AKP កំពង់ធំ ថ្ងៃទី២២ ខែមករា ឆ្នាំ២០២៥ -- ឯកឧត្តម ពេជ សោភ័ន ទេសរដ្ឋមន្ត្រី ទទួលបន្ទុកបេសកកម្មពិសេសនិងជាប្រធានលេខាធិការដ្ឋានគ.វ.អ អញ្ជើញជាអធិបតីភាពក្នុងកិច្ចប្រជុំប្រជុំការចាប់ផ្តើមយុទ្ធនាការវគ្គគាំទ្រសាលារៀនគោលដៅ គ.វ.អ ខេត្តកំពង់ធំ និងខេត្តព្រះវិហារដោយមានការចូលរួមពីអភិបាលរងខេត្តកំពង់ធំ-ព្រះវិហារ ថ្នាក់ដឹកនាំមន្ទីរ អង្គភាព រដ្ឋបាលក្រុង-ស្រុក នាយក នាយិកាសាលា លោកគ្រូ អ្នកគ្រូ គណៈគ្រប់គ្រងសាលា និងមាតាបិតា អាណាព្យាបាលសិស្សសរុបប្រមាណជាង៤០០នាក់នៅសាលប្រជុំសាសាខេត្តកំពង់ធំ កាលពីថ្ងៃទី២១ ខែមករា ឆ្នាំ២០២៥។

លោក ញឹក បានខេង អភិបាលរងខេត្តកំពង់ធំ បានមានប្រសាសន៍លើកឡើងថា យុទ្ធនាការវគ្គគាំទ្រ សាលារៀនគោលដៅ គ.វ.អ គឺជាផ្នែកមួយយ៉ាងសំខាន់ក្នុងការជំរុញឱ្យការផលិតបាននូវធនធានមនុស្សប្រកបដោយសមត្ថភាព សីលធម៌ និងវិន័យ។ ក្នុងន័យនេះសូមឱ្យសាលារៀនគោលដៅទាំង០៧នៅក្នុងស្រុកសន្ទុក ស្ទោង និងកំពង់ស្វាយនៃខេត្តកំពង់ធំ និងសាលាគោលដៅទាំងអស់នៃខេត្តព្រះវិហារជាពិសេសគណៈគ្រប់គ្រងសាលារៀន និងលោកគ្រូ អ្នកគ្រូចូលរួមសហការឱ្យបានជិតស្និទ្ធជាមួយនឹងក្រុមការងារនៃគណៈកម្មាធិការជាតិជំរុញការអនុវត្តវិធានការគន្លឹះក្នុងវិស័យអប់រំដើម្បីឱ្យការអនុវត្តការងារទទួលបានជោគជ័យឈានទៅសម្រេចបានតាមចក្ខុវិស័យកម្ពុជា២០៥០។

ឯកឧត្តម ពេជ សោភ័ន បានមានប្រសាសន៍ថា គណៈកម្មាធិការនេះត្រូវបានបង្កើតឡើងក្នុងគោលបំណងលើកកម្ពស់គុណភាពអប់រំ តាមរយៈការពង្រឹង គុណភាពសាលា រដ្ឋចាប់ពីថ្នាក់មត្តេយ្យដល់មធ្យមសិក្សា ដើម្បីផលិតមូលធនមនុស្ស ប្រកបដោយចំណេះដឹង និងជំនាញ សីលធម៌ល្អ ឥរិយាបថល្អ និងសមត្ថភាពបំពេញការងារខ្ពស់ ព្រមទាំងឆ្លើយតបទៅនឹងតម្រូវការជាក់ស្តែងរបស់សង្គមសេដ្ឋកិច្ច និងទីផ្សារការងារ។

ឯកឧត្តម ពេជ្រ សោភ័ន បានមានប្រសាសន៍បន្តថា លេខាធិការដ្ឋាននេះដើរតួនាទីជាសេនាធិការរបស់ គ.វ.អ.ក្នុងគោលបំណងជួយគាំទ្រដល់ការលើកកម្ពស់ការអប់រំតាមរយៈការពង្រឹងអភិបាលកិច្ចសាលារៀន ការពិនិត្យកែលម្អកម្មវិធីសិក្សា ការរៀបចំកម្មវិធីសិក្សា និងសកម្មភាពក្រៅម៉ោងសិក្សាឱ្យស្របតាមតម្រូវការ ក្នុងពង្រឹងចំណេះដឹង វិន័យ សីលធម៌ និងឥរិយាបថសិស្ស ការយកចិត្តទុកដាក់លើសុខភាពសិស្សតាមរយៈកម្មវិធីអាហារូបត្ថម្ភ ដល់កុមារ និងការត្រួតពិនិត្យគុណភាពចំណីអាហារនៅតាមសាលារៀននិងការជំរុញលើកទឹកចិត្តការចូលរួមរបស់មាតាបិតា អាណាព្យាបាល និងសហគមន៍ក្នុងការអប់រំ៕

ដោយ ស៊ុម វណ្ណា