AKP កំពង់ធំ ថ្ងៃទី២៣ ខែមករា ឆ្នាំ២០២៥ -- ស្របតាមសម័យកាលប្រទេសជាតិមានការរីកចម្រើនកំណើនសម្ភារមធ្យោបាយរបស់បងប្អូនប្រជាពលរដ្ឋ កើនឡើងឥតឈប់ឈរ ហើយខេត្តកំពង់ធំជាខេត្តមួយដែលស្ថិតនៅចំណុចកណ្តាលនៃព្រះរាជាណាចក្រកម្ពុជា ហេដ្ឋារចនាសម្ព័ន្ធ ផ្លូវថ្នល់តភ្ជាប់ពីខេត្តមួយទៅខេត្តមួយទៀត ជាសរសៃឈាម គមនាគមន៍ និងសេដ្ឋកិច្ចជាតិ ហើយចរន្តអ្នកប្រើប្រាស់ផ្លូវមានភាពមមាញឹកពីមួយថ្ងៃទៅមួយថ្ងៃគួរឱ្យកត់សម្គាល់។

លោកឧត្តមសេនីយ៍ទោ ហេង សុផល ស្នងការនគរបាលខេត្តខេត្តកំពង់ធំ នាព្រឹកថ្ងៃទី២៣ ខែមករា ឆ្នាំ២០២៥ បានដឹកនាំកងកម្លាំងចុះត្រួតពិនិត្យក្នុងភូមិសាស្រ្តខេត្តតាមដងផ្លូវជាតិលេខ៦ ដែលជាចំណុចប្រឈមនឹងគ្រោះថ្នាក់ចរាចរណ៍ ចាប់ពីក្រុងស្ទឹងសែន រហូតដល់ស្រុកស្ទោងព្រំប្រទល់ខេត្តសៀមរាប។ ទន្ទឹមនឹងការចុះត្រួតពិនិត្យ ដោះស្រាយបញ្ហាប្រឈមនេះឧត្តមសេនីយ៍ទោស្នងការនគរបាលខេត្តបានណែនាំដល់ការិយាល័យជំនាញ និងលោកអធិការនគរបាលក្រុង-ស្រុក ត្រូវសហការជាមួយជំនាញពាក់ព័ន្ធត្រូវដាក់ផ្លាកសញ្ញាចរាចរណ៍ ពិសេសសាជីតាមគោលដៅនីមួយៗ ដើម្បីពញ្ញាក់ស្មារតី បង្កើនការចាប់អារម្មណ៍របស់អ្នកបើកបរឱ្យមានការប្រុងប្រយ័ត្ន ចៀសសផុតពីហានិភ័យដែលកើតឡើងដោយសារគ្រោះថ្នាក់ចរាចរណ៍នេះ។

សូមរំលឹកដែរថា រយៈពេលកន្លងទៅថ្មីៗនេះឧត្តមសេនីយ៍ទោស្នងការនគរបាលខេត្តបានផ្ដល់គោលការ៣ចំណុចគឺ៖ ១. បើកវគ្គបណ្តុះបណ្តាលបំប៉នជំនាញខ្លីដល់កងកម្លាំង ជាពិសេសក្បួន និងនីតិវិធីប្រតិបត្តិរបស់មន្ត្រីនគរបាលយុត្តិធម៌ សម្រាប់បទល្មើសចរាចរណ៍ផ្លូវគោក។ ២. ណែនាំដល់កងកម្លាំងត្រូវពង្រឹង ការអនុវត្តច្បាប់ និងបង្កើនការផ្សព្វផ្សាយអប់រំ ច្បាប់ចរាចរណ៍ផ្លូវគោកដល់មហាជនគ្រប់ស្រទាប់វណ្ណៈ និងលើកកម្ពស់ការយល់ដឹង ព្រមចូលរួមអនុវត្តឱ្យមានលទ្ធផលល្អប្រសើរ និង៣. បញ្ចូញមន្ត្រីជំនាញ និងកម្លាំងប៉ុស្តិ៍នគរបាលរដ្ឋបាលឱ្យជួយសម្រួលចរាចរណ៍បញ្ជៀសការកកស្ទះ តាមទីប្រជុំជន និងសាលារៀននានា៕

ដោយ ស៊ុម វណ្ណា (ប្រភព៖ ស្នងការនគរបាលខេត្តកំពង់ធំ)