AKP ភ្នំពេញ ថ្ងៃទី២២ ខែមករា ឆ្នាំ ២០២៥ – រដ្ឋមន្រ្តីក្រសួងព័ត៌មាន បានបញ្ជាក់ពីទិសដៅការងារថ្មីក្នុងឆ្នាំ ២០២៥ដែលធ្វើឡើងក្នុងពិធីបិទសន្និបាតបូកសរុបការងារក្រសួងព័ត៌មានឆ្នាំ២០២៤ និង លើកទិសដៅការងារឆ្នាំ២០២៥ នៅទីស្តីការក្រសួង នារសៀលថ្ងៃទី២២ ខែមករា ឆ្នាំ២០២៥ដោយបានបញ្ជាក់ពីការប្តេជ្ញាចិត្តពីការបង្កើនការងារអាទិភាពក្នុងនោះ ដូចជាវិស័យព័ត៌មាន និង សោតទស្សន៍ និងការងារដទៃទៀតដោយបង្កើនល្បឿន ស្រួចស្រាវព្រមទាំងប្រាកដប្រជា។

ឯកឧត្តម នេត្រ ភក្រ្តា បានមានប្រសាសន៍ថា មូលដ្ឋានធំនៃការងារដែលក្រសួងត្រូវបំពេញនាឆ្នាំ២០២៥គឺក្រសួងនឹងបង្កើនល្បឿន។យើងបានចាប់ហ្វ្រាំងនៅឆ្នាំ២០២៤ តែឆ្នាំ២០២៥គឺជាឆ្នាំបន្តដំណើរ ហើយនឹងចាប់ផ្តើមក្នុងល្បឿនមួយបន្តិចម្តងៗព្រមទាំងទៅមុខយ៉ាងល្អប្រសើរ ក្នុងនេះការងារជាអាទិភាពទី១គឺកំណែទម្រង់ រដ្ឋបាលសាធារណៈ ដោយក្រសួងនឹងផ្តោតសំខាន់ទៅតាមទិសដៅរបស់រាជរដ្ឋាភិបាលក្នុងនោះ ដូចជា ក្តោបលើការវិភាគមុខងារ ការបំពេញមុខការងារដែលខ្វះចន្លោះឬមុខងារដែលកើតថ្មី ស្របជាមួយនឹងបរិវត្តកម្មឌីជីថល និងការវិវឌ្ឍន៍របស់សង្គម ។
រដ្ឋមន្រ្តីក្រសួងព័ត៌មានបញ្ជាក់បន្ថែមថា”អញ្ចឹងហើយបានជាក្រសួងបានបំពាក់តួនាទីបន្ថែមទៅដល់ក្រសួងព័ត៌មាន ដែលការបំពាក់បន្ថែមនេះហើយវានឹងលេចចេញជារូបរាងនៃតួនាទីគាំទ្រនូវមុខងារ គាំទ្រក្រសួង ទៅក្រសួងស្ថាប័ន ។ក្រសួងរបស់យើងមានមុខងារ២គឺមុខងារស្នូលគ្រប់គ្រង និងដឹកនាំ វិស័យព័ត៌មាននិងសោតទស្សន៍នៅកម្ពុជា។មុខងារទី២គឺគាំទ្រ កិច្ចការសាធារណៈរបស់ក្រសួង ស្ថាប័នដែលរួម មុខងារស្នូល និងមុខងារ គាំទ្រ។វាគឺជាយន្តការដែលក្រសួងព័ត៌មានមានតួនាទី ការពារនៃព័ត៌មាន និង សាធារណមតិចំពោះរាជរដ្ឋាភិបាល ហើយនិងប្រទេស”។

ឯកឧត្តម នេត្រ ភក្រ្តា បានមានប្រសាសន៍ថា ស្របពេលដែលបដិវត្តបច្ចុប្បន្នការងារព័ត៌មាន និងសាធារណមតិកាន់តែស្រួចស្រាវហេតុនេះក្រសួងព័ត៌មានក៏កាន់តែស្រួចស្រាវក្នុងតួនាទីរបស់ខ្លួន។ អញ្ចឹងល្បឿនការងាររបស់ក្រសួងមិនអាចធ្វើក្នុងល្បឿនមួយដែលធម្មតាបានទេ។ជាមួយគ្នាការផ្លាស់ប្តូរផ្នត់គំនិត ក៏ដូចជាកិច្ចការងារមួយចាំបាច់។ សម្រាប់ជំហានទី២ទៀតយើងនឹងអនុវត្តជ្រើសរើសមន្រ្តីតែពេលនេះយើងមិនទាន់សម្រេចបាននូវអនុក្រិត្យនៅឡើយទេ អញ្ចឹងការជ្រើសរើសមន្រ្តីបានត្រឹមតែអ្នកចូលនិវត្តន៍ប៉ុន្មានគឺយើងយកប៉ុណ្ណឹង។

ឯកឧត្តមបានថ្លែងដែរថា”យើងនឹងឈរលើអភិក្រមរបស់រាជរដ្ឋាភិបាលបានដាក់ចុះដោយក្នុងនេះយើងនឹងពង្រឹងជាជាងពង្រីក ជាមួយគ្នាការនោះគឺជាអ្វីដែលអភិក្រមដែលយើងត្រូវធ្វើ ហើយពង្រឹងនិងបង្រួម ជាជាងពង្រីក គឹជាអ្វីដែលអភិក្រម ត្រូវធ្វើ”។

ឯកឧត្តម នេត្រ ភក្រ្តា បានថ្លែងបញ្ជាក់បន្ថែមថា”យ៉ាងណាក្តីក្នុងក្របខណ្ឌក្រសួងយើង អ្វីដែលត្រូវធ្វើ ឈរលើទស្សនៈថែរក្សានូវកេរដំណែល ថែរក្សានូវប្រវត្តិសាស្រ្ត ប៉ុន្តែបំពេញតួនាទីឆ្លើយតបទៅនឹងតម្រូវការជាក់ស្តែង និងតម្រូវការដែលចាំបាច់សម្រាប់ទៅមុខ។

រដ្ឋមន្រ្តីក្រសួងព័ត៌មានលើកឡើងផងថា កំណែទម្រង់នាំឱ្យឈឺចាប់ តែបើយើងមិនកំណែទម្រង់ អ្វីដែលយើងត្រូវដឹងទ្រឹស្តីរបស់សម្តេចតេជោគឺ៩៩ភាគរយយើងស្លាប់ តែបើយើងធ្វើកំណែទម្រង់៩៩ភាគរយយើងនៅមានជីវិតរស់ទៅមុខ។ចំណុចនេះយើងត្រូវធ្វើ ហើយទិសដៅរដ្ឋាភិបាលគឺ២៥ឆ្នាំទៅមុខ។អញ្ចឹងការរៀបចំគោលនយោបាយក្តី ការរៀបចំចក្ខុវិស័យក្នុងក្របខណ្ឌព័ត៌មាននិងសោតទស្សន៍ក្តី គឺត្រូវសម្លឹង២៥ឆ្នាំទៅមុខ៕

ដោយ៖ដេប៉ូ, រូបថត៖ ក្រុមការងារ AKP