AKP កំពង់ចាម ថ្ងៃទី២៣ ខែមករា ឆ្នាំ២០២៥-- ដោយមានការស្នើសុំរបស់អាជ្ញាធរខេត្តព្រៃវែង ដើម្បីសុំទឹកជួយអន្តរាគមន៍សង្គ្រោះស្រូវប្រាំងរបស់ប្រជាកសិករប្រមាណជិត១ម៉ឺនហិកតាស្ថិតក្នុងឃុំចំនួន១៣ នៃស្រុកចំនួន៣ ខេត្តព្រៃវែង ដែលប្រឈមនឹងការខ្វះទឹក នារសៀលថ្ងៃទី២២ ខែមករា ឆ្នាំ២០២៥ ឯកឧត្តម អ៊ុន ចាន់ដា អភិបាលខេត្តកំពង់ចាម និងឯកឧត្តម សួន សុម៉ាលីន អភិបាលខេត្តព្រៃវែង និងឯកឧត្ដម ស្បោង សារ៉ាត់ ប្រធានក្រុមប្រឹក្សាខេត្តព្រៃវែង បានអញ្ជើញចុះពិនិត្យ និងបញ្ជាម៉ាស៊ីនបូមទឹកនៃប្រព័ន្ធធារាសាស្ត្រស្រោចស្រព វ៉ៃកូ ជំហាន១ ស្ថិតក្នុងឃុំមហាលាភ ស្រុកកោះសូទិន ដើម្បីបូមទឹកជួយសង្គ្រោះស្រូវប្រាំងរបស់ប្រជាកសិករ ដែលប្រឈមនឹងការខ្វះទឹក។

លោក អ៊ុម វិបុល ប្រធានមន្ទីរធនធានទឹក និងឧតុនិយមខេត្តកំពង់ចាម បានឱ្យដឹងថា គម្រោងអភិវឌ្ឍន៍ប្រព័ន្ធស្រោចស្រព វ៉ៃកូ ជំហាន១ មានម៉ូទ័រអគ្គិសនីខ្នាតធំ ចំនួន៩គ្រឿង ដោយក្នុង១គ្រឿងមានលទ្ធភាពបញ្ជូនទឹកបានចំនួន ១៤០០០ម៉ែត្រគូប ក្នុង១ម៉ោង និងប្រេីប្រាស់ថាមពលអគ្គិសនីអស់ចំនួន៤៦០គីឡូវ៉ាត់ ក្នុង១ម៉ោង។ ចំពោះកម្លាំងបញ្ជូនទឹកវិញ គឺមានចម្ងាយជាង ១០០គីឡូម៉ែត្រឯណោះ។ 

លោកប្រធានមន្ទីរបានបន្ថែមទៀតថា ប្រព័ន្ធធារាសាស្ត្រស្រោចស្រព វ៉ៃកូ មានប្រឡាយមេចំនួន១២ខ្សែ និងប្រឡាយរងចំនួន៤៦ខ្សែ សរុបប្រវែង១០៥,៣៧គីឡូម៉ែត្រ ក្នុងនោះប្រឡាយបេតុងមានប្រវែង២៧,១៩គីឡូម៉ែត្រ និងប្រឡាយដីមានប្រវែង៧៨,១៧គីឡូម៉ែត្រ សំណង់សិល្បការតូចធំចំនួន១៩៥កន្លែង ព្រមទាំងមានស្ថានីយបូមទឹកទំនើបបំពាក់ម៉ូទ័រ៧គ្រឿងចំនួនមួយកន្លែង។ប្រព័ន្ធធារាសាស្ត្រនេះមានលទ្ធភាពស្រោចស្រពលើផ្ទៃដីច្រើនជាង ៨ ០០០ ហិកតា លាតសន្ធឹងចាប់ពីស្រុកស្រីសន្ធរ ខេត្តកំពង់ចាម រហូតដល់ស្រុកខ្សាច់កណ្តាល ខេត្តកណ្តាល និងផ្នែកខ្លះនៃស្រុកពារាំង ខេត្តព្រៃវែង។ ដោយប្រើប្រាស់ប្រភពទឹកពីទន្លេមេគង្គ មានស្ថានីយ បូមទឹកបំពាក់បច្ចេកវិទ្យាទំនើបខ្នាតធំបូមទឹកពីទន្លេដែលមានសក្តានុពលក្នុងការផ្គត់ផ្គង់ទឹកលើគ្រប់វិស័យ ទាំងរដូវប្រាំង និងទាំងរដូវវស្សា៕

ដោយ ឆាយ ម៉ុត