AKP កំពង់ធំ ថ្ងៃទី២៣ ខែមករា ឆ្នាំ២០២៥-- ឯកឧត្តម យិន ងួនកូលេនីន អនុរដ្ឋលេខាធិការក្រសួងធនធានទឹក និងឧតុនិយម និងជាអនុប្រធានក្រុមការងារចុះមូលដ្ឋានឃុំរុងរឿង បានជំរុញដល់អាជ្ញាធរឃុំត្រូវធ្វើផែនការវិនិយោគរបស់ខ្លួនផ្ដោតលើតម្រូវការជាអាទិភាពរបស់ពលរដ្ឋក្នុងមូលដ្ឋាន ក្នុងឱកាសដែលឯកឧត្តម និងលោក សាយ គឹមឡម អភិបាលស្រុកស្ទោងអញ្ជើញជាអធិបតីក្នុងវេទិកាសាធារណៈក្រុមការងាររាជរដ្ឋាភិបាលចុះមូលដ្ឋានឃុំរុងរឿងកាលពីរសៀលថ្ងៃទី២២ ខែមករា ឆ្នាំ២០២៥ នៅវត្តបទុម ឃុំរុងរឿង ស្រុកស្ទោង ខេត្តកំពង់ធំ។

ឯកឧត្តម យិន ងួនកូលេនីន បានបញ្ជាក់ថាអាជ្ញាធរឃុំរុងរឿងត្រូវតែច្បាស់ការក្នុងការអភិវឌ្ឍមូលដ្ឋានរបស់ខ្លួនថាតើអ្វីដែលជាសមត្ថភាពផ្ទាល់របស់ឃុំដៃគូអភិវឌ្ឍន៍នានាថ្នាក់ជាតិចៀសវាងនូវការលើកគម្រោងអភិវឌ្ឍន៍ជាន់គ្នា។

ក្នុងនាមក្រុមការងារត្រូវតែព្យាយាមដោះស្រាយបញ្ហាបែបវិជ្ជមានរាល់បញ្ហា សំណូមពរ និងតម្រូវការដែលប្រជាពលរដ្ឋត្រូវការ និងចង់ឱ្យក្រុមការងារជួយដោះស្រាយតាមស្ថានភាពជាក់ស្ដែងជាពិសេសគឺរួបរួមសហការជាមួយប្រជាពលរដ្ឋ និងគ្រប់ភាគីពាក់ព័ន្ធក្នុងការអភិវឌ្ឍឃុំរុងរឿងឱ្យកាន់តែប្រសើរឡើង ដែលសមស្របតាមគោលនយោបាយរបស់រាជរដ្ឋាភិបាលអាណត្តិទី៧នេះ។

ជាមួយគ្នានេះដែរ លោក សាយ គឹមឡម អភិបាលស្រុកស្ទោងបានជំរុញដល់អាជ្ញាធរឃុំរុងរឿងត្រូវសហការជាមួយអាជ្ញាធរឃុំព្រះដំរីឱ្យអស់ពីលទ្ធភាពក្នុងការបូមទឹកពីអាងទឹក៣០កញ្ញាមកស្រោចស្រពសង្គ្រោះស្រូវកសិករនៅក្នុងឃុំ កំពុងខ្វះខាត និងដង្ហើយហៅការសង្គ្រោះឱ្យបានទាន់ពេលវេលានិងបានលើកទឹកចិត្តដល់អាជ្ញាធរឃុំរុងរឿងត្រូវ ពង្រឹងតួនាទីភារកិច្ចរបស់ខ្លួន ឱ្យសមស្របតាមច្បាប់ស្តីពីការគ្រប់គ្រងឃុំសង្កាត់ និងបង្កើនការយកចិត្តទុកដាក់ខ្ពស់ថែមទៀតដល់សុខទុក្ខ សុខុមាលភាព ជីវភាព តម្រូវការ កង្វល់ បញ្ហាប្រឈមនានារបស់ពុកម៉ែបងប្អូនប្រជាពលរដ្ឋជាពិសេសពុកម៉ែបងប្អូនដែលកំពុងមានបញ្ហាដើម្បីបានដោះស្រាយនិងឆ្លើយតបជូនគាត់។

លោកក៏បានណែនាំដល់មន្ត្រីក្រោមឱវាទ និងអាជ្ញាធរឃុំរុងរឿងត្រូវទទួលយកការរិះគន់ស្ថាបនាពីសាធារណៈជន និងប្រជាពលរដ្ឋគ្រប់មូលដ្ឋាន ដើម្បីជួយឆ្លើយតបនឹងផ្តល់សេវាជូនគាត់ប្រកបដោយប្រសិទ្ធភាព៕

ដោយ ស៊ុម វណ្ណា