AKP កំពត ថ្ងៃទី២២ ខែមករា ឆ្នាំ២០២៥--

មន្ត្រីបច្ចេកទេសកសិកម្ម និងកសិករឃុំកូនសត្វ ស្រុកទឹកឈូ ខេត្តកំពត បានបញ្ជាក់ថា ពួកគាត់កំពុងតែខិតខំប្រមូលចងក្រងកសិករដាំបន្លែ ដើម្បីបង្កើតជាសហគមន័បន្លែមួយក្នុងពេលឆាប់ៗខាងមុខនេះ និងបានអំពាវនាវដល់កសិករទាំងអស់សូមចូលរួមសហការបង្កើតសហគមន៍បន្លែ ដើម្បីជួយបង្កើនប្រាក់ចំណូលគ្រួសារ និងជំរុញទីផ្សារបន្លែនៅមូលដ្ឋានឱ្យបានតម្លៃខ្ពស់គ្រប់រដូវ។

លោក ម៉ី ភារ៉ា មន្ត្រីបច្ចេកទេសកសិកម្មឃុំកូនសត្វ បានឱ្យដឹងកាលពីល្ងាចថ្ងៃទី២១ ខែមករា ឆ្នាំ២០២៥ថា ឃុំកូនសត្វជាឃុំដែលមានសក្តានុពលលើការដាំដុះបន្លែតាំងពីជំនាន់ដូនតាមក។

ហើយបច្ចុប្បន្ន ក្រោមការយកចិត្តរបស់រាជរដ្ឋាភិបាល ក៏ដូចជាក្រសួងកសិកម្ម ពិសេសអាជ្ញាធរគ្រប់លំដាប់ថ្នាក់ ការដាំបន្លែមានភាពល្អប្រសើរទាំងបច្ចេកទេស និងបរិមាណខ្ពស់ ប៉ុន្តែបញ្ហាទីផ្សារនៅតែមានបន្ថិចបន្តួចដែរ ដោយសារកសិករដាំដុះលក្ខណៈគ្រួសារ មិនទាន់បានចងក្រងជាសហគមន៍។ កសិករជោគជ័យក្នុងការដាំបន្លែនៅភូមិកូនសត្វ ឃុំកូនសត្វ លោក ស្រូន សារឿន បានប្រាប់ឱ្យដឹងថា លោកយល់ច្បាស់អំពីអត្ថប្រយោជន៍នៃការបង្កើតជាសហគមន៍ គឺដើម្បីជួយបង្កើនប្រាក់ចំណូល និងជំរុញទីផ្សារបន្លែឲ្យល្អប្រសើរគ្រប់រដូវ។

មន្ត្រីបច្ចេកទេសបានបន្តថា ដោយសារមានការណែនាំ និងជំរុញពីមន្ទីរកសិកម្មខេត្ត ពិសេសលោក អ៊ឹម ច័ន្ធសោធន អភិបាលស្រុកទឹកឈូ ក្រុមការងារ អាជ្ញាធរ និងធ្វើការប្រជុំផ្សព្វផ្សាយ ចង់ក្រងបង្កើតជាសហគមន៍បន្លែឃុំកូនសត្វ នៅខែកុម្ភៈខាងមុខ។ សូមបញ្ជាក់ថា ឃុំកូនសត្វមានផ្ទៃដីដាំបន្លែជាង៣០០ហិតតាដែលអាចផ្គត់ផ្គង់បន្លែគ្រប់រដូវ។ ហើយបច្ចុប្បន្នឃុំកូនសត្វក៏បានក្លាយជាតំបន់កសិ-ទេសចរណ៍ ដ៏ទាក់ទាញរបស់ខេត្តកំពត ក្នុងនោះរួមមានទាំងតំបន់រមណីយដ្ឋានចំការម្រេច “ឡាផ្លានថេសិន” ផងដែរ៕

ដោយ ប្រាក់ លាង