AKP ភ្នំពេញ ថ្ងៃទី២៤ ខែមករា ឆ្នាំ២០២៥-- ឯកឧត្តមបណ្ឌិត ហុង គឹមជាង អនុរដ្ឋលេខាធិការក្រសួងអប់រំ យុវជន និងកីឡា បានកោតសរសើរចំពោះគម្រោងតភ្ជាប់សាលាសកលរបស់មូលនិធិពានរង្វាន់សម្តេចចៅហ្វាមហាចក្រី ក្នុងការលើកកម្ពស់ការប្រើប្រាស់បញ្ញាសិប្បនិម្មិត (AI) និងជំនាញបច្ចេកវិទ្យាព័ត៌មាន និងសារគមនាគមន៍ (ICT) ដើម្បីជំរុញការរៀន និងបង្រៀន ដែលគំនិតផ្តួចផ្តើមនេះស្របគ្នាទៅនឹងកិច្ចខិតខំប្រឹងប្រែងរបស់ក្រសួងអប់រំ យុវជន និងកីឡា ក្នុងការដាក់បញ្ជូលការប្រើប្រាស់បញ្ញាសិប្បនិម្មិតនៅក្នុងកម្មវិធីសិក្សា ដើម្បីលើកកម្ពស់ការប្រើប្រាស់ឌីជីថលនៅក្នុងការអប់រំ។ ការលើកឡើងរបស់ឯកឧត្តមបណ្ឌិត ហុង គឹមជាង ដូចនេះធ្វើឡើងនាជំនួបពិភាក្សាការងារជាមួយមន្ត្រី នៃលេខាធិការដ្ឋានមូលនិធិពានរង្វាន់សម្តេចចៅហ្វាមហាចក្រី ព្រះរាជាណាចក្រថៃ នៅទីស្តីការក្រសួង កាលពីរសៀលថ្ងៃទី២៣ ខែមករា ឆ្នាំ២០២៥។

ជំនួបនេះធ្វើឡើងក្នុងគោលបំណងរាយការណ៍ពីវឌ្ឍនភាព នៃគម្រោងតភ្ជាប់សាលាសកលរបស់មូលនិធិពានរង្វាន់សម្តេចចៅហ្វាមហាចក្រី ដែលបានអនុវត្តកន្លងមកនៅក្នុងប្រទេសកម្ពុជា និងពិភាក្សាពីកិច្ចសហប្រតិបត្តិការរវាងមូលនិធិ និងក្រសួងអប់រំ យុវជន និងកីឡា នាពេលអនាគត ហើយបន្ទាប់ពីជំនួបនេះ លេខាធិការដ្ឋាននៃមូលនិធិពានរង្វាន់សម្តេចចៅហ្វាមហាចក្រីនឹងធ្វើទស្សនកិច្ចនៅសាលារៀនចំនួន៦ ដែលស្ថិតក្រោមគម្រោងខាងលើរួមមាន វិទ្យាល័យ ហ៊ុន សែន រលាប្អៀរ អនុវិទ្យាល័យព្រះធាតុ សាលាបឋមសិក្សាគំរូក្រុង វិទ្យាល័យ សុខ អាន សំរោង វិទ្យាល័យ ហ៊ុន សែន ១មិថុនា និងវិទ្យាល័យអង្គជុំ ដើម្បីប្រគល់បណ្ណសរសើរដល់គណៈគ្រប់គ្រងសាលារៀន គ្រូបង្រៀន និងសិស្សានុសិស្ស ដែលបានចូលរួមក្នុងកម្មវិធីគម្រោងដែលបានរៀបចំកន្លងមក។

ក្រសួងអប់រំ យុវជន និងកីឡាបានឱ្យដឹងថា គម្រោងតភ្ជាប់សាលាសកល គឺជាគម្រោងមួយដែលរៀបចំឡើងដោយមូលនិធិពានរង្វាន់សម្តេចចៅហ្វាមហាចក្រី នៃព្រះរាជាណាចក្រថៃ ដោយមានការគាំទ្រពីសំណាក់ក្រសួងអប់រំ យុវជន និងកីឡា នៃព្រះរាជាណាចក្រកម្ពុជា និងក្រសួងអប់រំ នៃប្រទេសម៉ាឡេស៊ី ក្នុងគោលបំណងជំរុញកិច្ចសហប្រតិបត្តិការលើផ្នែកវប្បធម៌ និងលើកកម្ពស់ជំនាញសតវត្សរ៍ទី២១ រវាងសិស្ស និងគ្រូបង្រៀនមកពីប្រទេសកម្ពុជា និងប្រទេសម៉ាឡេស៊ី ក៏ដូចជាជំរុញការយល់ដឹងលើភាពចម្រុះនៃវប្បធម៌ និងភាពជាពលរដ្ឋសកល។ គម្រោងនេះត្រូវបានរៀបចំឡើងក្នុងរយៈពេល៤ខែ ចាប់ផ្តើមពីខែមិថុនា ដល់ខែកញ្ញា ឆ្នាំ២០២៤ ក្រោមមូលបទ៖ បង្កើនការផ្លាស់ប្តូរវប្បធម៌ជាមួយកម្មវិធីបញ្ញាសិប្បនិម្មិត ដោយមានការចូលរួមពីសាលារៀនចំនួន១៦ គ្រូបង្រៀនចំនួន៤៨រូប និងសិស្សានុសិស្សចំនួន៣២០រូបមកពីប្រទេសទាំងពីរ កម្ពុជា-ម៉ាឡេស៊ី។ សម្រាប់ឆ្នាំ២០២៥ មូលនិធិពានរង្វាន់សម្តេចចៅហ្វាមហាចក្រីគ្រោងនឹងពង្រីកវិសាលភាពនៃគម្រោងនេះ ដោយមានការចូលរួមពីសំណាក់គ្រូបង្រៀន និងសិស្សានុសិស្សមកពីប្រទេសកម្ពុជា និងប្រទេសថៃ៕

ដោយ៖ ចាន់ សុភឿន (ប្រភព៖ ក្រសួងអប់រំ)