AKP ព្រៃវែង ថ្ងៃទី២៣ ខែមករា ឆ្នាំ២០២៥–ឯកឧត្ដម ស្បោង សារ៉ាត ប្រធានក្រុមប្រឹក្សាខេត្ត ឯកឧត្តម សួន សុម៉ាលីន អភិបាលខេត្ត រួមជាមួយ ឯកឧត្តម អ៊ុន ចាន់ដា អភិបាលខេត្តកំពង់ចាម ព្រមទាំងថ្នាក់ដឹកនាំខេត្ត មន្ទីរ-អង្គភាពពាក់ព័ន្ធ និងអាជ្ញាធរមូលដ្ឋាន ព្រមទាំងមន្ត្រីជំនាញនៃខេត្តទាំងពីរ កាលពីថ្ងៃទី២២ ខែមករា ឆ្នាំ២០២៥ បានអញ្ជើញចុះអន្តរាគមន៍បូមទឹក ជួយសង្គ្រោះស្រូវប្រាំងរបស់ប្រជាកសិករ ពីស្ថានីយ៍បូមទឹកទី១ គម្រោងអភិវឌ្ឍន៍ប្រព័ន្ធស្រោចស្រពវៃគោ ជំហាន២ ដែលស្ថិតនៅក្នុងឃុំមហាលាភ ស្រុកកោះសុទិន ខេត្តកំពង់ចាម ដើម្បីស្រោចស្រពដំណាំស្រូវរបស់ប្រជាកសិករ នៅស្រុកស៊ីធរកណ្ដាល ស្រុកស្វាយអន្ទរ ស្រុកកញ្ជ្រៀច និងស្រុកមេសាង ខេត្តព្រៃវែង។ 

បើយោងតាមផេកផ្លូវការរបស់មន្ទីរធនធានទឹក និងឧតុនិយមខេត្តព្រៃវែង បានបង្ហោះថា ការជួយសង្រ្គោះស្រូវប្រាំងរបស់ប្រជាពលរដ្ឋដែលកំពុងប្រឈមនឹងបញ្ហាខ្វះខាតទឹកចំនួន ៨៨៩១ ហិចតា ក្នុងស្រុកចំនួន៣ គឺស្រុកស្វាយអន្ទរ មាន៤ឃុំ ស្រុកកំចាយមារ មាន៤ឃុំ និងស្រុកមេសាង មាន៨ឃុំ ក្នុងខេត្តព្រៃវែង។ មុនចាប់ផ្តើមដំណើរការបូម នាយកដ្ឋានធារាសាស្ត្រ កសិកម្ម នៃក្រសួងធនធានទឹក និងឧតុនិយម បាននាំគ្រឿងចក្រ មកទប់ភ្លឺព្រែកវ៉ៃគោ ដែលទឹកហូរដាច់នៅរដូវវស្សាប្រវែង ១០០ម៉ែត្រ ដើម្បីកុំអោយទឹកហូរចូលបឹងក្រពិត និងរុញទឹកអោយដល់ទិសដៅដែលប្រជាកសិករត្រូវការទឹកក្នុងភូមិសាស្ត្រខេត្តព្រៃវែង។ 

ទាំងអស់នេះបានបង្ហាញឲ្យឃើញថាថ្នាក់ដឹកនាំគ្រប់លំដាប់ថ្នាក់ជាពិសេសឯកឧត្តម អភិបាលខេត្ត តែងតែគិតគូរអំពីសុខទុក្ខរបស់ប្រជាពលរដ្ឋគ្រប់ពេលវេលាគ្រប់ប្រឡាក់ទេសៈទោះក្នុងកាលៈទេសៈបែបណាក៏ដោយដោយមិនបានទុកបងប្អូនប្រជាពលរដ្ឋណាម្នាក់ចោលនោះទេ៕

ដោយ៖ គង់ សិរីរ័ត្ន, ប្រភព៖ AKP-ព្រៃវែង