AKP ភ្នំពេញ ថ្ងៃទី២២ ខែមករា ឆ្នាំ២០២៥ -- ឯកឧត្តម សរ គឹមសាន្ដ អគ្គលេខាធិការអាជ្ញាធរទន្លេសាប ជួបពិភាក្សាការងារជាមួយមន្ត្រីបច្ចេកទេសរបស់វិទ្យាស្ថានស្រាវជ្រាវទឹក ក្រសួងធនធានទឹក (NHRI) នៃសាធារណរដ្ឋប្រជាមានិតចិន តាមរយៈប្រព័ន្ធវីដេអូ (Video Conference) កាលពីថ្ងៃទី២១ ខែមករា ឆ្នាំ២០២៥។

ក្នុងកិច្ចប្រជុំរបស់ភាគីទាំងពីរនេះបានពិនិត្យពិភាក្សាចំនួនពីរចំណុចសំខាន់ៗដែល៖ ទី១. កម្មវិធីចុះពិនិត្យស្ថានីយត្រួតពិនិត្យជលសាស្ត្រ ដែលបានដំឡើងតាមរយៈគម្រោងកិច្ចសហប្រតិបត្តិការ NIHWA និងទី២. ពិនិត្យសេចក្ដីព្រាងអនុស្សរណៈនៃការយោគយល់គ្នា រវាងអាជ្ញាធរទន្លេសាប និងវិទ្យាស្ថានស្រាវជ្រាវទឹកនៃក្រសួងធនធានទឹកចិន ពីកិច្ចសហការសិក្សាស្រាវជ្រាវរួមគ្នាលើការគ្រប់គ្រង និងអភិវឌ្ឍន៍ធនធានទឹកប្រកបដោយចីរភាព។

សូមបញ្ជាក់ថា ដំណើរបេសកកម្មរបស់ប្រតិភូរដ្ឋមន្ត្រីក្រសួងធនធានទឹក និងមន្រ្តីបច្ចេកទេសវិទ្យាស្ថានស្រាវជ្រាវទឹក (NHRI) របស់ក្រសួងធនធានទឹកនៃសាធារណរដ្ឋប្រជាមានិតចិន នឹងប្រព្រឹត្តទៅនាខែមីនា ឆ្នាំ២០២៥ ខាងមុខនេះ៕

ដោយ ណយ នឿន (ប្រភព៖ អាជ្ញាធរទន្លេសាប)