AKP កំពង់ធំ ថ្ងៃទី២១ ខែមករា ឆ្នាំ២០២៥ -- ដោយបានយកចិត្តទុកដាក់ការងារសុវត្ថិភាពចរាចរណ៍ផ្លូវគោកជាការងារកន្សោមអាទិភាពមួយ ក្នុងចំណោមការងារជំនាញមួយចំនួនទៀត កាលពីថ្ងៃទី២០ ខែមករា ឆ្នាំ២០២៥ ឧត្តមសេនីយ៍ទោ ហេង សុផល ស្នងការនគរបាលខេត្តកំពង់ធំ បានដឹកនាំកងកម្លាំងចុះរៀបចំសណ្ដាប់ធ្នាប់ត្រួតពិនិត្យភូមិសាស្រ្តតាមដងផ្លូវជាតិលេខ៦ ដែលប្រឈមនឹងគ្រោះថ្នាក់ចរាចរណ៍ ចាប់ពីព្រំប្រទល់ខេត្តកំពង់ចាម-កំពង់ធំ ក្នុងស្រុកតាំងគោក ដល់ក្រុងស្ទឹងសែន ខេត្តកំពង់ធំ។

ឧត្តមសេនីយ៍ទោ ហេង សុផល បានថ្លែងបញ្ជាក់ថា ការចុះត្រួតពិនិត្យតាមបណ្ដាគោលដៅសំខាន់ៗ គឺដើម្បីដោះស្រាយបញ្ហាប្រឈមដែលអាចកើតមានឡើងនូវគ្រោះថ្នាក់ជាយថាហេតុនិងបង្ការ ទប់ស្កាត់ កាត់បន្ថយគ្រោះថ្នាក់ចរាចរណ៍  ឱ្យមានកម្រិតទាបក្នុងគោលបំណងថែរក្សាបានអាយុជីវិតទ្រព្យសម្បត្តិជាបុគ្គល និងទ្រព្យសម្បត្តិជាសាធារណៈ។ គ្រោះថ្នាក់ចរាចរណ៍បានបំផ្លិចបំផ្លាញអាយុជីវិត ទ្រព្យសម្បត្តិ រុញច្រានជីវភាពគ្រួសារឱ្យធ្លាក់ចូលក្នុងជីវភាពក្រីក្រី បន្សល់ទុកជនពិការភាព បុរសពោះម៉ាយ ស្ត្រីមេម៉ាយ កូនកំព្រាបាត់បង់អនាគត ជីវភាពគ្រួសារមានការលំបាក។

សូមបញ្ជាក់ដែរថា រយៈពេលកន្លង ឧត្តមសេនីយ៍ទោបានដាក់ចេញបទបញ្ជាយ៉ាងម៉ឺងម៉ាត់ដល់មន្ត្រីជំនាញ កម្លាំងអធិការនគរបាលនៃអធិការដ្ឋាននគរបាលក្រុង-ស្រុក និងកម្លាំងប៉ុស្តិ៍នគរបាលរដ្ឋបាលត្រូវបង្កើនការផ្សព្វផ្សាយច្បាប់ចរាចរណ៍ផ្លូវគោកដល់សិស្សានុសិស្ស បងប្អូនប្រជាពលរដ្ឋគ្រប់ស្រទាប់វណ្ណៈឱ្យមានការចូលរួមអនុវត្តច្បាប់ចរាចរណ៍ផ្លូវគោកឱ្យបានព្រមៗគ្នា ដើម្បីកាត់បន្ថយហានិភ័យដែលកើតឡើងពីគ្រោះថ្នាក់ចរាចរណ៍។ កងកម្លាំងត្រូវជួយសម្រួលចរាចរណ៍ជូនសិស្សានុសិស្ស ចេញ-ចូលសាលារៀន និងអ្នកធ្វើដំណើរតាមទីប្រជុំជនផងដែរ៕

ដោយ ស៊ុម វណ្ណា (ប្រភព៖ ស្នងការនគរបាលខេត្តកំពង់ធំ)