AKP បន្ទាយមានជ័យ ថ្ងៃទី២៤ ខែមករា ឆ្នាំ២០២៥--ឯកឧត្តម អ៊ុំ រាត្រី អភិបាលខេត្តបន្ទាយមានជ័យ កាលពីថ្ងៃទី២៣ ខែមករា ឆ្នាំ២០២៥ បានដឹកនាំក្រុមការងារជំនាញចុះពិនិត្យ និងស្វែងរកដំណោះស្រាយជូនប្រជាកសិករ ដែលកំពុងខ្វះខាតទឹកក្នុងការបង្កបង្កើនផលស្រូវ នៅភូមិមួយចំនួន ក្នុងភូមិសាស្ត្រស្រុក៣ រួមមានស្រុកមង្គលបូរី ស្រុកស្វាយចេក និងស្រុកព្រះនេត្រព្រះ។

ក្នុងឱកាសនោះ ឯកឧត្តមអភិបាលខេត្តបានឱ្យដឹងថា ស្រូវប្រាំងដែលមានបញ្ហាប្រឈមខ្វះទឹកមួយចំនួននេះកសិករគាត់បានដាំដុះជាលើកទី៣ ទោះបីពួកគាត់ដឹងថានឹងប្រឈមបញ្ហាខ្វះទឹកក៏ដោយដូចនៅឃុំសឿ ស្រុកមង្គលបូរី មានស្រែប្រមាណជាង១០០ហិកតា តែស្រូវនោះបានចាប់ផ្ដើមទុំហើយ។ នៅស្រុកស្វាយចេកក៏មានជាង១០០ហិកតាដែរភាគច្រើននៅក្នុងឃុំស្លក្រាមដែលយើងកំពុងពិនិត្យលទ្ធភាពជួយពួកគាត់។ នៅស្រុកព្រះនេត្រព្រះក្នុងឃុំរហាល ស្រូវប្រាំងរបស់កសិករចំនួនជាង៣០០០ហិកតាបានកំពុងអន្តរាគមន៍ជួយដោយបើកទឹកពីអាងត្រពាំងថ្ម។

ក្នុងពេលចុះត្រួតពិនិត្យ ឯកឧត្តមអភិបាលខេត្តបានចេញជាគោលការណ៍ជូនដល់អភិបាលស្រុកទាំងបីមានជាចម្បងគឺត្រូវគិតពីប្រជាពលរដ្ឋជាមុនសិនយកទៅស្រោចស្រពដំណាំរួមផ្សំនៅក្បែរផ្ទះសម្រាប់ហូបចុកសង្គ្រោះស្រូវដែលរងការខ្វះទឹក សង្គ្រោះស្រូវដែលនៅជិតសិនទើបសង្គ្រោះស្រូវនៅឆ្ងាយ មិនអនុញ្ញាតឱ្យបងប្អូនសាបព្រោះថ្មីឡើយ។

ជាមួយគ្នានេះដែរ ឯកឧត្តមបានឱ្យមន្ទីរធនធានទឹក និងឧតុនិយម និងមន្ទីរកសិកម្ម រុក្ខាប្រមាញ់ និងនេសាទ ត្រូវស្រង់ទិន្នន័យស្ថិតិឱ្យបានច្បាស់លាស់ និងតាមដានពិនិត្យមិនឱ្យបងប្អូនធ្វើបន្តទៀតទេ និងបានជំរុញបន្ថែមដល់អាជ្ញាធរមូលដ្ឋានភូមិ ឃុំ ស្រុក ត្រូវតាមដាន និងយកចិត្តទុកដាក់ខ្ពស់ថែមទៀតដល់ប្រជាកសិករ និងស្រែស្រូវដែលកំពុងរងផលប៉ះពាល់ខ្វះទឹកនេះដើម្បីជួយពួកគាត់សង្គ្រោះស្រែស្រូវ ឱ្យបានទាន់ពេលវេលាថែមទៀត។

ឯកឧត្តមអភិបាលខេត្តបន្ទាយមានជ័យក៏បានអំពាវនាវដល់ប្រជាពលរដ្ឋបញ្ឈប់ការបង្កបង្កើនផលស្រូវប្រាំងបន្តទៀត ព្រោះក្រសួងធនធានទឹកបានប្រកាសថា ឆ្នាំនេះមានគ្រោះរាំងស្ងួតធ្វើឱ្យមានការខ្វះខាតទឹកផងដែរ៕

ដោយ ឈុន សារ៉ាត