AKP កំពង់ធំ ថ្ងៃទី២៤ ខែមករា ឆ្នាំ២០២៥-- ឯកឧត្តម នួន ផារ័ត្ន អភិបាលខេត្តកំពង់ធំ ដឹកនាំក្រុមការងារជំនាញចុះពិនិត្យមើល និងស្វែងរកដំណោះស្រាយជូនបងប្អូនប្រជាកសិករ ដែលកំពុងខ្វះខាតទឹកក្នុងការបង្កបង្កើនផលស្រូវនៅភូមិមួយចំនួនក្នុងភូមិសាស្ត្រស្រុកកំពង់ស្វាយ ស្រុកស្ទោង និងស្រុកប្រាសាទបល្ល័ង្គ កាលពីរសៀលថ្ងៃទី២៣ ខែមករា ឆ្នាំ២០២៥។

ក្នុងដំណើរចុះពិនិត្យ ឯកឧត្តម នួន ផារ័ត្ន បានស្នើដល់អាជ្ញាធរឃុំស្រុកឱ្យណែនាំប្រជាកសិករសូមកុំបន្តធ្វើស្រែប្រាំងបន្ថែមទៀត ខណៈនាពេលនេះអាចប្រឈមនឹងបញ្ហាខ្វះខាតទឹក។ បងប្អូនប្រជាកសិករបានបូមទឹកចេញពីប្រឡាយស្ទឹងស្ទោង និងអាងទឹក ៣០ កញ្ញា ស្រកដល់បាតក្រោមដែលជាបញ្ហាមួយ អាចនឹងធ្វើឱ្យមានការខ្វះខាតទឹកសម្រាប់ប្រជាពលរដ្ឋប្រើប្រាស់ប្រចាំថ្ងៃនៅពេលខាងមុខ។

ឯកឧត្តមបានបន្តទៀតថា សម្តេចធិបតី ហ៊ុន ម៉ាណែត បានដាក់ចេញនូវគោលនយោបាយរួមគ្នាប្រែក្លាយការធ្វើកសិកម្មនៅកម្ពុជាពីលក្ខណៈគ្រួសារ ទៅជាទម្រង់កសិកម្មទំនើប និងមានសមត្ថភាព ប្រកួតប្រជែងខ្ពស់ទាំងលើផ្នែកថ្លៃដើម បរិមាណនិង គុណភាពជាមួយនឹងប្រព័ន្ធគ្រប់គ្រងច្បាស់លាស់ ថ្លៃដើមផលិតទាប ការគាំទ្រជាប្រចាំខាងផ្នែកបច្ចេកទេសនិងការធានាទីផ្សារ ទុកជាមុនតាមរយៈកិច្ចសន្យាកសិកម្ម ជាពិសេសការទទួល បានទុនកម្ចីការប្រាក់ទាប។ សហគមន៍កសិកម្មទំនើបផ្តល់ភាពច្បាស់លាស់មួយនៅក្នុងខ្សែច្រវាក់ផលិតកម្ម ដែលនឹង ចូលរួមដោយផ្ទាល់ដល់ការអភិវឌ្ឍវិស័យកសិកម្មកម្ពុជានាពេលអនាគត៕

ដោយ ស៊ុម វណ្ណា