AKP ភ្នំពេញ ថ្ងៃទី២១ ខែមករា ឆ្នាំ២០២៥ -- ឯកឧត្ដម ចាន់ សុខភក្ដី រដ្ឋលេខាធិការក្រសួងព័ត៌មាន ទទួលបន្ទុការងារសមាគមអ្នកសារព័ត៌មានបានគូសបញ្ជាក់ថា យើងត្រូវកសាងកម្លាំងយុវជនថ្មី ដើម្បីជាថ្នាលបន្តដឹកនាំវិស័យព័ត៌មាន ស្របតាមទិសដៅរបស់ក្រសួងព័ត៌មាន ហើយដែលក្រសួងកំពុងតែបង្កើននូវការបណ្តុះបណ្តាលមន្ត្រីរបស់យើងផងដែរ។ ការលើកឡើងរបស់ឯកឧត្តមរដ្ឋលេខាធិការដូចនេះធ្វើឡើងក្នុងបទបង្ហាញស្ដីពីការគ្រប់គ្រងសមាគមសារព័ត៌មាន និងសណ្ដាប់ធ្នាប់ក្នុងវិស័យសារព័ត៌មាន នារសៀលថ្ងៃទី២០ ខែមករា ឆ្នាំ២០២៥ ជូនអង្គសន្និបាតបូកសរុបការងារឆ្នាំ២០២៤ និង លើកទិសដៅការងារឆ្នាំ២០២៥ របស់ក្រសួងព័ត៌មាន។

ចំពោះការគ្រប់គ្រងសមាគមសារព័ត៌មាន និងសណ្ដាប់ធ្នាប់ក្នុងវិស័យសារព័ត៌មាន ឯកឧត្ដម ចាន់ សុខភក្ដី បានថ្លែងថា ក្រសួងនឹងបន្តពង្រឹងប្រតិបត្តិការក្នុងការចុះបញ្ជីរបស់សមាគមសារព័ត៌មាន បន្តគ្រប់ គ្រងតម្រង់ទិស ជាពិសេសគឺសតិអារម្មណ៍របស់បងប្អូនអ្នកសារព័ត៌មានក្នុងសមាគម ព្រោះកន្លងមកនៅ ពេលដែលសមាគមត្រូវបានអញ្ជើញឱ្យចូលរួមក្នុងកម្មវិធីនានា យើងតែងតែលេចឮពាក្យថា ក្រសួង អញ្ជើញតែសមាគមធំៗ សមាគមដែលស្និទ្ធស្នាល ឬសមាគមដែលមានឥទ្ធិពលជាដើម ដែលនេះគឺជា សតិអារម្មណ៍របស់ពួកគាត់ ហើយក្នុងនាមជាអ្នកសម្របសម្រួលឯកឧត្តមត្រូវធ្វើឱ្យមានតុល្យភាពក្នុងការងារសម្របសម្រួលដើម្បីឱ្យមានការយល់ពីកិច្ចការមួយនេះ ជាពិសេសតាមរយៈសន្និបាតរបស់ក្រសួងព័ត៌មានរយៈពេល៣ថ្ងៃនេះ។

ឯកឧត្ដមរដ្ឋលេខាធិការ ចាន់ សុខភក្ដី បានបន្ថែមថា កន្លងមកក្រសួងបានខិតខំក្នុងការបណ្តុះបណ្តាល ទៅលើវិស័យសារព័ត៌មានទាំងកម្រិតទាប កម្រិតមធ្យម និងកម្រិតខ្ពស់ ដោយយកសមាគមអ្នកសារព័ត៌ មានធ្វើជាដៃគូសម្រាប់ការបណ្តុះបណ្តាល ហើយថា កន្លងទៅនេះយើងក៏បានឯកភាពគ្នាជាគោលការណ៍ក្នុងការធ្វើការងារផ្សព្វផ្សាយ ស្វែងយល់ពីធម្មនុញ្ញវិជ្ជាជីវៈសារព័ត៌មានឱ្យបានទូទាំង២៥រាជធានី ខេត្ត ដែលនេះគឺជាគោលដៅសម្រាប់ឆ្នាំ២០២៥ របស់យើង។ ដូច្នេះហើយការពង្រឹងនូវការបណ្តុះ បណ្តាលដល់អ្នកសារព័ត៌មានគឺជាកិច្ចការសំខាន់ ដែលយើងត្រូវបន្តគាំទ្រចំពោះសកម្មភាពផ្សព្វផ្សាយ ឬការធ្វើសិក្ខាសាលាឱ្យបានទូលំទូលាយ លើកទឹកចិត្តឱ្យមានការចូលរួមនៅក្នុងការងារមនុស្សធម៌ សម្រាប់សមាគមអ្នកសារព័ត៌មាន ពោលគឺលើកទឹកចិត្តឱ្យពួកគាត់ចូលរួមទាំងការងារផ្សព្វផ្សាយ ចូល រួមទាំងក្នុងសកម្មភាពនៃការងារមនុស្សធម៌៕

ដោយ៖ ចាន់ សុភឿន