AKP ភ្នំពេញ ថ្ងៃទី២៣ ខែមករា ឆ្នាំ២០២៥ -- ឯកឧត្តម ឧត្តមសេនីយ៍ តន់ សាលី អគ្គនាយករងមជ្ឈមណ្ឌលជាតិរក្សាសន្តិភាព តំណាងឯកឧត្តម ឧត្តមសេនីយ៍ទោ សែម រតនា អនុប្រធានទី១ គណៈកម្មាធិការជាតិ និងជាអគ្គនាយកស្តីទីមជ្ឈមណ្ឌលជាតិរក្សាសន្តិភាព បានទទួលជួបពិភាក្សាការងារជាមួយលោកវរសេនីយ៍ឯក AGUNG BUDI ASMARA នាយការិយាល័យអនុព័ន្ធយោធាអមស្ថានឯកអគ្គរដ្ឋទូតនៃសាធារណរដ្ឋឥណ្ឌូណេស៊ីប្រចាំនៅព្រះរាជាណាចក្រកម្ពុជា នាព្រឹកថ្ងៃទី២៣ ខែមករា ឆ្នាំ២០២៥។

ក្នុងជំនួបនោះ ឯកឧត្តម តន់ សាលី ក្នុងនាមឯកឧត្តម ឧត្តមសេនីយ៍ សែម រតនា អនុប្រធានទី១ គណៈកម្មាធិការជាតិ និងជាអគ្គនាយកស្តីទីមជ្ឈមណ្ឌលជាតិរក្សាសន្តិភាព បានថ្លែងអំណរគុណ និងវាយតម្លៃខ្ពស់ចំពោះទំនាក់ទំនង និងកិច្ចសហប្រតិបត្តិការរវាងការិយាល័យអនុព័ន្ធយោធាឥណ្ឌូនេស៊ីប្រចាំកម្ពុជាជាមួយមជ្ឈមណ្ឌលជាតិរក្សាសន្តិភាព។

ជាមួយគ្នានេះឯកឧត្តមបានជម្រាបជូនលោកវរសេនីយ៍ឯក AGUNG BUDI ASMARA ដែរថា ការិយាល័យអនុព័ន្ធយោធាកម្ពុជា ប្រចាំសាធារណរដ្ឋឥណ្ឌូនេស៊ីបានផ្ញើរបាយការណ៍ស្តីពីលទ្ធផលជំនួបពិភាក្សាការងាររបស់ខ្លួន ជាមួយនាយទាហានអគ្គបញ្ជាការដ្ឋានកងទ័ពជាតិឥណ្ឌូនេស៊ីកាលពីពេលកន្លងទៅ ដោយក្នុងនោះខាងភាគីឥណ្ឌូនេស៊ីបាន៖ ១) ស្នើសុំឱ្យកម្ពុជាជួយបង្ហាត់បង្រៀនឥណ្ឌូនេស៊ីបន្ថែមនូវវគ្គ EOD, Demining, Technical Demining, and MDD (Mine Detection Dog)។ ២) ស្នើសុំវិញ្ញាបនបត្រទទួលស្គាល់ដោយ UNMAS ក្រោយពេលបញ្ចប់ការសិក្សា។ ៣) ស្នើសុំវគ្គ Training of Trainer (TOT) សម្រាប់ឥណ្ឌូនេស៊ី។ ៤) ស្នើសុំបន្ថែមចំនួនសិក្ខាកាមពី១២-១៤រូបសម្រាប់វគ្គដែលត្រូវផ្តល់ជូន និងជំនាញគ្រប់គ្រង។ ៥)  ឥណ្ឌូនេស៊ីធានាការចំណាយលើសំបុត្រយន្តហោះ និងអាហារ ខណៈកម្ពុជាធានាគ្រូបង្គោល និងកន្លែងស្នាក់នៅ។ ៦) ស្នើសុំទិញ MDD (Mine Detection Dog) ដោយការបង្រៀននឹងធ្វើនៅកម្ពុជា មុនបញ្ជូនទៅឥណ្ឌូនេស៊ី។

ក្នុងឱកាសនោះ លោកវរសេនីយ៍ឯក AGUNG BUDI ASMARA បានសម្តែងការកោតសរសើរ និងវាយតម្លៃខ្ពស់ចំពោះសកម្មភាពការងាររបស់មជ្ឈមណ្ឌលជាតិរក្សាសន្តិភាព ព្រមទាំងបានសម្តែងការពេញចិត្តចំពោះការផ្តល់ការបណ្តុះបណ្តាលរបស់មជ្ឈមណ្ឌលជាតិរក្សាសន្តិភាពដល់កងកម្លាំងឥណ្ឌូនេស៊ីផងដែរ៕

ដោយ៖ ចាន់ សុភឿន (ប្រភព៖ មជ្ឈមណ្ឌលជាតិរក្សាសន្តិភាព)