AKP ព្រះវិហារ ថ្ងៃទី២៣ ខែមករា ឆ្នាំ២០២៥-

ឯកឧត្តម ឧត្តមសេនីយ៍ឯក នាក់ យុទ្ធា អគ្គលេខាធិការរងនៃអាជ្ញាធរជាតិប្រយុទ្ធប្រឆាំងគ្រឿងញៀនបានលើកឡើងថា អាជ្ញាធរ ភូមិ ឃុំ សង្កាត់ មានតួនាទីសំខាន់ក្នុងការស្វែងរកអន្តរាគមន៍ពីសុខាភិបាលចំពោះអ្នកប្រើនិងអ្នកញៀនគ្រឿងញៀនកម្រិតស្រាល។ ការលើកឡើងរបស់ឯកឧត្តម ឧត្តមសេនីយ៍ឯកបែបនេះ នៅក្នុងពិធីបិទសិក្ខាសាលាស្តីពីការពង្រឹង និងលើកកម្ពស់ប្រសិទ្ធភាពការងារនៃកិច្ចសហប្រតិបត្តិការអនុវត្តន៍ភូមិ ឃុំ ស គ្មានគ្រឿងញៀន នៅតំបន់ព្រំដែនកម្ពុជា-ថៃ-ឡាវ  ក្រោមជំនួយ LOA ឆ្នាំ២០២៤ នាល្ងាចថ្ងៃទី២៣ ខែមករា ឆ្នាំ២០២៥ នៅខេត្តព្រះវិហារ។

ឯកឧត្តម  វ៉ាត់ ប៉ារ៉ានីន អភិបាលរងខេត្ត និងជាប្រធានលេខាធិការដ្ឋានគណៈកម្មាធិការត្រួតពិនិត្យគ្រឿងញៀនខេត្តព្រះវិហារបានថ្លែងសាទរចំពោះកិច្ចការខិតខំប្រឹងប្រែងរួមគ្នាឱ្យសិក្ខាសាលាទទួលបានលទ្ធផលល្អ។ លោកអភិបាលរងខេត្តក៏បានផ្ដាំផ្ញើជាពិសេសចំពោះការរួមគ្នាអនុវត្តន៍នូវផែនការ ផែនទីបង្ការទប់ស្កាត់ឆ្លងកាត់ព្រំដែននិងបំផុសឱ្យប្រជាពលរដ្ឋទាំងអស់ត្រូវទាញយកនិងប្រើប្រាស់ App NoDrug ដើម្បីបង្កើនប្រសិទ្ធភាពការងារយុទ្ធប្រឆាំងគ្រឿងញៀនមូលដ្ឋាន បង្កើនផលិតភាពនៅភូមិ១ផលិតផល១ ដើម្បីបង្កើតការងារ នៅក្នុងមូលដ្ឋាន។

ក្នុងឱកាសនោះ ឯកឧត្តម ឧត្តមសេនីយ៍ឯក នាក់ យុទ្ធា បានថ្លែងថា ការកសាងបាននូវភូមិស និងក្លាយជាឃុំ ស គ្មានគ្រឿងញៀន ប្រជាពលរដ្ឋនឹងមានសុវត្ថិភាព ពោរពេញដោយការអភិវឌ្ឍ។ ឯកឧត្តម ឧត្តមសេនីយ៍ឯកបានសំណូមពរដល់អាជ្ញាធរមូលដ្ឋានទាំងអស់លើកទឹកចិត្តជួយអន្តរាគមន៍ដល់អ្នកប្រើនិងអ្នកញៀនគ្រឿងញៀនកម្រិតស្រាលឱ្យទទួលបាននូវសេវាព្យាបាលអ្នកញៀនគ្រឿងញៀននៅតាមមណ្ឌលសុខភាព ពេទ្យបង្អែកនៅក្នុងសហគមន៍ព្រោះថាអ្នកញៀនគ្រឿងញៀននឹងមិនបញ្ឈប់ឡើយ ប្រសិនបើយើងមិនព្យាបាលគាត់ហើយការងារព្យាបាលនៅតាមសហគមន៍នេះគឺរក្សាបាននូវកិត្តិយស ការងារ ចំណេញនូវថវិកា។

សូមបញ្ជាក់ថា សិក្ខាសាលាមួយថ្ងៃនេះគឺសិក្ខាកាមទទួលបាននូវចំណេះដឹងពាក់ព័ន្ធនឹងការងារសំខាន់ៗសម្រាប់ដោះស្រាយបញ្ហាគ្រឿងញៀននៅក្នុងមូលដ្ឋានដើម្បីកសាងបាននូវភូមិ ឃុំ សគ្មានគ្រឿងញៀន ធាតុចូលយ៉ាងច្រើនពីវាគ្មិនកម្ពុជា-ថៃ ពីយន្តការនៃការប្រយុទ្ធប្រឆាំងគ្រឿងញៀន អត្ថប្រយោជន៍App NoDrug ការចែករំលែកពីបទពិសោធន៍ល្អៗទាក់ទងនឹងការបង្ការទប់ស្កាត់បញ្ហាគ្រឿងញៀននៅក្នុងមូលដ្ឋានពីប្រទេសថៃ និងបទបង្ហាញការអប់រំ បង្ការ ព្យាបាលអ្នកញៀនគ្រឿងញៀនដោយក្រសួងសុខាភិបាល៕

ដោយ៖ រិទ្ធី ប្រភព៖ អាជ្ញាធរជាតិប្រយុទ្ធប្រឆាំងគ្រឿងញៀន