AKP ព្រះសីហនុ ថ្ងៃទី២១ ខែមករា ឆ្នាំ២០២៥--

ឯកឧត្ដម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តព្រះសីហនុ បានមានមតិសំណេះសំណាល និងផ្តល់អនុសាសន៍ផ្តាំផ្ញើក្នុងឱកាសអញ្ជើញចូលរួមបិទសន្និបាតបូកសរុបលទ្ធផលការងារឆ្នាំ២០២៤ និងលើកទិសដៅការងារឆ្នាំ២០២៥ របស់រដ្ឋបាលខេត្តព្រះសីហនុ នារសៀលថ្ងៃអង្គារទី២១ ខែមករា ឆ្នាំ២០២៥។

ឯកឧត្ដម សាយ សំអាល់ បានថ្លែងអំណរគុណចំពោះរាជរដ្ឋាភិបាលកម្ពុជា ដឹកនាំដោយសម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលបានដាក់ចេញនូវយុទ្ធសាស្ត្របញ្ចកោណ ដំណាក់កាលទី១ ក្នុងការដឹកនាំប្រទេសជាតិក្នុងបុព្វហេតុជាតិ មាតុភូមិ ព្រមទាំងបានថ្លែងអំណរគុណដល់ក្រុមការងារមកពីក្រសួង ស្ថាប័ន និងកងកម្លាំងប្រដាប់អាវុធដែលបានចូលរួមសហការបំពេញការងារជាមួយគ្នាក្នុងបុព្វហេតុរួមនៅក្នុងខេត្តព្រះសីហនុ ដោយ៖ ១. ត្រូវបន្តប្រពៃណីសាមគ្គីភាពដឹកនាំ និងជំរុញការអភិវឌ្ឍខេត្តព្រះសីហនុ។ ២. បងប្អូនក្រុមការងារចុះមូលដ្ឋានខេត្តព្រះសីហនុ បានខិតខំប្រឹងប្រែងបំពេញការងារ ដោយយកប្រជាពលរដ្ឋជាម្ចាស់ ក្នុងនាមយើងជាមន្ត្រីរាជការស៊ីវិល និងកងកម្លាំងប្រដាប់អាវុធ យើងត្រូវរួមគ្នាបំពេញការងារក្នុងមូលដ្ឋានបានល្អ ។ ៣. គោលនយោបាយរបស់សម្តេចធិបតី ហ៊ុន ម៉ាណែត ដែលបានដាក់ចេញសម្រាប់យក មកអនុវត្តនៅមូលដ្ឋាន ដែលជាយន្តការពង្រឹងពង្រីកពីថ្នាក់ជាតិ មកដល់ថ្នាក់មូលដ្ឋាន។ ៤. ឆ្លើយតបទៅនឹងគោលនយោបាយរបស់រាជរដ្ឋាភិបាលកម្ពុជា ដោយផ្តោតសំខាន់ទៅលើវិស័យមួយចំនួនមានដូចជា មនុស្ស ផ្លូវ ទឹក ភ្លើង អប់រំ សុខាភិបាល និងបច្ចេកវិទ្យា ហើយវិស័យទាំងអស់នេះមិនអាចខ្វះបានក្នុងការចូលរួមចំណែកអភិវឌ្ឍខេត្តព្រះសីហនុ ក៏ដូចជាការចូលរួមអភិវឌ្ឍប្រទេសកម្ពុជា ហើយទិសដៅរបស់យើង គឺចូលរួមអភិវឌ្ឍខេត្តព្រះសីហនុ ដែលមានហេដ្ឋារចនាសម្ព័ន្ធដ៏សម្បូរបែបនាពេលបច្ចុប្បន្ននេះ ជួយកាត់បន្ថយភាពក្រីក្រតោកយ៉ាកបានថែមទៀតផង។

ឯកឧត្តមប្រធានក្រុមការងាររាជរដ្ឋាភិបាលចុះមូលដ្ឋានខេត្តព្រះសីហនុ បានបញ្ជាក់ថា ខេត្តព្រះសីហនុត្រូវបានបញ្ចប់ការចុះបញ្ជីដីធ្លី និងជម្លោះដីធ្លី ដូច្នេះអាជ្ញាធរក្រុង ស្រុក ឃុំ សង្កាត់ទាំអអស់ត្រូវយកចិត្តទុកដាក់ចំពោះក្រុមក្មេងទំនើង ដើម្បីភូមិ ឃុំ សង្កាត់របស់យើងមានសុវត្ថិភាព ពិសេសពង្រឹងអភិបាលកិច្ចតំបន់កោះក្នុងការទាក់ទាញភ្ញៀវទេសចរជាតិ អន្តរជាតិ ដោយផ្តោតការកែប្រែទៅលើសហគមន៍នេសាទ មកជាសហគមន៍ទេសចរណ៍ក្នុងការដឹកជញ្ជូនភ្ញៀវទេសចរទៅកម្សាន្តដូចជា ស្ទូចត្រី មុជទឹកមើលជីវចម្រុះ មុជទឹកមើលផ្កាថ្មជាដើម ពួកគាត់នឹងទទួលបានប្រាក់ចំណូល ដើម្បីបង្កើនជីវភាពគ្រួសារកាន់តែប្រសើរឡើងថែមទៀត។

ទន្ទឹមនេះយើងត្រូវចាប់យកឱកាសការងារឱ្យខាងតែបាននៅខេត្តព្រះសីហនុ ដែលត្រូវទាមទារឱ្យយើងមានជំនាញបច្ចេកទេស និងបំណិនជីវិតកាន់តែច្រើនបន្ថែមទៀតសម្រាប់កូនចៅរបស់យើងនាពេលខាងមុខ ព្រោះខេត្តព្រះសីហនុ ត្រូវបានរាជរដ្ឋាភិបាលកំណត់ជាតំបន់សេដ្ឋកិច្ចពិសេសគំរូពហុបំណង។ ពិសេសថែមទៀតនោះ កំពង់ផែស្វយ័តក្រុងព្រះសីហនុទទួលបានកុងតីន័រឆ្លងកាត់១លានកុងតីន័រសម្រាប់ឆ្នាំ២០២៤៕

ដោយ ងូ សុមុនី