AKP កណ្ដាល ថ្ងៃទី២៣ ខែមករា ឆ្នាំ២០២៥-- មន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ខេត្តកណ្ដាល និងក្រុមហ៊ុន បារាយណ៍ ក្លូបល មេនើចម៉ិន ឯ.ក (Baray Global Management Co., Ltd)  កាលពីថ្ងៃទី២២ ខែមករា ឆ្នាំ២០២៥ បានរៀបចំកម្មវិធីវេទិកាធុរកិច្ច ក្រោមប្រធានបទ “ឱកាស និងការត្រៀមខ្លួនសម្រាប់ទីផ្សារហាឡាលសកល” ស្ថិតនៅភូមិកោះគរ សង្កាត់រកាខ្ពស់ ក្រុងតាខ្មៅ ខេត្តកណ្តាល ក្រោមវត្តមានរបស់លោក ហួត វណ្ណថូ ប្រធានមន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ខេត្តកណ្តាល និងដោយមានការចូលរួមពីលោក-លោកស្រី  ប្រធានក្រុមហ៊ុន ភ្ញៀវកិត្តិយសជាតិ និងអន្តរជាតិផងដែរ។

លោក ហួត វណ្ណថូ ប្រធានមន្ទីរឧស្សាហកម្មខេត្ត បានឱ្យដឹងថា ស្របតាមគោលនយោបាយយុទ្ធសាស្រ្តថ្មី គឺយុទ្ធសាស្ត្របញ្ចកោណ ដំណាក់កាលទី១របស់រាជរដ្ឋាភិបាលកម្ពុជា នីតិកាលទី៧នៃរដ្ឋសភា ក្រោមការដឹកនាំរបស់សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បាន និងកំពុងបន្តថែរក្សាសុខសន្តិភាព ជំរុញកំណើនសេដ្ឋកិច្ច និងការអភិវឌ្ឍ ក្នុងចក្ខុវិស័យប្រែក្លាយខ្លួនជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងឆ្ពោះទៅ សម្រេចជាប្រទេសមានចំណូលខ្ពស់នៅឆ្នាំ២០៥០។  ក្នុងការដាក់ចេញយុទ្ធសាស្ត្របញ្ចកោណដំណាក់កាលទី១ ដើម្បីកំណើន ការងារ សមធម៌ ប្រសិទ្ធភាព និងចីរភាព និងកំណត់យកនូវអាទិភាពគន្លឹះចំនួន ៥ គឺ មនុស្ស ផ្លូវ ទឹក ភ្លើង និង បច្ចេកវិទ្យា ក្នុងនោះបានផ្តោតការយកចិត្តទុកដាក់ ជាពិសេសលើការអភិវឌ្ឍធនធានមនុស្ស ដែលជាអាទិភាពគន្លឹះទី១នៃយុទ្ធសាស្ត្របញ្ចកោណ។ គិតត្រឹមឆ្នាំ២០២៤ រោងចក្រធុនធំសរុបមានចំនួន ៣៥៤មូលដ្ឋាន ក្នុង នោះផ្នែកវាយនភ័ណ្ឌចំនួន១៤មូលដ្ឋាន ផ្នែកសម្លៀកបំពាក់១៦៧មូលដ្ឋាន ផ្នែកផលិតផលស្បែក៦២ មូលដ្ឋាន និងផ្នែកផ្សេងៗទៀត១១១ មូលដ្ឋាន មានកម្មករសរុប ១៨៧ ៣៤៩ នាក់ ។ ចំណែកសហគ្រាសធុនតូច មធ្យម និង សិប្បកម្មមានចំនួន ១ ៣៦៧ មូលដ្ឋាន។

លោក ពេជ្រ មុន្នី នាយកគ្រប់គ្រងនៃក្រុមហ៊ុន បារាយណ៍ ក្លូបល មេនើចម៉ិន ឯ.ក បានឱ្យដឹងថា ការរៀបចំវេទិកាធុរកិច្ចនេះមានគោលបំណងចូលរួមជំរុញឱ្យឧស្សាហកម្មហាឡាលកើតមានឡើងនៅកម្ពុជា ជាប្រយោជន៍រួមជូនដល់សហគមន៍ និងបងប្អូនប្រជាជនយើង ជាពិសេសអ្នកផលិត និងកែច្នៃផលិតផលក្នុងស្រុកតែម្តង ក្នុងការរៀបចំវេទិកាធុរកិច្ចជាបន្តបន្ទាប់ គឺសំដៅធ្វើយ៉ាងណាផ្សព្វផ្សាយឱ្យបានកាន់តែទូលំទូលាយទៅកាន់សហគមន៍ ទូទាំងប្រទេស និងអន្តរជាតិផងដែរ។ ដើម្បីជាការរួមចំណែកសម្រេចគោលដៅរបស់រាជរដ្ឋាភិបាល ក្រុមហ៊ុន Baray Global Management បានកំណត់ចេញនូវគោលដៅ និងសកម្មភាពអាទិភាពចំនួន៥ សម្រាប់ផែនការ៥ឆ្នាំ ២០២៥-២០២៩ ដែលទី១.  ជំរុញពិពិធកម្មវិស័យនាំចេញផលិតផលពីកម្ពុជាទៅកាន់ទីផ្សារពិភពលោក ទី២. ជំរុញ និងបង្កើនឧស្សាហកម្មផលិតកម្ម និងកែច្នៃ ជួយដល់អាជីវកម្មធន់តូច និងមធ្យម ស្របតាមស្តង់ដារហាឡាល់ និងច្បាប់អាជីវកម្មនៃព្រះរាជាណាចក្រកម្ពុជា ទី៣. ពង្រឹង និងពង្រីកតំណភ្ជាប់ ទាំងក្នុងនិងក្រៅប្រទេស បណ្ដុំសហគ្រាស និងវិនិយោគទុន ទី៤. បង្កើន និងបង្កើតសក្តានុពលការងារ  ធនធានមនុស្សឱ្យមានចំណេះនិងជំនាញ រឹង និងទន់ និងទី៥. អភិវឌ្ឍបច្ចេកវិទ្យា ដើម្បីបង្កើនប្រសិទ្ធភាព និងប្រសិទ្ធផល ក្នុងការផលិត និងផ្គត់ផ្គង់ទីផ្សារ៕

ដោយ ណយ នឿន (ប្រភព៖ រដ្ឋបាលខេត្តកណ្តាល)