AKP ភ្នំពេញ ថ្ងៃទី២២ ខែមករា ឆ្នាំ២០២៥ -- ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា កាលពីរសៀលថ្ងៃទី២១ ខែមករា ឆ្នាំ២០២៥ បានដឹកនាំកិច្ចប្រជុំស្តីពីការពិនិត្យតាមដានវឌ្ឍនភាពការងាររបស់លេខាធិការដ្ឋានទទួលបន្ទុកសម្របសម្រួលការងារក្នុងវិស័យអប់រំ យុវជន និងកីឡា ដោយបានពិភាក្សាលើវឌ្ឍនភាពការងារគន្លងអប់រំ ដើម្បីទទួលបានធាតុចូលក្នុងការពង្រឹងយន្តការការងាររវាងអង្គភាពអនុវត្ត អ្នកសម្របសម្រួល និងលេខាធិការដ្ឋាន ក៏ដូចជាវេទិកាក្នុងការពិភាក្សាលើវឌ្ឍនភាពការងារអាទិភាពដែលនៅសេសសល់។

ក្នុងកិច្ចប្រជុំនេះបន្ទាប់ពីបានស្តាប់នូវរបាយការណ៍ និងបទបង្ហាញពីវឌ្ឍនភាពនៃការងារវិស័យអប់រំរបស់អ្នកសម្របសម្រួលរួចមក ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានវាយតម្លៃខ្ពស់ចំពោះកិច្ចខិតខំប្រឹងប្រែងរបស់ក្រុមការងារពាក់ព័ន្ធនាពេលកន្លងមក ព្រមទាំងបានស្នើឱ្យក្រុមការងារទទួលបន្ទុកផ្ទាល់បន្ថែមការយកចិត្តទុកដាក់ និងធ្វើបច្ចុប្បន្នភាពជាប្រចាំ ចំណាយថវិកាឱ្យចំគោលដៅ និងត្រូវមានប្រព័ន្ធរបាយការណ៍វឌ្ឍនភាពការងារឱ្យបានទៀងទាត់ ដោយរៀបចំតួលេខ និងទិន្នន័យឱ្យបានល្អិតល្អន់បន្ទាប់ពីធ្វើការវិភាគ ជាពិសេសត្រូវបន្តធ្វើការបែងចែកភារកិច្ចឱ្យបានច្បាស់លាស់ ពង្រឹងការសហការជាប្រព័ន្ធ និងធ្វើបច្ចុប្បន្នភាពការបែងចែកការងារអាទិភាព កែសម្រួលសមាសភាពអ្នកទទួលខុសត្រូវនិងអ្នកសម្របសម្រួល ដើម្បីធានាបានប្រសិទ្ធភាពបន្ថែមលើការងារសម្របសម្រួលពិនិត្យតាមដានវឌ្ឍនភាព បញ្ហាប្រឈម យន្តការឆ្លើយតប ផ្សព្វផ្សាយព័ត៌មាន និងធានាបាននូវនិរន្តភាពរបស់វិស័យ អប់រំ យុវជន និងកីឡា។

គួរបញ្ជាក់ថា លេខាធិការដ្ឋានទទួលបន្ទុកសម្របសម្រួលការងារក្នុងវិស័យអប់រំ ត្រូវបានបង្តើតឡើងក្នុងគោលបំណងផ្តល់ការទទួលភារកិច្ច និងការទទួលខុសត្រូវ ជំរុញតាមដាន និងពង្រឹងការងារអង្គភាពក្នុងវិស័យអប់រំរបស់ក្រសួងអប់រំ យុវជន និងកីឡា ក៏ដូចជាដើម្បីធ្វើការបណ្តុះបណ្ដាលដល់មន្ត្រីជាន់ខ្ពស់នូវការគ្រប់គ្រងការងារអប់រំ ដើម្បីអាចដឹងរឿងគ្រប់ជ្រុងជ្រោយ និងអាចដោះស្រាយបញ្ហាមានប្រសិទ្ធភាពខ្ពស់ និងទាន់ពេលវេលា៕

ដោយ៖ ចាន់ សុភឿន (ប្រភព៖ ក្រសួងអប់រំ)