AKP កំពង់ធំ ថ្ងៃទី២៣ ខែមករា ឆ្នាំ២០២៥ -- ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ នាព្រឹកថ្ងៃទី២៣ ខែមករា ឆ្នាំ២០២៥ បានដឹកនាំសហការី ត្រួតពិនិត្យសកម្មភាពចាក់ និងឈូសឆាយដីកែលម្អសោភ័ណភាពក្នុងទីតាំងអង្គភាពកងវរសេនាតូចលេខ៤៤៨នៃបញ្ជាការដ្ឋានតំបន់ប្រតិបត្តិការសឹករងកំពង់ធំ ស្ថិតនៅភូមិតាឡែក ឃុំសាលាវិស័យ ស្រុកប្រាសាទបល្ល័ង្ក ខេត្តកំពង់ធំ។

លោកវរសេនីយ៍ទោ ថនស៊ី សក្កា មេបញ្ជាការកងវរសេនាតូចលេខ៤៤៨ បានរាយការណ៍ពីស្ថានភាពដីក្នុងទីតាំងកងវរសេនាតូចលេខ៤៤៨នៅរដូវវស្សា កន្លែងមួយចំនួនជាំទឹកដោយត្រូវទឹកដក់មានរយៈពេលយូរថ្ងៃបណ្ដាលឱ្យមានការលំបាកក្នុងការហ្វឹកហ្វឺនកងទ័ពនៅក្នុងទីតាំងបន្ទាយ ហើយតាមផ្លូវធ្វើដំណើរផ្នែកខ្លះមានការខូចខាតដោយសារការចាក់ដីគ្រួសក្រហមមានរយៈពេលយូរឆ្នាំមកហើយ។ អង្គភាពកងវរសេនាតូចលេខ៤៤៨ ដោយមានការឧបត្ថម្ភគាំទ្រពីឯកឧត្តមមេបញ្ជាការតំបន់ប្រតិបត្តិការសឹករងកំពង់ធំ និងមានការចូលរួមពីសប្បុរសជននានា អង្គភាពបានដំណើរការចាក់ និងឈូសឆាយដីនៅក្នុងទីតាំងបន្ទាយដែលត្រូវចំណាយថវិកាជាង ២៥០០ដុល្លារអាមេរិក។

ឧត្តមសេនីយ៍ទោ សោម ស៊ុន បានកោតសរសើរចំពោះលោកវរសេនីយ៍ទោ ថនស៊ី សក្តា មេបញ្ជាការកងវរសេនាតូចលេខ៤៤៨នៃបញ្ជាការដ្ឋានតំបន់ប្រតិបត្តិការសឹករងកំពង់ធំ រួមជាមួយនឹងថ្នាក់ដឹកនាំគ្រប់លំដាប់ថ្នាក់ នាយទាហាន នាយទាហានរង និងពលទាហាននៅក្នុងអង្គភាព ដែលបានខិតខំប្រឹងប្រែងគ្រប់បែបយ៉ាងក្នុងការអនុវត្តផែនការកសាងអង្គភាពរឹងមាំលើគ្រប់វិស័យការគ្រប់គ្រងកម្លាំងសម្រាប់ត្រៀមបម្រុងចល័តអន្តរាគមន៍តាមបទបញ្ជាការហ្វឹកហ្វឺនរៀនសូត្រអប់រំចិត្តសាស្ត្រ ការចូលរួមអនុវត្តភារកិច្ចការពារទប់ស្កាត់ និងបង្ក្រាបបទល្មើសធនធានធម្មជាតិ និងការងារបង្កបង្កើនផលចិញ្ចឹមសត្វលើកស្ទួយជីវភាពរបស់កងទ័ពបានយ៉ាងល្អប្រសើរ។

ឧត្តមសេនីយ៍ទោ សោម ស៊ុន បានប្រគល់ភារកិច្ចសំខាន់ៗមួយចំនួនបន្ថែមទៀត ជូនមេបញ្ជាការកងវរសេនាតូចលេខ៤៤៨ រួមជាមួយនាយទាហាន នាយទាហានរង និងពលទាហានទាំងអស់ត្រូវគោរពយ៉ាងម៉ឺងម៉ាត់តាមបទបញ្ជារបស់ថ្នាក់ដឹកនាំគ្រប់លំដាប់ថ្នាក់នៃកងយោធពលខេមរភូមិន្ទដោយត្រូវប្តេជ្ញាចិត្តដាច់ខាតការពារជាតិសាសនា ព្រះមហាក្សត្រនិងការពាររាជរដ្ឋាភិបាលស្របច្បាប់ដែលកើតឡើង ដោយការបោះឆ្នោត ការពារសុខសន្តិភាព និងការអភិវឌ្ឍ ក្រោមការដឹកនាំរបស់សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា៕

ដោយ ស៊ុម វណ្ណា (ប្រភព៖ តំបន់សឹករងកំពង់ធំ)