោយប្រការណាមួយក្នុងអំឡុងពេលការអនុវត្តការងារស្តារឡើងវិញនេះ ដែលមានប្រវែងសរុប ៤ ១០០ម (ផ្លូវក្រាលកៅស៊ូពីរជាន់ប្រវែង ៣ ៦០០ម ទទឹង ៦ម និងផ្លូវក្រាលបេតុងប្រវែង ៥០០ម ទទឹង ៦ម កម្រាស់ ០,២ម ចិញ្ចើមផ្លូវក្រាលដីល្បាយក្រួសសងខាង ម្ចាងៗកម្រាស់ ០,២ម) ស្ថាបនាលូអ៊ុយប្រវែង ៦៥០ម លូមូលគ្រប់ប្រភេទចំនួន ០៤កន្លែង និងលូអណ្តូងចំនួន ០៤កន្លែង ដែលសាងសង់ដោយកងវិស្វកម្មនៃក្រសួងការពារជាតិ ហើយក្នុងឱកាសនេះ ឯកឧត្តមបានឡើងបញ្ជាគ្រឿងចក្រជានិមិត្តរូប ក្នុងការបើកការដ្ឋានបើកការដ្ឋានការងារស្តារផ្លូវ០១ខ្សែមាន២កំណាត់នេះឡើងវិញ។

ជាមួយគ្នានេះដែរ បងប្អូនប្រជាពលរដ្ឋ និងអាជ្ញាធរមូលដ្ឋានបានសម្ដែងការអបអរសាទរ សប្បាយរីករាយ ក្នុងការទទួលបានការស្តារផ្លូវនេះឡើងវិញ និងបានថ្លែងអំណរគុណយ៉ាងជ្រាលជ្រៅជូនចំពោះសម្តេចតេជោ ហ៊ុន សែន សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត និងឯកឧត្ដម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ សូមប្រកបដោយពុទ្ធពរទាំង៥ប្រការជានិច្ចនិរន្តកុំបីឃ្លៀងឃ្លាតឡើយ៕

ដោយ៖ ពេជ្រ សំអឿន (ប្រភព៖ ក្រសួងអភិវឌ្ឍន៍ជនបទ)