AKP កំពង់ធំ ថ្ងៃទី២១ ខែមករា ឆ្នាំ២០២៥ -- លោក ពេញ កែម អភិបាលក្រុងស្ទឹងសែន បានអញ្ជើញបិទការប្រកួតកីឡាសិស្សបឋមសិក្សា-មធ្យមសិក្សាជ្រើសរើសជើងឯកថ្នាក់ក្រុងឆ្នាំសិក្សា២០២៤-២០២៥ កាលពីរសៀលថ្ងៃទី២០ខែមករា ឆ្នាំ២០១៥ ក្នុងបរិវេណវិទ្យាល័យកំពង់ធំ ក្រុងស្ទឹងសែន ខេត្តកំពង់ធំ។

លោកអភិបាលក្រុងបានបញ្ជាក់ថា ការលេងកីឡាគឺជាកត្តាមួយដែលបានផ្សារភ្ជាប់ទៅនឹងការសិក្សារៀនសូត្រធ្វើឱ្យសុខភាព រាងកាយរឹងមាំរៀនបានពូកែចេះសាមគ្គីគ្នា មានភាពទំនាក់ទំនងគ្នាទៅវិញទៅមក ក្នុងការអភិវឌ្ឍសាលារៀនមានការរីកចម្រើន ប្រកបដោយបរិស្ថានស្អាតនិងជាសាលាកុមារមេត្រី។ ការប្រកួតកីឡានេះគឺធ្វើឱ្យយុវជនសិស្សានុសិស្សដើម្បីពង្រឹងការយកចិត្តទុកដាក់លើវិស័យអប់រំកាយនិងកីឡា ក៏ជាការចូលរួមលុបបំបាត់ការប្រើប្រាស់គ្រឿងញៀននៅក្នុងសាលារៀន សហគមន៍ និងនៅទីសាធារណៈជាដើម។ អ្វីជាសំខាន់ជាងនេះទៅទៀតនោះការប្រកួតនៅថ្ងៃនេះក៏ជាការចូលរួមលើកស្ទួយវិស័យកីឡាឱ្យកាន់តែប្រសើរឡើង។

លោកអភិបាលក្រុងបានផ្ដាំផ្ញើ និងលើកទឹកចិត្តដល់ក្រុមកីឡាករទាំងអស់ ដែលបានប្រកួតក្នុងរយៈពេល២ថ្ងែត្រូវបង្កើនការហ្វឹកហាត់បន្តទៀតហើយការប្រកួតពេលនេះក៏ជាការដកស្រង់បទពិសោធន៍បច្ចេកទេសពីគ្នាទៅវិញទៅមក ត្រូវបង្កើនការហ្វឹកហាត់បន្តទៀត ដើមី្បរក្សាឱ្យបាននូវភាពជោគជ័យរបស់យើងនៅពេលក្រោយៗទៀតហើយត្រូវតែខិតខំសិក្សារៀនសូត្រឱ្យបានល្អប្រសើរស្ដាប់លោកគ្រូអ្នកគ្រូ ក្នុងការបង្ហាត់បង្រៀន។ចូលរួមគោរពច្បាប់ចរាចរណ៍ផ្លូវគោកឱ្យបានគ្រប់ៗគ្នា ពិសេសគឺចៀសឱ្យឆ្ងាយពីគ្រឿងញៀន ពេលទំនេរពីការសិក្សាត្រូវចេះជួយធ្វើកិច្ចការឪពុកម្ដាយ។

សូមបញ្ជាក់ថាកីឡាករ កីឡាការិនីដែលចូលរួមក្នុងការប្រកួតក្នុងរយៈពេល២ថ្ងៃមានចំនួន៣៦៣នាក់ ស្រី១១៣នាក់ ស្មើនឹង១០០ក្រុមលើវិញ្ញាសាចំនួន៥គឺ៖ បាល់ទាត់ បាល់ទះ បាល់បោះ ប៊ូលប៉េតង់ និងអត្តពលកម្មដោយបានបែងចែកជា២ផ្នែកគឺ៖ ១. ផ្នែកបឋមសិក្សាដែលទទួលជ័យលាភីមានកីឡាករបាល់ទាត់ បាល់ទះ បាល់បោះ អត្តពលកម្ម “ការរត់ល្បឿន៦០ម៉ែត្រ លោតចម្ងាយ លោតកម្ពស់ រត់ចម្ងាយ១០០ម៉ែត្រ”។ ២. ផ្នែកមធ្យមសិក្សាមានដែលទទួលជ័យលាភីមានកីឡាករបាល់ទាត់ បាល់ទះ បាល់បោះ ប៊ូលបេតង់ “៣នាក់ទល់នឹង៣នាក់និង១នាក់ទល់នឹង១នាក់” អត្តពលកម្មមាន “ការរត់ចម្ងាយ១០០ម៉ែត្រ លោតចម្ងាយ លោតកម្ពស់ ចោលដុំដែក រត់ចម្ងាយ៣០០ម៉ែត្រ និងដើរចម្ងាយ៥០០០ម៉ែត្រ”៕

ដោយ ស៊ុម វណ្ណា