AKP ភ្នំពេញ ថ្ងៃទី២៣ ខែមករា ឆ្នាំ២០២៥-- ក្រសួងអប់រំ យុវជន និងកីឡា បានធ្វើការលើកកម្ពស់ការអប់រំឌីជីថល តាមរយៈការបង្កើតក្លឹបសិក្សាឌីជីថលនៅតាមសាលរៀន ដើម្បីជួយសិស្សានុសិស្ស ពិសេសក្មេងស្រីក្នុងការអភិវឌ្ឍជំនាញបច្ចេកវិទ្យា បំណិនសតវត្សរ៍ទី២១ ប្រែក្លាយពីអ្នកប្រើប្រាស់បច្ចេកវិទ្យាឌីជីថល មកជាអ្នកបង្កើតប្រកបដោយនវានុវត្តន៍។

បើតាមក្រសួងអប់រំ យុវជន និងកីឡាបានឱ្យដឹងថា ក្រៅពីការបណ្ដុះបណ្ដាលការអប់រំឌីជីថល កម្មវិធីសរសេរកូដ បច្ចេកវិទ្យាឌីជីថល ការបង្កើតកម្មវិធីទូរសព្ទដៃ ក្លឹបសិក្សាឌីជីថលក្រៅម៉ោងក៏បានបណ្ដុះក្មេងស្រីឱ្យចាប់អារម្មណ៍ជំនាញបច្ចេកវិទ្យាឌីជីថល សហគ្រិនភាព ចាប់ផ្ដើមយកចិត្តទុកដាក់ទៅលើបញ្ហាក្នុងសហគមន៍ ស្វែងរកដំណោះស្រាយ ចេះធ្វើការងារជាក្រុម និងការសហការគ្នា ដែលទំាងនេះជាបំណិនដ៏ចាំបាច់សម្រាប់សតវត្សរ៍ទី២១នេះ។ 

កម្មវិធីក្លឹបសិក្សាក្រៅម៉ោងត្រូវបានអនុវត្តស្របតាមវិធានគន្លឹះរបស់ក្រសួងអប់រំ យុវជន និងកីឡា ពាក់ព័ន្ធនឹងការពង្រឹងកម្មវិធីក្រៅម៉ោងសិក្សា និងស្របតាមបរិវត្តកម្មឌីជីថលនៃការអប់រំ ដែលបង្កើតបរិស្ថានឌីជីថល និងកែលម្អវប្បធម៌សាលារៀនសម្រាប់ការអប់រំបែបឌីជីថល ហើយចំណេះដឹងឌីជីថលមិនអាចខ្វះបានសម្រាប់សិស្សានុសិស្ស ដែលត្រូវតែបង្កើនលទ្ធភាពក្នុងការទទួលបានការអប់រំប្រកបដោយគុណភាព និងលើកស្ទួយទំពាំងស្នងឫស្សីជំនាន់ក្រោយផងដែរ៕

ដោយ៖ ចាន់ សុភឿន (ប្រភព៖ ក្រសួងអប់រំ)