AKP ព្រះវិហារ ថ្ងៃទី២៣ ខែមករា ឆ្នាំ២០២៥--ឯកឧត្តម នាយឧត្តមសេនីយ៍ មាស វិរិទ្ធ អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀនបានគូសបញ្ជាក់ថា គ្រប់ភាគីពាក់ព័ន្ធទាំងអស់នៅក្នុងមូលដ្ឋានដើរតួនាទីសំខាន់អាចបង្ការការប្រើប្រាស់ ចែកចាយ ដាំដុះគ្រឿងញៀន និងប្រើប្រាស់ App NoDrug ដែលរាយការណ៍យកបញ្ហាគ្រឿងញៀនចេញពីសហគមន៍ ។ ការលើកឡើងរបស់ឯកឧត្តម នាយឧត្តមសេនីយ៍បែបនេះនៅក្នុងសិក្ខាសាលាស្តីពីការពង្រឹង និងលើកកម្ពស់ប្រសិទ្ធភាពការងារនៃកិច្ចសហប្រតិបត្តិការអនុវត្តន៍ភូមិ ឃុំ ស គ្មានគ្រឿងញៀន នៅតំបន់ព្រំដែនកម្ពុជា-ថៃ-ឡាវ  ក្រោមជំនួយ LOA ឆ្នាំ២០២៤ នាព្រឹកថ្ងៃទី២៣ ខែមករា ឆ្នាំ២០២៥ ដោយមានការអញ្ជើញចូលរួមពី ឯកឧត្តម  វ៉ាត់ ប៉ារ៉ានីន អភិបាលរងនិងជាប្រធានលេខាធិការដ្ឋានគណៈកម្មាធិការត្រួតពិនិត្យគ្រឿងញៀនខេត្តព្រះវិហារ និងលោក ស៊ូប៉ាផាត់ ហ៊ីបឱសថ អគ្គទីប្រឹក្សាទទួលបន្ទុកគ្រឿងញៀនអមស្ថានទូតថៃប្រចាំកម្ពុជា។ 

ឯកឧត្តម នាយឧត្តមសេនីយ៍ មាស វិរិទ្ធ អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀនបានថ្លែងអំណរគុណដល់ភាគីថៃ ដែលជាដៃគូសហការគ្រប់ជុងជ្រោយនៅលើបញ្ហាគ្រឿងញៀនក៏ដូចជាបញ្ហាផ្សេងៗទៀត។ ឯកឧត្តម នាយឧត្តមសេនីយ៍បានលើកឡើងថា ការអនុវត្តផែនការភូមិ ឃុំ សង្កាត់ ស គ្មានគ្រឿងញៀននៅខេត្តជាប់ព្រំដែនកម្ពុជា-ថៃ-ឡាវ គឺពិតជាផ្ដល់មកនូវភាពសុខដុមរមនាដល់ប្រទេសយើងទាំងបីពីការលបលួចចរាចរគ្រឿងញៀនឆ្លងកាត់ព្រំដែន។ 

ក្នុងឱកាសនោះដែរឯកឧត្តម នាយឧត្តមសេនីយ៍ មាស វីរិទ្ធ បានថ្លែងបន្ថែមថា គ្រប់ភាគីពាក់ព័ន្ធទាំងអស់នៅក្នុងមូលដ្ឋានដើរតួនាទីសំខាន់អាចបង្ការការប្រើប្រាស់ ចែកចាយ ដាំដុះគ្រឿងញៀន ហើយការងារនេះគឺផ្ដើមចេញធ្វើឱ្យបានពីភូមិ១គ្មានគ្រឿងញៀន ឆ្ពោះទៅឃុំ១គ្មានគ្រឿងញៀន និងឆ្ពោះទៅពង្រីកបានក្រុង ស្រុក ខណ្ឌ គ្មានគ្រឿងញៀន រហូតដល់ទូទាំងប្រទេសគ្មានគ្រឿងញៀន។

ឯកឧត្តម នាយឧត្តមសេនីយ៍ មាស វីរិទ្ធ បានបញ្ជាក់ផងដែរថា ការងារនេះអាចសម្រេចទៅបានគឺត្រូវរួមគ្នាធ្វើសកម្មភាពផ្សព្វផ្សាយអប់រំឱ្យបានទៅកាន់តែទូលំទូលាយគ្រប់គោលដៅពិសេសគឺបំផុសឱ្យប្រជាពលរដ្ឋទាញយក និងប្រើប្រាស់ App NoDrug រាយការណ៍យកបញ្ហាគ្រឿងញៀនចេញពីសហគមន៍។

ជាមួយគ្នានេះ លោក ស៊ូប៉ាផាត់ ហ៊ីបឱសថ អគ្គទីប្រឹក្សាទទួលបន្ទុកគ្រឿងញៀនអមស្ថានទូតថៃប្រចាំកម្ពុជាបានថ្លៃងអំណរគុណដល់ភាគីកម្ពុជាដែលបានសហការល្អក្នុងការងារប្រយុទ្ធប្រឆាំងគ្រឿងញៀន និងជួយគាំទ្រគ្នាទៅវិញទៅមកកម្ពុជា-ថៃ ដើម្បីបង្ការ ទប់ស្កាត់បញ្ហាគ្រឿងញៀន ហើយប្រជាពលរដ្ឋរស់នៅក្នុងភូមិជាតួអង្គ សំខាន់៕

ដោយ៖ រិទ្ធី, ប្រភព៖ អាជ្ញាធរជាតិប្រយុទ្ធប្រឆាំងគ្រឿងញៀន