AKP ភ្នំពេញ ថ្ងៃទី២១ ខែមករា ឆ្នាំ២០២៥--

នាយកដ្ឋានតម្រង់ទិសវិជ្ជាជីវៈ ក្រោមការគាំទ្ររបស់អង្គការ UNICEF នៅថ្ងៃទី២១ ខែមករា ឆ្នាំ២០២៥ មានរៀបចំសិក្ខាសាលាស្ដីពី «ការអនុវត្តកម្មវិធីអប់រំបំណិនជីវិតតាមមូលដ្ឋានលើប្រធានបទ សុវត្ថិភាពកុមារលើប្រព័ន្ធអនឡាញ» នៅសាលប្រជុំសាលាមធ្យមសិក្សាគរុកោសល្យមត្តេយ្យមជ្ឈឹម ។

គោលបំណងនៃការរៀបចំសិក្ខាសាលាស្ដីពី ការអនុវត្តកម្មវិធីអប់រំបំណិនជីវិតតាមមូលដ្ឋានលើប្រធានបទ សុវត្ថិភាពកុមារលើប្រព័ន្ធអនឡាញនេះ គឺដើម្បីពង្រឹងការអនុវត្តកម្មវិធីសុវត្ថិភាពកុមារតាមប្រព័ន្ធអនឡាញ និងផ្សព្វផ្សាយដាក់ឱ្យដំណើរការ សៀវភៅណែនាំបង្រៀនស្តីពី សុវត្ថិភាពកុមារលើប្រព័ន្ធអនឡាញ កម្រិតមធ្យមសិក្សាបឋមភូមិ និងបានបែងចែកឯកសារដល់មន្ទីរអប់រំ យុវជន និងកីឡាសម្រាប់យកទៅបង្រៀននៅកម្រិតថ្នាក់ទី៧ នៃមុខវិជ្ជាបំណិនជីវិតតាមមូលដ្ឋាន។

សិក្ខាសាលានេះត្រូវបានប្រារព្ធកម្មវិធីបើកក្រោមអធិបតីភាពឯកឧត្តមបណ្ឌិត អ៊ឹម កុច រដ្ឋលេខាធិការនៃក្រសួងអប់រំ យុវជន និងកីឡា និងលោកវេជ្ជបណ្ឌិត Anirban Chatterjee នាយករងអង្គការយូនីសេហ្វប្រចាំប្រទេសកម្ពុជា ដោយមានអ្នកចូលរួមសរុបចំនួន ១៧០នាក់៕

ដោយ ណយ នឿន (ប្រភព៖នាយកដ្ឋានតម្រង់ទិសវិជ្ជាជីវៈ)